Esyonyimbo
Omuziki wa Daudi, omughulu abya omo mbwarara ye Yuda.
63 Mungu, uli Mungu waghe, ngakusonda-sonda kutsibu.
Nikulaghireko* ngoko omundu oyukwire enyota akanalagha oko maghetse.
Ngalembera* n’erikukandira kutsibu omo kihugho ekyumire kandi ekikungukere, eyite amaghetse.
2 Neryo nabirikulolako ahabuyirire;
Nabirilangira amaka waghu, n’olukengerwa lwaghu.
3 Kusangwa olwanzo lwaghu oluteleghula ni lubuya kwilaba engebe,
Eminywa yaghe ikendisyakuhalamba.
4 Kutya ngendisyakupipa omo ngebe yeghe yosi;
Ngendisyasumba ebyala ngasaba oko rina lyaghu.
5 Nighutire* erighabo eryuwene n’erinunire,*
Neryo obuno bwaghe bukendikupipa, obutseme ibune oko minywa yaghe.
6 Ngakwibuka inine omo ngyingo yaghe;
Ngaghaniraya okw’iwe omo kiro kyosi.
7 Kusangwa uli muwatikya waghe,
Kandi nguta obwogho bw’obutseme omo kyutsutsu ky’ebipupa byaghu.
8 Ngakumakirira;*
Ebyala byaghu by’amali bikanimakirira ndeke.
9 Nikwa abakasonda eribughaho engebe* yaghe
Bakendyongoberera omo kitaka.
10 Bakendisyahirwa omo maka w’omuyali
Bakendisyabya kalyo k’esyombwa sy’omoli.*
11 Aliwe omwami akendisyatsema busana n’oMungu.
Obuli mundu oyukalahiraya omo rina ry’oMungu akendisyayisyandira,*
Kusangwa obuno bw’abakabugha amabehi bukendisyahunibwa.