Hosea
4 Inywe Baisraeli, muhulikirire ekinywa kya Yehova,
Kundi Yehova akashitaka abikalani b’omo kihugho kino.
Kusangwa omo kihugho simuli ekwenene, olwanzo oluteleghula, n’abandu sibasi oMungu.
2 Ehosi-hosi, abandu bakalapa eby’amabehi,
Bakabugha amabehi, bakita,
Bakiba, n’erisingira,
Obwiti bukabya obundi oko bundi.
3 Kyo kikendisyaleka ekihugho ikyalira
N’abikalani bamo bosi bakendisyatsanda
Esyonyama sy’omoli, esyonyunyu sy’omo kyanya,
Nibya n’esyosamaki sy’omo ngetse sikendisyahola.
4 “Aliwe omundu isyalwa n’abandu, kutse eribakunga,
Kundi abandu baghu bali ng’abandu abakalwa n’omuhereri.
5 Busana n’ekyo, ukendisyatwikala omo ritungyi rya pe
N’omuminyereri akendisyatwikala haghuma naghu ngoko omundu angatwikala omo kiro.
Kandi ngendisyatoghotya* mama waghu.
6 Abandu baghe bakendisyatoghotibwa,* kundi sibaniasi.
Kundi wabirighana eriniminya, naghe ngendisyakughana
Siwendisyasyabya muhereri waghe.
Kundi wabiribirirwa emighambo* y’oMungu waghu,
Naghe ngendisyibirirwa abana baghu.
7 Ibakabya babikanyirira, n’amalolo agho bakanikolera nagho iniakanyirira
Ngendisyabindula olukengerwa lwabo mw’ihemuka.*
8 Bakalya erilolo ry’abandu baghe,
Kandi balimo mururu* w’ekosa y’abandu baghe.
9 Abandu n’omuhereri bakendisyahikirwa n’omwatsi mughumerera;
Ngendisyabatswera busana n’emikolere yabo,
N’eribaha amalipizi busana n’ebyo bakakola.
10 Bakendisyalya, aliwe sibendisyughuta.
Bakendisyakola obumbalaka* bunene, aliwe sibendisyakanyirira,
Kundi mubatasikya Yehova n’ahake.
11 Obumbalaka,* edivai, n’edivai nyihya-nyihya
Bikalusaya omo mundu m’omutima w’erikola ebitunganene.*
12 Abandu baghe bakabulaya esyosanamu syabo sy’emiti sy’obusondoli
Bakakola ekyo mutso* wabo akabwirabo.
Kundi omutima w’obumbalaka* akabaheraya,
N’omw’ikola obumbalaka* bakaghana erikwama obusondoli bw’oMungu wabo.
13 Bakaherera amahere oko syosingyi sy’ebitwa.
Kandi bakatumbiraya omuki w’amahere oko hitwa,
Omo ndina sy’omuti w’omualoni n’omo ndina sy’omuti w’omulibini, n’omo ndina sy’obuli muti munene.
Kundi ekitsutsu kyayo kyuwene.
Ekyo kyo kikaleka abambesa baghu ibakola obumbalaka*
N’ekyo kyo kikaleka abalyana baghu ibakola obusingiri.
14 Sinendisyaha abambesa benyu b’amalipizi busana n’obumbalaka* bwabo.
Kandi sinendisyaha abalyana baghu b’amalipizi busana n’obusingiri bwabo.
Kundi abalume bakayihengeka n’abambalaka
N’eriherera amahere haghuma n’abambalaka b’omo hekalu;
Abandu abo abatawite obwenge bakendisyatsandibwa.
15 Israeli, n’omo unemukakola obumbalaka,
Isiwaleka Yuda akabya n’ekosa.
Isimwasa e Gilgali kutse e Bete-aveni,
Kandi isimwalapa muti, ‘Oko kwenene-kwenene ngoko Yehova aliho!’
16 Kundi Israeli abiribya n’erighundu ng’ende eyirimo erighundu.
Mukalengekanaya muti lino Yehova akendibateya ngoko omulisya akateghaya embangale yiwe nyilere eyiri omo mwanya wiwe w’erilisiryamo?*
17 Efraimu aboherwe oko syosanamu.
Mumuleke!
18 Bakabya babibugha obwabu bwabo,
Ibakola obumbalaka bunene.*
Abasondoli babo banzire kutsibu erihemuka.
19 Erihunga rikendisyaswika* Efraimu omo bipupa byaryo,
Kandi bakendisyakwira amahere wabo w’esisoni.”