Ezekieli
11 Neryo ekirimu mukyanisumba kyamanitwala oko lukyo lw’oko luhande lw’eyo eryuba rikasira olw’enyumba ya Yehova, olukyo olulolere oko luhande lw’eyo eryuba rikasira. Eyo, oko bwingiriro bw’olukyo, munalangira abalume 25, n’omo kati-kati kabo mwabya Yaazania mughala wa Azuri na Pelatia mughala wa Benaya, abanya-mwami b’abandu. 2 Neryo mwambwira ati: “Mughala w’omundu, aba ba balume abakaya esyombita nyibi n’eriteka amahano mabi omo* muyi ono. 3 Banemubugha bati, ‘Eno si ye ndambi y’erihimba amanyumba kwehi? Omuyi* ye nyungu y’erihukamo,* netu, n’itwe siswi.’
4 “Neryo ubughe obuminyereri bw’ebikendibahikira. Mughala w’omundu ubughe obuminyereri.”
5 Neryo ekirimu kya Yehova mukyasa okw’ingye, naye mwanibwira ati: “Ubughe uti, ‘Yehova ati: “Inywe bana* ba Israeli, ekyo mwamabugha kyuwene, kandi nyinasi ebyo mukalengekanaya.* 6 Mwabiriitisya abandu bangyi omo muyi, kandi mwabiryusulya ebinda omo syonzira syagho.”’” 7 “Neryo Yehova Omukama Mukulu oko Bosi ati: ‘Ebinda ebyo mwabiritsatsanga ehosi-hosi omo muyi sye siswi, n’enyungu wo muyi. Aliwe inywe mukendisyalusibwa mugho.’”
8 “‘Mwabirisagha omuyali, naghe ngendileta omuyalii erilwa nenyu,’ Yehova Omukama Mukulu oko Bosi atya. 9 ‘Ngendisyabalusya mugho n’eribahira omo byala by’ab’ehandi, kandi ngendisyabasuyira. 10 Mukendisyawa omo muyali. Ngendisyabasuyirira oko mipaka ya Israeli. Mukendisyaminya ngoko indi Yehova. 11 Omuyii syendisyabya nyungu okw’inywe, nenyu simwendisyabya siswi mugho; ngendisyabasuyira oko mipaka ya Israeli, 12 nenyu mukendisyaminya ngoko indi Yehova. Kusangwa mumutakwama ebighenderwako byaghe kandi mumutakolesya ebyalayiro byaghe, aliwe mwabirikwama ebyalayiro by’ebihanda ebibatimbireko.’”
13 Nabere nabinabugha obuminyereri, ye Pelatia mughala wa Benaya mwahola. Neryo munawa oko kitaka namalaka omo mulenge muli niti: “Iyooo! Yehova Mukama Mukulu oko Bosi! Ukendibughaho emisighalira ya Israeli kwehi?”
14 Kandi ekinywa kya Yehova mukyanihikako kiti: 15 “Mughala w’omundu, abikalani be Yerusalema babiribwira abaghala benyu, abaghala benyu abawite ehamuli y’erikombola,* haghuma n’enyumba yosi ya Israeli bati, ‘Mubye hali oko Yehova. Ekihugho ni kyetu; twabirihabwakyo eribya kyetu.’ 16 Neryo ubughe uti, ‘Yehova Omukama Mukulu oko Bosi ati: “Nomo nanabiritwalabo hali omo bihanda n’eripanza-panzirabo omo bihugho, omo katambi kake ngendisyabya ahabuyirire busana nabo omo bihugho eyo babiriya.”’
17 “Neryo ubughe uti, ‘Yehova Omukama Mukulu oko Bosi ati: “Kandi ngendisyabakuma-kuma erilua omo bihanda n’omo bihugho ebyo mwabiripanza-panzirwamo, neryo ngendisyabaha ekihugho kya Israeli. 18 Nabo bakendisyasuba mukyo; bakendisyalusya mukyo mw’ebindu byakyo byosi ebikita nye n’emikolere eyikita nye. 19 Naghe ngendisyahira emitima yabo omo bughuma,* kandi ngendisyabahiramo ekirimu kihya-kihya; ngendisyalusya omutima w’eribwe omo mibiri yabo neryo inahabo omutima w’omubiri,* 20 batoke erikwama erihamula lyaghe n’erisikya ebyalayiro byaghe n’erikwamabyo. Neryo bakendisyabya bandu baghe, naghe ngendisyabya Mungu wabo.”’
21 “‘“Aliwe ab’emitima eyitanzire erileka erikwama ebindu byabo ebikita nye n’emikolere yabo eyikita nye, ngendisyaleta oko mitwe yabo kw’ebitsibu ebikaluira omo mikolere yabo,” Yehova Omukama Mukulu oko Bosi atya.’”
22 Abakerubi mubasumba ebipupa byabo. Ebiringo byabya hakuhi nabo, n’olukengerwa lw’oMungu wa Israeli lwabya endata kubo. 23 Neryo olukengerwa lwa Yehova mulweruka erilua omo muyi, mulwimana oko kitwa oko luhande lw’omuyi olw’eyo eryuba rikasira. 24 Neryo erilabira esyonzoli esikalua oko kirimu ky’oMungu, ekirimu mukyanisumba, kyamanitwala e Kaldea eyiri abandu abanyeghawa. Neryo esyonzoli esyo nalangira musyabulirana. 25 Naghe munatsuka erikanirya abandu abanyeghawa b’emyatsi eyo Yehova anikanganaya.