ESOMO 18

Erikangirirya ndeke abahulikiriri baghu

1 Abanya Korinto 9:19-23

OMO KIKUHI: Watikaya abahulikiriri baghu erilengekania oko mwatsi batoke erilangira ngoko hane kindu kilebe ky’omughaso ekyo bamigha.

Ulengekanaye oko ebyo abahulikiriri baghu basi. Omo mwanya w’erisubirira ebyo babiryowa, ubawatikaye eriyiteghererya omwatsi omo yindi nzira.

Isiwalabaya ndambi nene oko myatsi eyo banasi, aliwe ughende lyolo-lyolo omughulu ukakanaya oko myatsi mihya-mihya.
Ukwese-kwese emyatsi n’erilengekania buli. Kyamatokekana, kolesaya emyatsi eyiteyaminywa kutsibu kutse eyiryahuluka lino-lino, erikania oko syonzumwa ngulu-ngulu. Ulengekanaye oko mukania waghu ko kutsibu n’erilangira ng’anahambene n’ebyo wanzire erikaniako.

Ukayiteghererya emyatsi, ughuse amalengekania waghu wo hali omwiyibulya amabulyo nga, ‘niki, busanaki, mughulu wahi, hayi, nindi, na kiti.’ Neryo uhire ekihuhania omwikangirirya ryaghu omwibya ukabulya amaghuma w’oko mabulyo ayo n’erisubirya kugho.
Ukanganaye endundi y’omukania waghu. Kanganaya ngoko emyatsi eyiri omo Masako yangawatikya abahulikiriri baghu omo ngebe. Kanaya oko mibere, amalengekania, n’emikolere milebe eyilebirye abahulikiriri baghu.