Ezekieli
25 Kandi ekinywa kya Yehova mukyanihikako kiti: 2 “Mughala w’omundu, ubinduke uloleraye obusu bwaghu eyiri Abaamoni. Neryo ubughe omo buminyereri ebikendisyabahikira. 3 Ubwire Abaamoni uti, ‘Muhulikirire ekinywa kya Yehova. Yehova Omukama Mukulu oko Bosi ati: “Kusangwa mumwabugha muti, ‘Si h’aho!’ oko habuyirire haghe omughulu hatsandibawa, n’oko kihugho ky’Abaisraeli omughulu kyayirawa mo matongo, n’oko kihanda kya Yuda omughulu baya omo bunyewa, 4 eryo ngabahira omo byala by’abandu b’oko luhande lw’eyo eryuba rikasira, mubye bindu byabo. Bakendihimba esyokambi* syabo ewaghu n’erihangania amahema wabo ewaghu. Bakendirya amatunda wenyu n’erinywa amaziwa wenyu. 5 Ngendiyira e Raba mo lulisiryo lw’esyongamia, n’ekihugho ky’Abaamoni mo mwanya ogho ebihangulo bikaluhukiramo; nenyu mukendiminya ngoko indi Yehova.”’”
6 “Kusangwa Yehova Omukama Mukulu oko Bosi ati: ‘Kundi mumwabanda oko byala n’eribuya ebikindo omo butseme, kandi kundi mumwayitsangura* omo kaghonero kanene busana n’ekyahikira ekihugho ky’Abaisraeli, 7 busana n’ekyo ngendisumba ebyala byaghe eribasuyira, inabahira omo byala by’ebihanda eribya kindu ky’erinyegha. Ngendibabughaho erilua omo kati-kati k’ebihanda n’eribatoghotya erilua omo bihugho. Ngendibahwerekererya, nenyu mukendiminya ngoko indi Yehova.’
8 “Yehova Omukama Mukulu oko Bosi ati: ‘Kundi Moabu na Seiri babiribugha bati, “Mulebaye! Ekihanda kya Yuda ko kine ng’ebindi bihanda,” 9 ngabisula amalambo* we Moabu oko miyi yayo y’oko mipaka, obubuya* bw’ekihugho kiwe, Bete-yashimoti, Baali-meoni, erihika e Kiriataimu. 10 E Moabu haghuma n’Abaamoni ngendihabo abandu b’oko luhande lw’Eyo eryuba rikasira eribya bindu byabo, neryo Abaamoni sibendisyasyibukwa omo bihanda. 11 Ngendisuyira e Moabu, nabo bakendiminya ngoko indi Yehova.’
12 “Yehova Omukama Mukulu oko Bosi ati: ‘E Edomu yabiriyikisirya oko kihanda kya Yuda kandi babiribyako olubanza* lunene busana n’eriyikisirya kubo; 13 neryo Yehova Omukama Mukulu oko Bosi ati: “Kandi ngendisumba ebyala byaghe erisuyira Edomu n’eribugha muyo mw’abandu n’esyonyama; ngendiyirayo mo kima. Eritsuka e Tema erihika e Dedani abosi bakendikwa omo muyali. 14 ‘Ngendikolesya ebyala by’abandu baghe e Israeli eriyikisirya oko Edomu. Bakendileta erihitana lyaghe n’erikarama lyaghe oko Edomu, neryo e Edomu iyayilangirira erihitana lyaghe,’ Yehova, Omkama Mukulu oko Bosi atya.”’
15 “Yehova Omukama Mukulu oko Bosi ati: ‘Busana n’obuyighu bwabo obukalire obo bakalola embere erikangania, Abafilistini babirisonda omo butsibu* erikisya n’eriherya. 16 Neryo Yehova Omukama Mukulu oko Bosi ati: “Eryo ngasumba ebyala byaghe erilwa n’Abafilistini, kandi ngendibughaho Abakereti n’eriherya abikalani b’oko musike w’engetse abakendisighalira. 17 Ngendiyikisirya kubo erikalire n’erisuyirabo kutsibu, nabo bakendiminya ngoko indi Yehova omughulu ngendileta kubo kw’erikisya lyaghe.”’”