Emighanzo
13 Neryo Yehova mwabwira Musa ati: 2 “Utume abalume omo kihugho kye Kanana, ekyo ngendiha Abaisraeli. Bayalebaye nga kiri kiti. Ukendimya omo buli kihanda mo mulume mughuma-mughuma. Obuli mughuma wa kubo, ritolere iniabya mukulu w’omo kihanda ekyo.”
3 Neryo Musa mwatumabo erilua omo mbwarara ye Parani, ngoko Yehova anamubwira. Abalume bosi abo babya bakulu b’omo Baisraeli. 4 Amena wabo w’ano: Omo kihanda kya Rubeni, Shamua, mughala wa Zakuri; 5 omo kihanda kya Simeoni, Shafati, mughala wa Hori; 6 omo kihanda kya Yuda, Kalebu, mughala wa Yefune; 7 omo kihanda kya Isakari, Igali, mughala wa Yozefu; 8 omo kihanda kya Efraimu, Hoshea, mughala wa Nuni; 9 omo kihanda kya Benyamini, Palti, mughala wa Rafu; 10 omo kihanda kya Zabuloni, Gadieli, mughala wa Sodi; 11 omo kihanda kya Yozefu, erilua omo kihanda kya Manase, Gadi, mughala wa Susi; 12 omo kihanda kya Dani, Amieli, mughala wa Gemali; 13 omo kihanda kya Asheri, Seturi, mughala wa Mikaeli; 14 omo kihanda kya Naftali, Nabi, mughala wa Vosi; 15 omo kihanda kya Gadi, Geueli, mughala wa Maki. 16 Ayo w’amena w’abalume abo Musa atuma eriyalebya ekihugho nga kiri kiti. Musa mwaha Hoshea, mughala wa Nuni, erina rya Yosua.*
17 Omughulu Musa atuma abalume abo eriyalebya ekihugho kye Kanana nga kiri kiti, mwababwira ati: “Mwerukire e Negebu, n’enyuma sy’aho mukendyerukira omo kiharo ky’ebitwa. 18 Mulebaye ekihugho ekyo nga kiri kiti. Mulebaye n’abandu b’omo kihugho ekyo nga bali n’akaghala kutse iyehe, nga ni banene kutse nga ni bake. 19 Mulebaye ekihugho ekyo nga kyuwene, kutse iyehe. Mulebaye n’emiyi yayo nga kyolobire eringira muyo, kutse iyehe. 20 Kandi mulebaye ekihugho ekyo nga kirimo embolewa,* kutse iyehe,* nga kirimo emiti, kutse iyehe. Mubye n’obutubaha, kandi mukendileta oko matunda w’omo kihugho ekyo.” Mwatumabo omughulu emizabibu y’ekwanza-kwanza yikera.
21 Neryo mubiruka, bamayalebya ekihugho ekyo nga kiri kiti, eritsuka omo mbwarara ye Zini erihika e Rehobu, hakuhi ne Lebo-hamati.* 22 Omughulu berukira e Negebu, mubahika e Hebroni, eyo Ahimani, Sesai, Talmai, n’Abaanaki babya bikere. Omuyi we Hebroni mwahimbwa embere omuyi we Zoani, owali omo Misri, ahimbawe. 23 Babere babihika omo Musya* we Eshkoli, mubatwa omutahi w’omuti w’omuzabibu owaliko emizabibu. Abalume babiri mubaheka omutahi oyo oko muti. Mubatwa n’amakomamanga n’esyotini. 24 Mubahula omwanya oyo mo Eshkoli,* kundi Abaisraeli mubatwaho emizabibu.
25 Mubabya babibugha ebiro 40, mubalua omo kihugho ekyo bayalebaya. 26 Neryo mubasuba eyiri Musa, Haruni, n’Abaisraeli bosi omo mbwarara ye Parani, e Kadeshi. Mubakaniriabo ebyo balyalolako, bamabakangania n’amatunda agho balyalusaya omo kihugho ekyo. 27 Mubabwira Musa bati: “Mutukingira omo kihugho ekyo ulyatutumamo. Oko kwenene, kikasendamo amasabu n’obuki, n’amatunda awalyalua mukyo w’ano. 28 Aliwe abandu bayo bali n’akaghala, n’omundu syangingira omo miyi yabo mo bweghu-bweghu kandi ni miyi minene-minene. Mutukalangirayo n’Abaanakimu. 29 Abaamaleki bikere omo kihugho kye Negebu; Abahiti, Abayebusi, Abaamori bikere omo kiharo ky’ebitwa, n’Abakanana bikere hakuhi n’engetse, oko musike we Yordani.”
30 Neryo Kalebu mwasonda eritulerya abandu ababya bimene embere sya Musa omwibugha ati: “Tulw’itwayayo, tukendimya ekihugho ekyo butsir’itika-tika. Eribugha ekwenene, tukendimyakyo.” 31 Aliwe abalume abaghenda naye mubabugha bati: “Sitwangatoka erilwa n’abandu abo, bakalire kutulenga.” 32 Mubataleka eribugha ebinywa ebyabuna Abaisraeli b’omutima oko kihugho ekyo bayalebaya. Mubabya bakabugha bati: “Ekihugho ekyo tulyalabamo tukalebya nga kiri kiti kikatomera abakalani ba mukyo, kandi abandu bosi abo tulyalangira mukyo ni bali-bali kutsibu. 33 Kandi mutukalangirayo Abanefili, abaghala ba Anaki, abitsikulu b’Abanefili. Embere syabo, mutukayilangira ng’emisyenene, nabo ko balyatulangira batya.”