Zekaria
14 “Hulikirira! Ekiro kinemwasa, ni kiro kya Yehova. Ekiro ekyo, bakendisyaghabira ewaghu* ebindu ebyo balyakupurako. 2 Ngendisyahindania ebihanda byosi bitoke erilwa na Yerusalema; omuyi oyo akendisyahambwa, ebindu ebiri omo manyumba bikendisyapurwa, kandi bakendisyaghotsera n’abakali kinyanganga. Enusu y’abandu b’omo muyi ikendisyaya omo bunyewa, aliwe abandu abakendisyasighalira sibendisyalusibwa omo muyi.
3 “Yehova akendisyahuluka n’erilwa n’ebihanda ebyo ng’omughulu akalwa ekiro ky’amalwa. 4 Ekiro ekyo, ebisando biwe bikendisyimana oko Kitwa ky’Emizeituni, ekisamalirene ne Yerusalema oko luhande lw’eyo ryuba rikasira. N’Ekitwa ky’Emizeituni kikendisyayighaba mo bihande bibiri, eritsuka oko luhande lw’eyo ryuba rikasira erihika oko luhande lw’eyo ryuba rikalengera. Neryo hakendisyabya omusya munene. Enusu nguma y’ekitwa ikendisyalolera oko luhande lw’endata, n’eyindi nusu oko luhande lw’eyikwa. 5 Mukendisyatibitira omo musya owali omo kati-kati k’ebitwa byaghe, kundi omusya oyo owali omo kati-kati k’ebitwa akendisyayahika e Azeli. Kikendisyatolera imwatibita ngoko mwatibita busana n’omusiki owalaba oko mughulu w’omwami Uzia we Yuda. Na Yehova oMungu waghe akendisyasa, n’ababuyirire bosi bakendisyabya haghuma naye.
6 “Ekiro ekyo, sihendisyabya ekyakakala ky’omughaso; ebindu bikendisyafungana.* 7 N’ekiro ekyo kikendisyabya kiro ekite ng’ebindi. Kikendisyaminyikala mo kiro kya Yehova. Sibwendisyabya ritungyi kutse kiro; n’omwigholo-gholo, hakendisyabya ihane ekyakakala. 8 Ekiro ekyo, amaghetse w’engebe akendisyalua e Yerusalema, enusu y’amaghetse ayo ikendisyasendera omo ngetse eyiri oko luhande lw’eyo ryuba rikasira,* n’eyindi nusu y’amaghetse ayo ikendisyasendera omo ngetse eyiri oko luhande lw’eyo ryuba rikalengera.* Ebyo bikendisyabya oko mughulu w’ekipwa* n’oko mughulu w’embeho nene. 9 Na Yehova akendisyabya Mwami w’ekihugho kyosi. Ekiro ekyo, Yehova akendisyabya mughuma, n’erina riwe rikendisyabya righuma.
10 “Ekihugho kyosi kikendisyabya nge Araba, erilua e Geba eriyahika e Rimoni, oko luhande lw’eyikwa lwe Yerusalema. Yerusalema akendisyahangana omo mwanya wiwe n’erikalwamo, erilua oko Lukyo lwa Benyamini eriyahika ahali Olukyo lw’Erimbere, eriyahika oko Lukyo lw’Engonde,* n’erilua oko Kaleberyo ka Hananeli eriyahika oko bikamiro by’edivai by’omwami. 11 Abandu bakendisyikala e Yerusalema. Yerusalema syendisyasyabya kindu ekitolere eritsandibwa, n’abandu bakendisyikalamo buholo.
12 “Kino ky’ekihunzo ekyo Yehova akendisyaletera abandu bosi abakalwa na Yerusalema: Omubiri wabo akendisyahonda ibanimanire oko maghulu wabo, ameso wabo akendisyahondera omo bikulo byagho, n’olulimi lwabo lukendisyahondera omo buno bwabo.
13 “Ekiro ekyo, Yehova akendisyaleka ibahandabuka; neryo obuli mughuma wa kubo akendisyamakirira ebyala by’omulikyabo, n’omundu akendisyalwa n’omulikyabo.* 14 Yuda naye akendisyalwa oko malwa we Yerusalema; n’obuteke bw’ebihanda byosi ebiri hakuhi bukendisyakumwa-kumwa, ni bugha ambu, ehoro nene, efeza* nene, n’esyongyimba nene.
15 “Kandi ekihunzo ekiri ng’ekyo kikendisyahikira esyosabayiri,* esyonyumbu, esyongamia, esyopunda, n’esyonyama syosi esikendisyabya omo syokambi sy’esyonzighu.
16 “Oko buli mwaka, abosi abakendisyasighalira omo bihanda byosi ebyasyalwa na Yerusalema bakendisyabya bakahetuka bakayakukamira* Omwami, Yehova w’emilondo, n’erikola Ekiro Kikulu ky’Ebibanda.* 17 Aliwe omundu w’omo bihanda ebiri oko kihugho amaghana erisyahetukira e Yerusalema akayakukamira Omwami, Yehova w’emilondo, embula isiyendisyamuwako. 18 N’abandu be Misri bamaghana erisyahetuka n’erighana eringira omo muyi, isibendisyalola oko mbula. Omo mwanya w’ekyo, iniakendisyahikirwa n’ekihunzo ekyo Yehova akendisyaletera ebihanda ebiteruka bikayakola Ekiro Kikulu ky’Ebibanda.* 19 Ayo w’akendisyabya malipizi agho Misri akendisyahabwa busana n’erilolo riwe, kandi agho bihanda byosi ebiteruka bikayakola Ekiro Kikulu ky’Ebibanda* bikendisyahabwa busana n’erilolo ryabyo.
20 “Ekiro ekyo, ebinywa ‘Obubuyirire ni bwa Yehova!’ bikendisyahandikwa oko hikengele ehiri oko syosabayiri.* Esyonyungu* esiri omo hekalu ya Yehova sikendisyabya ng’ebibakuli* ebiri embere sy’ekiherero. 21 Obuli nyungu* eyiri e Yerusalema ne Yuda ikendisyabya nyibuyirire, kandi ikendisyabya ya Yehova w’emilondo. N’abandu bosi abakendisyaherera amahere bakendisyingira n’erikolesya esyonyungu nyilebe busana n’erihuka musyo mw’amahere. Ekiro ekyo, sihendisyasyabya Omukanana* omo hekalu ya Yehova w’emilondo.”