ESOMO 4
Mwatsemesya tata wiwe na Yehova
Yefuta akalaghanira Yehova ki?
Sikyabya kyolo, aliwe mwali wa Yefuta mwaberererya endaghane ya tata wiwe
Wanamalangira omumbesa oko foto?— Ni mwali wa Yefuta. EBiblia siyiry’ahula erina liwe, aliwe mwatsemesya Yehova na tata wiwe. Tw’ighe oko Yefuta na mwali wiwe.
Yefuta abya mundu mubuya, kandi mwakangirirya mwali wiwe oko Yehova. Abya n’akaghala, kandi abya musondoli mubuya. Abaisraeli mubamusombola abye embere bakayalwa n’esyonzighu syabo.
Yefuta mwasaba oMungu amuwatikaye. Mwalaghanira Yehova ati amabikinda, iniakandimuha omundu w’erimbere w’omo nyumba yiwe oyukendisyamukokya akahika eka. Omwibyaho liwe lyosi endikolera eyiri ehema y’oMungu. Kera, ehema y’oMungu abya mwanya w’eriramiryamo. Yefuta mwakinda esyonzighu! Unasi omundu w’omo nyumba yiwe oyo amukokaya w’erimbere akahika eka?—
Abya mwali wiwe! Omwana mughuma aby’awite, nikwa yo Yefuta akandimutuma hali. Yefuta mwabya n’obulighe bunene. Aliwe w’ibuke ngoko abya iniabirimulaghanira oMungu. Mwali wiwe mwamubwira ati: ‘Baba, ukole ekyo wabirilaghanira Yehova.’
Oko buli mwaka, abira biwe ibakaya mubana
Mwali wa Yefuta naye mw’abya n’obulighe. Iniane eyiri ehema syangalungire n’eributa. Aliwe iye aby’anzire eriberererya endaghane ya tata wiwe n’eryanzisya Yehova. Mwalangirakyo ky’omughaso kwilaba erilunga n’eributa abana. Mwalwa ewabo n’omwibyaho liwe lyosi mwakolera eyiri e Hema.
Ukalengekanaya uti ekyo mukyanatsemesya Yehova na tata wiwe?— Inga mubatsema! Wamabikenga Yehova n’erimwanza, iwukandibya nga mwali wa Yefuta. Naghu kutya wanganatsemesya Yehova n’ababuti baghu.