Ezekieli
7 Kandi ekinywa kya Yehova mukyanihikako kiti: 2 “Naghu, iwe mughala w’omundu, Yehova Omukama Mukulu oko Bosi akabwira ekihugho kya Israeli ati: ‘Enduli! Enduli yabirihika oko syongonde ini sy’ekihugho. 3 Lino enduli yamabikuhikira, naghe ngendikutulirako erihitana lyaghe, ngendikutswera erikwamana n’esyonzira syaghu n’erikutondesya erikwamana n’emibiiri yaghu eyikita nye. 4 Eriso lyaghe siryendikukwira obulighe; kandi sinendikughanyira, kusangwa ngendikuletako ebikaluira omo mighendere yaghu, kandi ukendyaghalwa omo bikaluira omo mikolere yaghu eyikita nye. Naghu ukendiminya ngoko indi Yehova.’
5 “Yehova Omukama Mukulu oko Bosi ati: ‘Lebaya! Obuhanya, obuhanya bw’embaghane bunemwasa. 6 Enduli inemwasa, enduli ikendyasa, ikendikubukirako.* Lebaya! Yinemwasa. 7 Iwe wikere omo kihugho, naghu olwaghu* lwahikire. Endambi inemwasa, ekiro kiri hakuhi. Oko bitwa kuli eribulungana sikuli eryuta obwogho bw’obutseme.
8 Hano sesene, ngendikutulirako erihitana lyaghe n’erikutulirako ndeke-ndeke erikapikira lyaghe, kandi ngendikutswera erikwamana n’emighendere yaghu, n’erikutondesya busana n’emikolere yaghu yosi eyikita nye. 9 Eriso lyaghe siryendikukwira obulighe; kandi sinendikughanyira, kusangwa ngendikuletako ebikaluira omo mighendere yaghu, kandi ukendyaghalwa omo bikaluira omo mikolere yaghu eyikita nye. Naghu ukendiminya ngoko ingye, ingye Yehova, n’ingye ngakuhunza.
10 “‘Lebaya! Ekiro kinemwasa. Olwaghu* lwahikire, omutso abirisoya, n’eriyilabirirya lyabirilasa. 11 Obukatsu bwabirikula n’eribya mutso w’obubi. Ibo sibendisyabala, kutse obuteke bwabo, kutse ebikumula byabo, kutse erikumayira lyabo. 12 Endambi ikendyasa, ekiro kikendihika. Oyukaghula syatseme, n’oyukaghulaya isyalira, kusangwa hali erihitana oko kikumula* kyabo kyosi. 13 Kusangwa oyukaghulaya syendisyasubira ekyaghulibawa, engebe yiwe nomo yangabala. Kusangwa esyonzoli silebirye ekikumula kyosi. Sihali oyukendisubula, na busana n’ekibi kiwe,* sihali oyukendibalya engebe yiwe.
14 “‘Babiribuha engubi, n’obuli mundu anayiteghekire, aliwe sihali oyukaghenda oko malwa, kusangwa erihitana ryaghe liri oko kikumula kyosi. 15 Omuyali ali ehihya, n’ekihunzo n’enzala biri omo muyi. Owosi-wosi oyuli emoli akendihola omo muyali, n’ekihunzo n’enzala bikendibugha abali omo muyi. 16 Abakendisaka kubo, abakenditoka eribala, bakendiya oko bitwa; kandi ng’ehilikuku hy’omo misya, obuli mundu akendilira busana n’ekibi kiwe. 17 Ebyala byabo byosi bikendinoghokala, n’amarwi wabo wosi akendisononokamo amaghetse.* 18 Babiryambala esyongyimba sy’esaki,* n’erikukubala ryabirihambabo.* Obuli mundu akendihemulwa, n’obuli mutwe akendibya luhala.*
19 “‘Bakendighusa efeza* yabo omo syonzira sy’omuyi, n’ehoro yabo ikendibya kindu ekikitabo nye. Efeza yabo kutse ehoro yabo sibyenditoka erilamyabo oko kiro ky’erihitana lya Yehova. Sibendyughuta* kutse eryusulya esyonda syabyo, kusangwa yabiribya ndwikale* eyikaleka ibakola ebibi. 20 Mubayiheka busana n’obubuya bw’amapambo wabo, kandi mubakokotya mugho* mw’ebindu byabo ebikita nye, esyosanamu syabo esikita nye. Busana n’ekyo, ngendiyirakyo mo kindu ekikitabo nye. 21 Ngendihirakyo* omo byala by’ab’ehandi banyeghekyo, n’erihakyo ababi b’oko kihugho mo kindu ky’erinyegha. Nabo bakenditsandyakyo.
22 “‘Ngendibisabo obusu bwaghe, nabo bakenditsandya ahabisamire* haghe. N’abarahi bakendingiraho n’eritsandyaho.
23 “‘Ukokotaye omunyororo,* kusangwa ekihugho kyoswiremo eritswera eririmo omusasi, n’omuyi oswiremo obwiti. 24 Ngendileta abihanda bibi kutsibu, nabyo bikendimya amanyumba wabo. Kandi ngendibughaho eriyiheka ly’ab’amaka, n’emyanya yabo eyibuyirire ikenditsandibwa. 25 Omughulu amaghali wabo akendihika, bakendisondekania obuholo, nikwa sibwendibanika. 26 Obuhanya bukendihika obundi oko bundi, n’engulu oko yindi. Abandu bakendisondekania esyonzoli oko muminyereri, nikwa omuhereri akendibula omughambo,* n’abasyakulu bakendibula amahano.* 27 Omwami akendilira, n’omukulu akendyambala erihandabuka, n’ebyala by’abandu abali omo kihugho bikendititimana busana n’obuba. Ngendikolerabo erikwamana n’esyonzira syabo n’eritswerabo ngoko babiritswera. Nabo bakendiminya ngoko indi Yehova.’”