Yosua

24 Neryo Yosua mwahindania ebihanda byosi bya Isareli byo haghuma e Shekemu n’eribirikira abasyakulu be Isareli, abasondoli babo, abatsweri babo, n’abakulu babo. Nabo mubimana embere sy’oMungu w’ekwenene. 2 Yosua mwabwira abandu bosi ati: “Bino byo Yehova oMungu wa Israeli akabugha, ‘Oko mighulu ya kera, obotata-kulu wenyu babya bikere oko ghundi musirya w’Olusi,* Tera baba wa Abrahamu na baba wa Nahori. Kandi ibakakolera eyindi miungu.

3 “‘Enyuma sy’omughulu mulebe, munaleta tata-kulu wenyu ye Abrahamu erilua oko ghundi musirya w’Olusi,* namamulenderya omo kihghuo kyosi kye Kanana n’erikanyirirya olubuto lwiwe. Munamuha Isaka. 4 Na Isaka munamuha Yakobo na Esau. Enyuma sy’aho, munaha Esau y’Ekitwa kye Seiri mo mwandu wiwe. Na Yakobo n’abaghala biwe mubaya e Misri. 5 Enyuma sy’aho, munatuma Musa na Haruni, kandi munahunza e Misri omo byosi ebyo nakola omo kati-kati kabo. Neryo munabalusyayo. 6 Abotata wenyu babere bahika oko ngetse ngabalusya e Misri, Abamisri mubakwamirirabo n’esyongurubani* sy’amalwa n’abandu abakaghenda oko syosabayiri erihika oko Ngetse y’Engula. 7 Neryo abotata wenyu mubatsuka erinilakira ingye Yehova. Neryo munahiraho omwirimya omo kati-kati kenyu n’Abamisri; kandi munaleta engetse okw’ibo, yamakuningirabo. Ameso wenyu mwayilangirira ekyo nakola e Misri. Neryo mumwikala omo mbwarara omo myaka* mingyi.

8 “‘Munabaleta omo kihugho ky’Abaamori ababya bikere oko ghundi musirya* we Yordani. Nabo mubalwa nenyu, aliwe munahirabo omo byala byenyu mutoke eriimya ekihugho kyabo mo mwandu. Kandi munahwerekereryabo embere syenyu. 9 Neryo Balaki mughala wa Zipori omwami we Moabu mwahangana amalwa na Israeli. Neryo mwabirikira Balamu omughala wa Beori ati ase abatakire. 10 Aliwe mundahulikirira Balamu. Neryo mwabya akabatsumula. Kandi munabalamya oko byala biwe.

11 “‘Enyuma sy’aho, mumwasoka e Yordani mwamahika e Yeriko. Abakulu* be Yeriko, Abaamori, Abaperizi, Abakanana, Abahiti, Abagirgashi, Abahivi, n’Abayebusi mubalwa n’enyu, nikwa munahirabo omo byala byenu. 12 Neryo munatuma eriyibulamo omutima* embere syenyu. N’eriyibulamo omutima eryo, muryaleka ibatibita bakabasagha, n’abami babiri b’Abaamori. Ekyo sikyabya busana n’omuyali wenyu kutse busana n’obuta* bwenyu. 13 Neryo ko nabaha nitya ekihugho ekyo mutaluhira n’emiyi eyo mutahimba, nenyu mumwikala muyo. Munemulya oko mizabibu n’emizeituni eyo mutahera.’

14 “Neryo okw’ekyo, mubahe Yehova kandi mumukolere n’omutima owaluyirirene* kandi omo butaleghula.* Kandi muyilusayeko emiungu eyo abotata-kulu wenyu babya bakakolera oko ghundi musirya w’Olusi* ne Misri, neryo mukolere Yehova. 15 Neryo lino mwamalangira isikyuwene okw’inywe erikolera Yehova, munabwire inywibene-bene musombole nga nindi yo mukendikolera. Nga mukendikolera emiungu eyo abotata-kulu wenyu babya bakakolera oko ghundi musirya w’Olusi* kutse emiungu y’Abaamori abo mwikere omo kihugho kyabo; nikwa ingye n’enyumba yaghe tukendikolera Yehova.”

16 Neryo abandu mubasubirya bati: “Kibye hali okw’itwe erisighania Yehova n’erikolera eyindi miungu. 17 Yehova oMungu wetu yo watulusaya omo kihugho kye Misri, itwe n’abotata wetu, erilua omo nyumba y’obukobe n’erikola emyatsi yosi eyi y’eriswekera omo meso wetu; kandi yo watuteghaya omo lughendo losi olo twaghenda n’erituteya oko bihanda byosi by’eyo twalaba. 18 Yehova mwahigha ebihanda byosi ebyabya bikere omo kihugho embere syetu, erihirako n’Abaamori. Busana n’ekyo, netu tukendikolera Yehova kusangwa ni Mungu wetu.”

19 Neryo Yosua mwabwira abandu ati: “Simwangatoka erikolera Yehova, kusangwa ni Mungu oyubuyirire. Iye ni Mungu oyukasaba erikolerwa iye musa. Syendisyaghanyira ebibi* byenyu n’amalolo wenyu. 20 Mwamabileka Yehova n’eritsuka erikolera eyindi miungu, naye iniakendisyababindukira n’eribahwerekererya nomo anabiribakolera ebibuya.”

21 Nikwa abandu mubasubirya Yosua bati: “Iyehe, itwe tukendikolera Yehova.” 22 Neryo Yosua mwabwira abandu ati: “Inywibene-bene mwamabya bimiri okw’iyisogha lyenyu, ngoko mwamasombola erikolera Yehova.” Okw’ekyo abandu mubabugha bati: “Inga tuli bimiri.”

23 “Busana n’ekyo muyilusayeko eyindi miungu eyiri omo kati-kati kenyu, neryo mulolaye emitima yenyu eyiri Yehova oMungu wa Israeli.” 24 Abandu mubasubirya bati: “Tukendikolera Yehova oMungu wetu, kandi tukendyowa omulenge wiwe.”

25 Neryo ekiro ekyo Yosua mwakola endaghane haghuma n’abandu kandi mwabahiriraho omughambo n’ekyalayiro e Shekemu. 26 Neryo Yosua mwahandika ebinywa ebi omo kitabu ky’Emighambo y’oMungu; n’enyuma sy’aho mwimya eribwe rinene amasingikalyo omo ndina y’omuti munene owali hakuhi n’ahabuyirire ha Yehova.

27 Yosua mwabwira abandu bosi ati: “Mulangire! Eribwe eri ni bwimiri busana netu, kusangwa ryabiryowa ebinywa byosi ebyo Yehova abiritubwira kandi rikendisyabya bwimiri busana nenyu, neryo simwendisyaghana oMungu wenyu.” 28 Enyuma sy’aho Yosua mwaleka abandu baghende obuli mundu oko mwandu wiwe.

29 Enyuma sy’emyatsi eyi, Yosua mughala wa Nuni omughombe wa Yehova, mwahola. Abya awite emyaka 110. 30 Neryo mubamuta omo kiharo ky’omwandu wiwe e Timnati-sera ekiri omo kihugho ky’ebitwa kya Efraimu oko luhande lw’endata lw’ekitwa kye Gaashi. 31 Abaisraeli mubalola embere erikolera Yehova omo biro byosi bya Yosua n’omo biro byosi by’abasyakulu abalola embere eribyaho Yosua abihola. Abasyakulu abo mubayilangirira ebyosi ebyo Yehova akolera Abaisraeli.

32 Amakuha wa Yozefu agho Abaisraeli balusaya e Misri, mwatabwa e Shekemu omo lirima eryo Yakobo aghula oko bana ba Hamori baba wa Shekemu. Mwaghulalyo ebihande 100 by’esyofranga. Neryo mulyabya mwandu w’abaghala ba Yozefu.

33 Eleazari omughala wa Haruni naye mwahola. Neryo mubamuta oko Katwa ka mughala wiwe ye Finehasi ako ahabawa omo kiharo ky’ebitwa kya Efraimu.