ESOMO 7
Hakanabya endambi ukakwa endululuma n’obuba?
Lebaya omwana mulere oyuli oko foto. Akabya ng’akwire endululuma n’obuba, ko bite bitya kwehi? Une watayowa utya?— Hakanabya akatambi obuli mundu iniayowa atya. EBiblia ikakanaya oko bira ba Yehova abakwa endululuma n’obuba. Eliya abya mughuma wa kubo. Tw’ighe okwiye.
Yezebeli mwasonda erita Eliya
Kera embere Yesu abutawe, Eliya abya ikere e Israeli. Ahabu omwami we Israeli abya isyaliramaya Yehova, oMungu w’ekwenene. Ahabu n’omukali wiwe Yezebeli babya ibakaramaya Baali omungu w’amabehi. Neryo Abaisraeli banene mubatsuka eriramya Baali. Omwamikali Yezebeli abya mutsibu kandi mwasonda erita abandu bosi ababya bakaramya Yehova, erihirako Eliya! Unasi ekyo Eliya akola?—
Eliya mwatibita! Mwaghenda omo mbwarara mo hali n’eriyabisama omo mwangalu (ekyuna ky’omw’ibwe). Wanganaminya ekyaleka iniakola atya?— Kwenene, abya akwire obuba. Aliwe syabyatolere erikwa obuba. Busanaki? Kusangwa abya inianasi ngoko Yehova angamuwatikirye. Eliya abya iniabiriyilangirira akaghala ka Yehova. Kiro kighuma, Yehova mwasubya oko musabe wa Eliya omwikimya omuliro erilwa elubula. Kwesi Yehova syangatalukire eriwatikya Eliya oko katambi ako!
Yehova mwawatikya Eliya ati?
Omughulu Eliya abya iniane omo mwangalu, Yehova mwamubulya ati: ‘Ukakola hano hoki kwehi? Eliya mwasubya ati: ‘Nikiri injuwene inje nga kuramaya. Nyiri injuwene musa, nikwire obuba, kandi ngendiitwa.’ Eliya mwalengekania ati alinga abandu bosi ababya bakaramya Yehova babiriitwa. Aliwe Yehova mwabwira Eliya ati: ‘Iyehe, si kwenene. Hakine abandi bandu 7000 abakanyiramaya. Sighukwe buba. Nyikinawite ebinji ebyo ukendinyikolera!’ Ukalengekanaya uti Eliya mwanatsema ak’owa ebyo?—
Ebyahikira Eliya bikakw’ighisayaki?— Sighutolere erikwa endululuma n’obuba. Unawite abira ab’anzire Yehova n’aghu. Yehova awite akaghala kanji, kandi akandibya inianemukuwatikya! Wanamatsema eriminya ngoko sighuli iwuwene?—