Isaya
63 Oyu nindi oyukalua e Edomu,
Oyukalua e Bozra inianambite esyongyimba sy’erangyi eyihena-henirye,*
Oyumbite esyonyimba esikangabasenie,
Oyukaghenda n’amaka manene?
“N’ingye, Oyukabugha omo ritunganene,
Oyuwite obutoki bunene bw’erilamya.”
2 Busanaki esyongyimba syaghu ni sy’erangyi y’omusasi,
Kandi busanaki esyongyimba syaghu siri ng’esy’oyukakamira edivai omo kikamiro?
3 “Nabiriryatangira ekiringa ky’edivai ingyuwene.
Sihali n’omughuma omo bitunga by’abandu oyulue haghuma naghe.
Kandi mungalyatangirirabyo omw’ihitana lyaghe,
N’erihinolerabyo omw’ihitana ryaghe.
Omusasi wabo mwakayitsatsanga oko syongyimba syaghe,
Neryo mungakinaya esyongyimba syaghe syosi.
4 Kusangwa ekiro ky’erikisya kiri omo mutima waghe,
N’omwaka w’abakombolawa baghe abirihika.
5 Munatungerera, aliwe sihabya ow’eriniwatikya;
Munasweka hakabya isihali oyukabugha ati akaniwatikaya.
Neryo okuboko kwaghe mukwandetera omulamo,*
N’erihitana ryaghe iriryene-ryene muryaniwatikya.
6 Omw’ihitana lyaghe, munalyatangira ebitunga by’abandu,
Munatamiryabo omo buhitane bwaghe
N’eryuta omusasi wabo oko kitaka.”
7 Ngendyahula emibiiri ya Yehova y’olwanzo oluteleghula,
Emibiiri ya Yehova eyitolere eripipwa,
Busana n’ebyosi ebyo Yehova abiritukolera,
Emyatsi mingyi mibuya eyo abirikolera enyumba ya Israeli,
Erikwamana n’obughanyiri bwiwe n’olwanzo lwiwe lunene oluteleghula.
8 Kusangwa mwabugha ati: “Oko kwenene ni bandu baghe, abana b’obulume abatendisyaleghula n’ahake.”*
Neryo mwabya Mulamya wabo.
9 Omo malighe wabo wosi, naye mwaghalwa.
N’omukwenda* wiwe-wiwe mwalamyabo.
Omo lwanzo lwiwe n’omo bulighe bwiwe mwakombolabo,
Kandi mwasumbabo n’erihekabo omo biro byosi bya kera.
10 Aliwe mubayisamambula n’eriita ekirimu kiwe kibuyirire ky’obulighe.
Neryo mwabinduka amabya nzighu yabo,
Kandi mwalwa nabo.
11 Neryo mubibuka ebiro bya kera,
Omughulu w’omughombe wiwe ye Musa:
“Ali hayi Oyo walusayabo omo ngetse haghuma n’abalisya b’ekihangulo kiwe?
Oyo wamuhirako ekirimu kiwe kibuyirire ali hayi?
12 Oyo waleka okuboko kwiwe kw’olukengerwa kughende haghuma n’ebyala by’amali bya Musa,
Oyo waghaba amaghetse embere syabo eriyikolera erina lya kera na kera,
13 Oyo walabayabo omo bisunda binene-binene by’amaghetse,*
Neryo bamaghenda butsira eritwikala,
Ng’esabayiri eyikalaba omo bwerere?*
14 Ng’ebihangulo omughulu bikandaghalira omo musya,
Ekirimu kya Yehova mukyaluhukyabo.”
Ko wasondola abandu baghu bo utya,
Eriyikolera erina ry’olukengerwa.*
15 Ighune e lubula, usamalire eyikwa, ulangire
Ighune ah’eriikala haghu ah’olukengerwa* n’ahabuyirire.
Omuhwa waghu n’amaka waghu biri hayi,
Eriyitsutsa ly’obughanyiri bwaghu n’obulighe* bwaghu?
Byabiribiswa okw’ingye.
16 Kusangwa uli Tata wetu;
Nomo Abrahamu angabya isyatwasi
Kandi nomo Israeli angatendituminyerera,
Iwe, Yehova, uli Tata wetu.
Omutongolya wetu wa kera lyo rina ryaghu.
17 Yehova, busanaki ukatuleka tughanga-ghange* erilua omo syonzira syaghu?
Busanaki ukaleka emitima yetu iyakala* itutatoka erikubaha?
Usubule busana n’abaghombe baghu,
Ebihanda by’omwandu waghu.
18 Abandu baghu ababuyirire mubasighalyakyo omo mughulu muke buyira.
Esyonzighu syetu syabirilyatangirira ahabuyirire haghu.
19 Hamabilaba ebiro bingyi itwabiribya ng’abandu abo ute watatabalako,
Ng’abandu abate batabirikirwa omo rina lyaghu.