Isaya
44 “Neryo lino, iwe Yakobo, omughombe waghe, uhulikirire,
Naghu, iwe Israeli, oyo nabiriyisogha.
‘Sighubahe, iwe mughombe waghe Yakobo,
Naghu, Yesuruni,* oyo nabiriyisogha.
3 Kusangwa ngendisyutulira amaghetse oko yukwire enyota*
N’esyonyusi esikasenda oko kitaka ekyumire.
Ngendisyutulira oko bana* baghu kw’ekirimu kyaghe
N’emiyisa yaghe oko bitsikulu baghu.
4 Bakendisyakununuka ng’omo biti bibisi,
Ng’emiti y’emierebi oko misike y’ehyusi.
5 Omughuma akendisyabugha ati: “Indi wa Yehova.”
N’oghundi akendisyayahula omo rina lya Yakobo,
N’oghundi akendisyayihandikako oko byala biwe ati: “Niri wa Yehova.”
Kandi akendisyayiluka erina lya Israeli.’
6 Yehova, Omwami wa Israeli
N’Omutongolya wa Israeli, Yehova w’emilondo, ati:
‘Ingye w’erimbere kandi ingye w’enduli.
Sihali oMungu, ate ini na ngye.
7 Nindi yuli nga ngye?
Abirikire n’eribugha n’erinikanganiakyo!
Eritsuka omughulu nahanganaya ekihanda kya kera,
Babughe emyatsi eyikasa embere
N’emyatsi eyikisiya iyabya.
8 Simubahe,
Kandi isimwaghasama busana n’obuba.
Sinitabwira obuli mughuma w’okw’inywe embere sy’endambi n’eritulaghaniakyo kwehi?
Muli bimiri* baghe.
Hane oghundi Mungu ate in’ingye?
Iyehe, sihali olundi Lukuka; sinyasi n’olughuma.”
9 Abosi abakakokotaya esyosanamu esikabatsawa ni buyira,
N’ebindu byabo ebyo banzire kutsibu ebyo, sibendisyaleterabo ndundi.
Abimiri babo abo,* sibelangira kandi sibasiki,
Neryo abakakokotayasyo bakendisyahemulwa.
10 Nindi yo wangakokotya omungu kutse oyo wanganunia esanamu*
Esitawite ndundi?
11 Lebaya! Abalikyabo bosi bakendisyahemulwa!
Abafundi nabo ni bandu buyira.
Abosi bahindane haghuma n’erihangana.
Bakendititimana n’erihemulwa haghuma.
12 Omuhesi akakolesaya amakala akahesa ekyuma omo kyamano* kiwe.
Akakokotayakyo omo nyondo,
Iniahesakyo omo kuboko kwiwe kw’amaka.
Neryo akakwa enzala n’akaghala kiwe ikahwa;
Syalinywa amaghetse neryo akaluha.
13 Omubatsi w’omuti akakakaya omuliki w’eripimamo akadesa kuyo kw’edese omo tsaki y’erangyi y’omusasi.
Akabatsayo omo mbatso n’erihira kuyo kw’ekiminyiakalo omo kindu ekikadesa ekiringo.*
14 Oghundi, omubiiri wiwe ni konda emierezi.
Akasombola omuhanda mulebe w’omuti, omualoni,
Akakotayagho omo kati-kati k’emiti y’omo musitu.
Akahera omuti w’omulaurusi* n’embula iyakulyagho.
15 Neryo omuti oyo akabya ngwi sy’eryakyamo omuliro.
Omundu akimaya kusyo inyota;
Akakaya omuliro inyahuka akalyo.*
Aliwe kandi akayikokoteraya omungu n’erimuramya.
Akakokotayamo esanamu y’erabatsa neryo inyaramyayo.
16 Akakaya omuliro omo nusu y’omuti oyo;
Omo nusu eyo akokayako enyama eyo akendirya inyughuta.
Kandi akota n’eribugha ati:
“Ehee! Namahuha ngalangira omuliro.”
17 Aliwe omo muti owalyasaka akakokotayamo omungu,
Akayikokoteraya mugho mw’esanamu eyibatsire.
Akunamirayo n’eriramyayo.
Akasaba n’eribwirayo ati:
“Unilamaye, kusangwa uli mungu waghe.”
18 Sibasiki, sibalilengekanaya,
Kusangwa ameso wabo alibene poli-poli neryo syangalangira,
N’emitima yabo siyirimo amenge.
19 Sihali oyukaghaniraya omo mutima wiwe
Kutse oyuwite amenge kutse oyuwite obulengekania, oyukabugha ati:
“Ekitswe kyagho mungakaya mukyo mo omuliro
N’amakala wagho mungahuka kugho kw’akalyo* n’eryokyako enyama y’erirya.
Neryo omuti owalyasaka, nikokotaye mugho mw’ekindu ky’esyonye?
Ninatolere inaramya ekihande ky’omuti?*
20 Akalya eribu.
Omutima wiwe owabiritebwa abirimukitya oko nzira.
Syangatoka eriyilamya,* kutse eribugha ati:
“Omo byala byaghe by’amali simuli amabehi?
21 “Iwe Yakobo, naghu iwe Israeli, wibuke emyatsi eyi
Kusangwa uli mughombe waghe.
Munakuhangyika, naghu uli mughombe waghe.
Iwe Israeli, sinendisyakwibirirwa.
22 Ngendisangula ebibi byaghu ng’omo kitu
N’amalolo waghu ng’omo kitu kinene.
Usube okw’ingye, kusangwa ngendikukombola.
23 Mwute obwagho bw’obutseme inywe lubula,
Kusangwa Yehova abirikola omwatsi!
Musumbe emilenge y’erikinda inywe mitobero y’ekihugo!
Mwute obwogho bw’obutseme inywe bitwa,
Iwe musitu, n’enyu, inywe miti yosi!
Kusangwa Yehova abirikombola Yakobo,
Kandi akakanganaya Israeli y’olukengerwa lwiwe.”
24 Yehova Omutongolya waghu,
Oyo wakubumba ighukine omo nda, ati:
“Indi Yehova, oyo wahangyika obuli kindu.
Munasanza ekyanya ingyuwene,
Munasanza n’ekihugho.
Nindi yo wabya haghuma naghe?
25 Ngaleka ebiminyikalo by’abaminyereri b’amabehi* ibyataluka,
Kandi n’ingye ngaleka abalaghuli ibayiwata ng’abakiru,
Oyukaliba-libanaya ab’amenge
N’eribindula amenge wabo mo bukiru;
26 Oyukaleka ekinywa ky’omughombe wiwe ikyabererera
N’eriberererya ndeke-ndeke ebyo abatumwa biwe bakaminyerera;
Oyukabugha oko Yerusalema ati, ‘Ikendisyikalwamo,’
N’oko miyi ye Yuda ati, ‘Ikendisyasyahimbwa,
Kandi ngendisyasubya ebisambukalirya byayo’;
27 Oyukabwira emitobero y’amaghetse ati, ‘Mume.
Kandi ngendisyumya esyonyusi syaghu syosi’;
28 Oyukabugha oko Koreshi ati, ‘Ni mulisya waghe,
Naye akendisyaberererya erisonda lyaghe lyosi’;
Oyukabugha oko Yerusalema ati, ‘Ikendisyasyahimbwa,’
N’oko hekalu ati, ‘Efondasyo yaghu ikendisyahimbwa.’”