Isaya

64 Ngambe ulyatula olubula neryo iwandaghala,

Neryo ebitwa ibyasukana busana naghu,

 2 Ng’omughulu omuliro akakaya ehisali-sali,*

N’omuliro owakaberaya amaghetse,

Neryo erina lyaghu irikendiminyikalibwa oko syonzighu syaghu,

N’ebihanda ibyatitimana embere syaghu!

 3 Omughulu wakola emyatsi eyikubahaya eyo tutabya tuyitsulirye,

Muwandaghala, n’ebitwa mubyatitimana embere syaghu.

 4 Eritsuka kera, sihali oyo wabiryowa kutse eritegha okutu,

Kutse sihali oyo wabirilangira oghundi Mungu ate ini na we,

Oyukawatikaya abakamulindirira.*

 5 Wabirihindana n’abakatsema erikola ekitunganene ibanatsemire,

Abakakwibuka n’erikwama esyonzira syaghu.

Lebaya! Muwahitana omughulu twayitsinga erikola ebibi,

Mutwakolabyo omo mughulu muli,

Neryo lino tulamibawe?

 6 Kandi itwe bosi twabiribya ng’omundu oyuterire,

Emibiiri yetu yosi y’eritunganene yabiribya ng’olukimba lw’omughesera.*

Itwe bosi tukendyuma ng’ekiti,

N’amalolo wetu akendisyatuheka ng’erihunga.

 7 Sihali oyukalakira erina lyaghu,

Sihali oyukayibukaya erikuhambirirako,

Kusangwa wabiritubisa obusu bwaghu,

Kandi ukaleka tuhwererekerere* busana* n’erilolo lyetu.

Itwe tuli ribumba, naghu uli Mubumbi* wetu;

Itwe bosi tuli mubiiri w’ebyala byaghu.

 9 Yehova, isiwahitana kutsibu,

Isiwibuka amalolo wetu erihika kera na kera.

10 Emiyi yaghu eyibuyirire yabiribya mbwarara,

E Sioni yabiribya mbwarara,

E Yerusalema yabiribya matongo.

11 Enyumba* yetu y’obubuyirire n’ey’olukengerwa*

Aho abotata-kulu wetu babya bakakupipira,

Yabirihisibwa omo muliro,

N’ebindu byetu by’obughuli byabiritsanda.