Amabulyo erilua oko basomi betu
“Abamalaika ababirisombolwa” abakanibweko omo 1 Timoteo 5:21 ni bahi?
Omukwenda Paulo mwahandikira omusyakulu mulikyabo ye Timoteo ati: “Ngakubwira embere sy’oMungu na Kristo Yesu n’abamalaika ababirisombolwa niti ukwame amahano aya butsira kasololo.”—1 Tim. 5:21.
Imutwatoka eriminya abamalaika bano nga bo bahi, tukenditsuka erisonda eriminya abamalaika abatebangabya b’omo kikuto ky’abamalaika abo. Oko kwenene abamaika abo sibangabya b’oko ba 144 000. Omughulu Paulo ahandikira Timoteo y’omwatsi oyo, erilubukibwa ly’Abakristo abahirirweko amaghuta lyabya isilyatsuka. Abakwenda n’abandi abahirirweko amaghuta isibalibabya bihangyikwa by’obunya-kirimu. Kwesi sibangabya ibo “bamalaika ababirisombolwa.”—1 Kor. 15:50-54; 1 Tes. 4:13-17; 1 Yoh. 3:2.
Kandi, “abamalaika ababirisombolwa” sibangabya ibo bamalaika abayisamambula oko mughulu w’eribwagha ly’amaghetse. Kundi abamalaika abo mubabya oko luhande lwa Sitani n’eribya syombinga, esyabya sikalwa na Yesu. (Enz. 6:2; Luka 8:30, 31; 2 Pet. 2:4) Omo biro ebikasa bakendisyaboherwa omo abiso oko myaka 1 000 n’enyuma w’aho ibatoghotibwa kughuma na Sitani.—Yuda 6; Erib. 20:1-3, 10.
“Abamalaika ababirisombolwa” abo Paulo ahula banganabya ib’abamalaika abataleghula abali elubula abakakola kughuma na “Mungu na Kristo Yesu.”
Hali amaelfu n’amaelfu w’abamalaika bataleghula oko Yehova. (Ebr. 12:22, 23) Alinga Yehova syaliha abamalaika bosi b’emibiiri mighumerera. (Erib. 14:17, 18) Ng’eky’erileberyako, kiro kighuma Yehova mwasaba omumalaika mughuma musa erita abasuda 185 000 abe Asiria. (2 Abam. 19:35) Alinga abamalaika bangyi babirihabwa omubiiri w’erisyalusya “omo Bwami [bwa Yesu] mw’abandu bosi abakaleka abandi ibakola amalolo n’abakola-nabi bosi.” (Mat. 13:39-41) Abandi “bakendisyahindania abasombolwa biwe” omo lubula. (Mat. 24:31) Kandi n’abandi babirihabwa oghundi mubiiri: ‘Bakatuteghaya omo syonzira syetu syosi.’—Esy. 91:11; Mat. 18:10; tasyalebya Matayo 4:11; Luka 22:43.
“Abamalaika ababirisombolwa” abakahulawa omo 1 Timoteo 5:21 alinga b’abamalaika ababirihabwa omubiiri w’eriwatikya omo myatsi eyilebirye endeko. Omo yindi milondo eyitimbire oko mulondo oyo, Paulo mwateka amahano awakakanganaya ngoko abasyakulu batolere erikola ndeke omubiiri wabo, kandi ngoko abandi omo ndeko bangakangania erisikya oko basyakulu b’endeko. Oko luhande lwabo, abasyakulu b’endeko batolere erikola omubiiri wabo “butsira kasololo” kandi sibatolere eriyisogha oko mwatsi embere sy’erilengekania kugho ko ndeke. Paulo mwababwira ekikulu ekyangaleka ibakwama erihano liwe eryo. Mwabugha ati abasyakulu b’endeko bakakolera abaghala babo “embere sy’oMungu na Kristo Yesu n’abamalaika ababirisombolwa,” erisonda eribugha kiti Yehova, Yesu, “n’abamalaika ababirisombolwa” bakabya ibanemulebya ngoko abasyakulu banemusondola endeko. Kwesi, abamalaika balebe bawite omubiiri w’eriwatikya endeko. N’eyindi mibiiri yabo ry’eriteya abaghombe b’oMungu, eribawatikya omo mubiiri w’eritulira, neryo ibatwalira Yehova ebyosi ebyo balyalangira.—Mat. 18:10; Erib. 14:6.