Esyonyimbo
91 Oyo wikere omo mwanya owabiseme owo w’Endata Kutsibu
Akendisyikala omo kitsutsu ky’Omutoki w’Ebyosi.
2 Ngendisyabwira Yehova niti: “Uli busayiro bwaghe n’ahakongotere haghe,
Mungu waghe oyo niyiketere.”
3 Kusangwa akendisyakulamya oko kitegho ky’omuteyi w’esyonyunyu,
N’oko kihunzo ekikita.
4 Akendisyakuswika* omo bipupa biwe,
Naghu ukendisyasaghira omo bipupa biwe.
Obutaleghula bwiwe bukendisyabya ngabo nene n’oluhimbo olukateghaya.
5 Siwendisyubaha emyatsi eyikubahaya omo kiro,
Kutse omusoha* owakalahuka omw’itungyi,
6 Kutse siwendisyubaha ekihunzo ekikayitsatsanga omo mwirimya
Kutse eriherya erikalire ery’omw’itungyi lyape.
7 Abandu 1 000 bakendisyawa aho lutambi okw’iwe
N’abandu 10 000 bakendisyawa oko luhande lwaghu lw’amali,
Aliwe iwe sihali obuhanya obukendisyakuhikira.
8 Ukendisyalangirakyo lisa omo meso waghu
Ukayilangirira ababi bakasuyirwa.*
9 Kusangwa muwabugha uti: “Yehova ni busayiro bwaghe,”
Muwayira Ow’endata Kutsibu mo bwikalo* bwaghu;
10 Sihali obuhanya obukendisyakuhikira,
Kandi sihali ekihunzo ekikendisyahika hakuhi n’ehema yaghu.
11 Kusangwa akendisyalayira abamalaika biwe busana naghu erikuteya,
Bakuteghaya omo syonzira syaghu syosi.
12 Bakendisyakuheka omo byala byabo;
Ukasyahinda ekisando kyaghu ky’oko ribwe.
13 Ukendisyalyatira omusuko w’endale* n’enzwira;*
Ukendisyalyatira endale eyiriko ebyeya omo bikya n’oluyoka lunene.
14 OMungu abiribugha ati: “Ngendimulamya, kusangwa anyanzire* kutsibu.
Ngendimuteya kusangwa anasi* erina lyaghe.
15 Akendisyanilakira, naghe ngendisyamusubirya.
Ngendisyabya naye omughulu w’obulighe.
Ngendisyamulamya n’erimuha olukengerwa.
16 Ngendisyamughutya engebe nyiri,
Kandi ngendisyaleka inialangira emibiiri yaghe y’erilamya.”*