Isaya
28 Obulighe oko mbita* eyikayikanganaya* y’abatamiri ba Efraimu
Oko musanga owakuma w’obubuya bwiwe obukakangabasanaya,
Owakatabala oko musya owalimo embolewa w’abo edivai yabiribundamirya.
2 Mulebaye, Yehova awite omundu w’akaghala n’ow’amaka,
Ng’ekihunga ekirimo embula y’amatwa, ekihunga ky’ekibula kinene ekikatsandaya,
Ng’ekihunga ekirimo emilumo eky’amaghetse awakalire awakabwagha,
Akendisyaghusakyo n’oburundi oko kihugho.
3 Esyombita esikayikanganaya* esy’abatamiri ba Eframu
Sikendisyalyatangirirwa ahisi.
4 N’eriwa erikuma ry’olukengerwa ery’obubuya bwayo,
Erikatabala oko musya owalimo embolewa,
Likendisyabya ng’etini y’erimbere-mbere embere omughulu w’omwisi ahike.
Omundu akabya alangirayo, akalw’iniatomerayo ikanahika omo byala biwe.
5 Oko kiro ekyo, Yehova w’emilondo akendisyabya mbita y’olukengerwa n’embita y’amawa busana n’abandu biwe abasighala. 6 Kandi akendisyaha oyo wikere akatswera y’ekirimu ky’obulingirirania n’eriha amaka abakakakiraya eribambwirwa oko lukyo.
7 N’aba bakatala oko nzira busana n’edivai;
Obwabu bwabo bukaleka ibaghuna-ghuna.
Omuhereri n’omuminyereri bakatala oko nzira busana n’obwabu;
Edivai ikaleka ibabya omw’ibulungana,
Kandi bakaghuna-ghuna busana n’obwabu bwabo;
Esyonzoli syabo sikaleka ibahera oko nzira
Kandi bakatwikangala bakatswera.
8 Kusangwa esyomesa syabo syoswireko ebisalo ebikita nye
—Sihali aho bite.
9 Omundu angakangiriryandi y’amenge,
Kandi omundu angowisya ndi y’omulaghe?
Abakalua okw’itsirisibwa amabere kwehi,
Abakalua okw’ilusibwa oko mabere?
10 Kusangwa ni kyalayiro oko kyalayiro, ekyalayiro oko kyalayiro,
Omulondo* oko mulondo, omulondo oko mulondo,
Hano hake, na halya hake.”
11 Neryo akendisyabugha n’abandu aba erilabira abandu abakatetemuka* n’abakabugha omubughe w’ehandi. 12 Mwanabwirabo ati: “Ono wo mwanya w’eriluhikiramo. Oyuluhire, aluhuke; ono wo mwanya w’eriyowiramo mbolere,” aliwe mubaghana eryowa. 13 Neryo okw’ibo ekinywa kya Yehova kikendisyabya:
“Ekyalayiro oko kyalayiro, ekyalayiro oko kyalayiro,
Omulondo* oko mulondo, omulondo oko mulondo,
Hano hake, na halya hake,”
Neryo bakendisyatwikala n’eriwa bunyuma-nyuma bakaghenda
N’eribunika n’erihambwa omo kitegho n’eriwatwako.
14 Neryo muhulikirire ekinywa kya Yehova, inywe mukayipipa,
Inywe batabali b’abandu aba, abali e Yerusalema,
15 Kundi mukabugha muti:
“Twabirikola endaghane n’Oluholo,
Kandi twabirilighirana* n’Eyisinda,*
Omughulu eribwagha ry’amaghetse erikalire kandi ery’eritsumbukania rikendisyalaba,
Siryendisyatuhikako,
Kusangwa twabiriyira amabehi mo busayiro bwetu
Kandi twabiriyibisa omo matebo.”
16 Neryo Yehova Omukama Mukulu oko Bosi ati:
“Hano, ngahira eribwe eryabirilengwako eribya fondasyo ye Sioni
Eribwe ry’obughuli ery’oko ngonde* ery’efondasyo eyisikire.
Sihali omundu wosi-wosi oyuwite obwikirirya oyukendisyahandabuka.
17 Naghe ngendiyira obulingirirania eribya kamba y’eripimamo
N’eritunganene mo kindu ky’erilingiriraniamo.*
Amatsuku* akendisyabirya-birya obusayiro bw’amabehi,
N’amaghetse akendisyabwaghira ah’eribisama.
18 Endaghane yenyu eyo mwakola n’oluholo ikendisyabuliranibwa,
N’erilighirana lyenyu eryo mwakola n’Eyisinda* siryendisyahangana.
Omughuluu eribwagha ry’amaghetse erikalire kandi ery’eritsumbukania rikendisyalaba,
Likendisyabahinolera.
19 Obuili ngendo rikendisyabya rikalaba,
Likendisyabya likababirya-birya;
Kusangwa likendisyabya likalaba etututu oko yindi,
Omo musibo n’omo kiro.
Eryubahya lisa ryo likendisyaleka ibaminya ebyabiryowibwa.”*
20 Kusangwa engyingo ni nguhi omundu syangatoka eriyikakirya kuyo,
N’ekindu ky’eriyiswika ekilukire ni kike-kike kutsibu
Sikyangaswika omundu.
21 Kusangwa Yehova akendisyahangana ng’akahangana oko Kitwa kye Perazimu;
Akendisyayisumba ng’akayisumba omo musya* owali hakuhi ne Gibeoni
Atoke erikola omubiiri wiwe—omubiiri wiwe owakaswekaya—
Kandi atoke eribererya omubiiri wiwe—omubiiri wiwe owate ng’eyindi.
22 Neryo isimwabyamo akasekereryo,
Ebibabohire bikasyababoha kutsibu,
Kusangwa nabiryowa erilua oko Yehova w’emilondo, Omukama Mukulu oko Bosi,
Ngoko eriheribwa ryabisohwa busana n’ekihugho kyosi.*
23 Muteghe okutu, muhulikirire omulenge waghe;
Muhulikirire ndeke, mwowe ekyo ngabugha.
24 Omulimi akanalima omo musibo wosi embere abibe embuto?
Akanabera eritakula n’erikunguta ekitaka kiwe?
25 Akabya abilingirirania ekitaka,
Syalipanza-panza ebizari nyiraghulu n’eribiba ebizari* kwehi,
Kandi syalibiba engano, obulo, n’ekisususu omo mwanya owatolere
N’eribiba engano y’ekusemeti oko mipaka?
26 Kusangwa akamukangiriraya* enzira eyuwene;
OMungu wiwe akamukangiriraya.
27 Kusangwa ebizari nyiraghulu siyiritundulawa omo kindu ky’erinyughusulamo engano,
N’ekiringo ky’engurubani sikirilabibawa endata oko bizari.*
Omo mwanya w’ekyo, ebizari nyiraghulu ikahumbawa omo muhumbo,
N’ebizari omo mutso,
28 Omundu akanatundula enafaka y’erikokotya omukati?
Iyehe, syalitundulayo lughumerere;
N’omughulu akalabaya kuyo kw’ekiringo ky’engurubani yiwe iniane n’esyosabayiri,
Syalihinolerayo.