Hulda mwahikira ekyo abya akalandamirira

OMO myaka milebe eyamabilaba, nga walenderera ekitsira ekye Sangir Besar omo Indonesia, wendisunga abasatu b’oko bali betu Bakristo oko musike w’engetse. Basibwe kutsibu omo kitsira ekyo busana n’omubiri w’eritulira, bakawatikaya abandu eryowa eBiblia. Aliwe oko mughulu oyo, babya bakakola oghundi mwatsi.

Okw’itsuka, ibak’ingira omo ngetse, ibatolamo amabwe awalitohire ibaletagho oko musike w’engetse. Amabwe malebe wa kugho, abya manene-manene. Neryo, abakali abo ibakikala oko hitabure, ibakolesya esyohama eritulanga amabwe mo hibwe hike-hike kulenga amaya w’engoko. Enyuma syaho, ibakahira ehibwe hike-hike ehyo omo himbegeti hy’eplastike, n’eritwala ehibwe ehyo hy’eka wabo. Neryo ibakayutulira ehibwe ehyo omo bindu binene-binene ebikendipakisibwa omo mutoka, n’ehibwe ehyo ihyakolesibwa omo buhimbe bw’endaki.

Omughuma w’oko bali betu abo, abya Hulda. Emibere eyo abyamo iyikamulighira erilabya endambi nene kulenga abandi ababya bakakola omubiri oyo. Inyakakolesaya esyofranga esyo abya akabana erighula ebyo ab’omo kihanda kiwe balaghireko. Aliwe, oko mughulu oyo, abya akakola inyanawite oghundi mwatsi omo bwenge. Abya akabika esyofranga silebe busana n’omwatsi oyo. Abya anzire inyabana e tablete atoke eribya ak’ingira omo JW Library. Hulda abya asi ngoko esyovideo n’eyindi myatsi eyikabanika omo JW Library, byanganamuwatikya eribya akatulira abandi bo ndeke, n’eribya akayighisya n’eryowa eBiblia yo ndeke.

Hulda mwabugha omwisi mughuma n’ekitswe inyanemukola esyosaha ibiri omo buli asubui akatulanga amabwe atoke eribana ehibwe ehyangaghonera omo kindu ekyongusulya omutoka muke. Oko nduli, mwabana esyofranga sy’erighulako e tablete.

Hulda akabugha ati: “Nomo nanabya ngaluha kutsibu busana n’eritulanga amabwe, omughulu natsuka erikolesya e tablete nyihya-hyihya eyo eribya ngatulira ndeke n’omughulu yaniwatikaya eribya ngateghekania emihindano y’Ekikristo yo bweghu-bweghu, munalw’inibirirwa erinuba eryo nalabamo.” Kandi mwabugha ati e tablete eyo muyamuwatikya kutsibu omughulu ekihunzo kye Korona kyatsuka, kundi emyatsi yosi y’endeko yabya ikalaba oko zumu. Tukatsema haghuma na Hulda kundi mwahikira ekyo abya akalandamirira.