Balwana n’abambesa​—Muyikase eribya Bakristo abakulire bunya-kirimu enyuma sy’olubatiso

1. Abalwana n’abambesa bangyi babirikola emyatsi eyuwene yahi?

OBULI mwaka, amaelfu w’abalwana n’abambesa Bakristo bakabatisibawa. Naghu wanabirikola utya? Byamabya bitya, abaghala n’abali benyu omo ndeko bakatsema, na Yehova kutya! (Emi. 27:11) Terilengekania hake oko myatsi eyuwene eyo wabirikola. Wabirigha eBiblia, kwamuhwa omo myaka mingyi. Ebyo wigha mobyaleka iwikirirya ngoko eBiblia ni Kinywa ky’oMungu. N’ekindi, wabiriminya n’eryanza oyo wahandikisaya eBiblia. Olwanzo lwaghu oko Yehova molwahika okw’ikula, neryo wamayisogha erimukolera n’eribatisibwa. Mowayisogha ndeke!

2. Omo mwatsi ono tukendikania okuki?

² Ahate eritika-tika, embere sy’eribatisibwa obwikirirya bwaghu bwanganabya imobwalengwako omo nzira nyingyi. Aliwe, omughulu ukalola embere erikula ukendihikirwa n’erilengwako ly’oghundi muhanda. Sitani akendisondekania erileghetsania olwanzo lwaghu oko Yehova n’erikulusya okw’iye. (Efe. 4:14) Isiwamuha akanya ako n’ahake. Niki kyo kyangakuwatikya erilola embere eribya mutaleghula oko Yehova n’eriberererya ebyo wabirimulagha? Litolere ‘iwaghenda embere’​—ni bughambu eriyikasa kutsibu utoke eribya Mukristo oyukulire. (Ebr. 6:1) Aliwe, wangakola ekyo kyo wuti?

WANGAKOLAKI UTOKE ERIBYA MUKRISTO OYUKULIRE?

3. Abakristo bosi batolere ibakolaki enyuma sy’eribatisibwa?

³ Enyuma sy’eribatisibwa, litolere obuli mughuma w’okw’itwe inyakwama erihano eryo omukwenda Paulo aha aBakristo b’eEfeso. Mwabahiramo omuhwa w’eribya Bakristo “abakulire ndeke.” (Efe. 4:13, NWT) Abya akasonda eribabwira ati ‘balole embere erikula’ bunya-kirimu. Twanganaminya ekyo Paulo asonda eribugha akasosekania erihika okw’ibya Mukristo oyukulire bunya-kirimu n’erikula ry’omwana. Ababuti bakabya bayira olumekeke bakalwanza n’erilutsemera kutsibu. Aliwe omwana oyo syalisighala lumekeke. Enyuma sy’ebiro, likatolera inyaleka “emyatsi y’obwana.” (1 Kor. 13:11) Ko bine bitya n’oko Bakristo. Litolere itwalola embere erikula nibya n’enyuma sy’eribatisibwa. Tukanaye oko myatsi milebe eyangatuwatikya erikola tutya.

4. Ni mubere wahi w’angakuwatikya erikula bunya-kirimu? Kanaya. (Abanya Filipi 1:9)

⁴ Ukanyaye olwanzo lwaghu oko Yehova. Tunasi ngoko wanzire Yehova yo kutsibu. Aliwe olwanzo lwaghu okw’iye lwanganakula okw’aho. Luti? Omukwenda Paulo mwatukangya enzira nguma omo Abanya Filipi 1:9. (Soma.) Paulo mwasabira Abanya Filipi ati olwanzo lwabo “lukanyirire kutsibu.” Kwesi, twanganakulya olwanzo lwetu oko Yehova. Twanganakulyalo tutya omw’ibana “amenge n’eriminya enzumwa y’omwatsi.” Tukabya twaminya Yehova yo ndeke, tukamwanza kutsibu n’eritsemera emibere yiwe n’enzira yiwe y’erikolamo emyatsi. Tukanza kutsibu erimutsemesya kandi situlyanza erimukosera n’ahake. Neryo tukayikasa kutsibu eriminya ebyo anzire itwakola kandi nga twangakolabyo tuti.

5-6. Twangakulya tuti olwanzo lwetu oko Yehova? Kanaya.

⁵ Olwanzo lwetu oko Yehova lwanganakula ndeke twamabiminya oMughala wiwe, oyukakanganaya emibere ya Tata wiwe yo ndeke-ndeke. (Ebr. 1:3) Enzira eyuwene eyangatuwatikya eriminya Yesu yo ndeke ry’er’igha esyo Injili ini. Wamabya isiwewatsuka erisoma eBiblia yo buli kiro, wanganatsuka lino omw’isoma emyatsi eyi, eyilebirye Yesu. Omughulu ukasoma emyatsi eyilebirye Yesu, ubye ukayiteghererya kutsibu emibere yiwe. Abandu ibakamubegherako bweghu-bweghu; mwawata oko bana balere omo byala biwe. (Mar. 10:13-16) Inyakaleka abigha biwe ibayowa mbolere; isibalisagha erimubwira amalengekania wabo. (Mat. 16:22) Omw’ikola atya, Yesu mw’igha emibere ya Tata wiwe w’elubula. Yehova naye erimuhikira sirikalire. Twanganamuhikira omo musabe. Omughulu tukasaba, twanganamubwira ebyosi ebiri oko mutima. Tuk’ikiriraya ngoko syangatutsweba-tsweba. Atwanzire; kandi atutsomene.​—1 Pet. 5:7.

⁶ Yesu inyakakwira abandu b’obulighe. Omukwenda Matayo akabugha ati: “Neryo Yesu abere alangira esyondeko, mwakwirasyo obulighe kusangwa mobagalwa ng’esyombuli sitawite mulisya.” (Mat. 9:36) Na Yehova akayowa ati? Yesu mwabugha ati: “Tata wage oyuli elubula syanzire omuguma w’oko bana balere aba akahera.” (Mat. 18:14) Ekyo kikatula oko mutima ko kutsibu! Tukabya twaminya Yesu yo ndeke, olwanzo lwetu oko Yehova lukakula.

7. Erilabya endambi yo haghuma n’aBakristo abakulire bunya-kirimu lyangakuwatikya liti?

⁷ Eriminya abaghala n’abali benyu abakulire omo ndeko n’erilabya endambi yo haghuma nabo, nalyo likendikuwatikya erikulya olwanzo lwaghu n’erilola embere eribya Mukristo oyukulire bunya-kirimu. Ukanalangira ko batsemire? Sibaliyikubaya b’omo n’ahake eribya imo basombola erikolera Yehova. Wanganababulya oko ebyo babiriyilangirira omo mubírí wa Yehova. Ukasonda eriyisogha omwatsi mulebe w’omughaso, ubasabe amahano. Wibuke ngoko, “omo bungi bw’abahani” omwatsi akatokekana.​—Emi. 11:14.

8. Wangakolaki kyamakuhikira iwatsuka eritika-tikira amakangirirya w’eBiblia?

⁸ Uyilusaye mw’eritika-tika. Ngoko tunalyalangira omo nungu y’akabiri, Sitani akendiyikasa erileghetsania obwikirirya bwaghu n’erikulusya oko Yehova. Enzira nguma eyo angakolesya ry’erikuhira mw’eritika-tikira amakangirirya malebe w’eBiblia. Ng’ekyerileberyako, abandu banganasondekania erikukuna eriligha ngoko ebindu sibyahangyikawa n’oMungu aliwe bati byayibutukira. Omughulu wabya mwana, alinga wabya isiwewatalengekania oko mwatsi oyo, aliwe lino kundi wamabikula, banganabya ibanemukukangiriryagho ekalasi. Kyanganakuhikira iwatsuka erilangira ebyo abaghalima baghu bakabugha okw’iyibutukira ly’ebindu nga ni by’ekwenene. Aliwe, banganabya isibebatayiteghererya emyatsi eyikakanganaya ngoko hane oMuhangyiki. Wibuke akanuni akali omo Emisyo 18:17: “Oyukatsuka eritonda akabya ng’atunganene, nikwa omulikyabo akasa n’erimusonda-sonda.” Omo mwanya w’erikirirya bulima-lima ebyo bakakukangiriraya ekalasi, litolere iwayiteghererya ndeke esyokwene esiri omo Kinywa ky’oMungu, eBiblia. Ukwese-kwese omo bitabu byetu. Ukanaye n’abaghala n’abali betu ababya bikirirye kera ngoko ebindu byayibutukira. Ubabulaye nga niki kyo kyaleka ibikirirya ngoko hane oMuhangyiki oyutwanzire. Emikania eyikahimba ng’eyo yanganakuwatikya eriyiteghererya emyatsi yo ndeke.

9. Wam’ighaki omo ekyo Melissa ayilangirira?

⁹ Mwali wetu oyukahulawa mo Melissa mwabana endundi nene omw’ikwesa-kwesa emyatsi eyilebirye ebihangyikwa.b Akabugha ati: “Ekalasi bakakangiriraya eriyibutukira ly’ebindu omo mibere eyikaleka abandu ibalengekania bati ni kwenene. Oko nzuko mondanza erisondya eriminya ekwenene oko mwatsi oyo. Kundi nabya ngasagha nyiti ebyo nyikirirye byanganayalangirika ko byo bite by’ekwene. Aliwe monaghanirya ngoko Yehova syanzire tukamukolera buliba-meso. Neryo monatsuka erikwesa-kwesa emyatsi. Monasoma ekitabu Je Kuna Muumba Anaye Kujali? n’ebroshua Uhai​—Ulitokana na Muumba? ne Vitu Vyenye Uzima Vilianza Namna Gani?​—Maulizo 5 ya Kujiuliza. Ekyo kyo nabya nyitolere erikola. Monayibulya nibya nga mondakolakyo luba okw’aho busanaki.”

10-11. Niki kyo kyangakuwatikya eribya iwune n’emighendere ey’erire? (1 Abanya Tesalonika 4:3, 4)

¹⁰ Uyihighule oko mighendere mibi. Omo myaka y’obusuko, esyongumbu sy’erikola emyatsi y’engyingo syanganakala, n’oko sindi ndambi abandi banganakuhatikana erikola obusingiri. Ebyo byo Sitani anzire iwakola. Niki kyo kyangakuwatikya eribya iwune n’emighendere ey’erire? (Soma 1 Abanya Tesalonika 4:3, 4.) Omo misabe yaghu ubwire Yehova ngoko ukayowa n’erimusaba akaghala. (Mat. 6:13) Wibuke ngoko ekyo Yehova anzire ly’erikuwatikya, butsira erikutswera. (Esy. 103:13, 14) N’ekinywa ky’oMungu nakyo kyanganakuwatikya. Melissa, oyo tulyakanayako aho mbere mwayikasa eriyihighula oko malengekania awatuwene. Akabugha ati: “Erisoma eBiblia yo buli kiro molyanyiwatikya erilwa n’esyongumbu syaghe esituwene. Molyanyibukya ngoko nyiri wa Yehova kandi ngoko nyanzire erimukolera.”​—Esy. 119:9.

¹¹ Isiwasonda erisoha esyombanza syaghu sy’iwuwene. Ukanaye n’ababuti baghu oko myatsi eyo ukalwa nayo. Tunasi ngoko omundu erikania oko bimulebirye siryolobire, aliwe erikola utya ni ry’omughaso. Melissa akabugha ati: “Monasaba oMungu y’obutubaha neryo monakania na baba oko mwatsi owanyikalireko. Nabere nakola nyitya, monayowa ndeke kutsibu. Monaminya ngoko Yehova mwanyitsemera.”

12. Niki kyo kyangakuwatikya eribya ukayisogha ndeke?

¹² Ubye ukakolesya esyokanuni sy’eBiblia. Ukakula, ababuti baghu bakendighenda bakakulekera obwiranda bw’eriyisogha ighuwene-wene omo myatsi mingyi. Aliwe hakendibya ihakine emyatsi mingyi eyo ute waminya. Niki kyo kyangakuwatikya eriyihighula oko mwatsi owangatsandya obwira bwaghu haghuma na Yehova? (Emi. 22:3) Mwali wetu oyukahulawa mo Kari akakanganaya ekyamuwatikaya eribya akayisogha ndeke. Mwalangira ngoko oMukristo oyukulire syalaghire oko kyalayiro ky’erisondola obuli mwatsi ow’akakola. Akabugha ati: “Lyabya litolere inaminya esyokanuni sy’eBiblia butsira ebyalayiro.” Omughulu ukasoma eBiblia, uyibulaye uti: ‘Erisako eri rikanyikangirirayaki oko malengekania wa Yehova? Rinemo esyokanuni esyanganyiwatikya erikola ebyuwene? Syamabya isinemo, ngendibana endundi yahi omw’ikolesyasyo?’ (Esy. 19:7; Isa. 48:17, 18) Wamabya ukasoma eBiblia n’erighanirya buli oko syokanuni syayo, ikikendikolobera eribya ukayisogha emyatsi y’omo nzira eyikatsemesaya Yehova. Wamatendileka eriyikasa, ighukendilangira ngoko sighulaghire oko kyalayiro ky’erisondola obuli mwatsi owo ukakola kundi ukendibya iwabiriminya amalengekania wa Yehova.

13. Abira abuwene bangakuwatikya bati? (Emisyo 13:20)

¹³ Usombole abira abanzire Yehova. Ngoko tunalyabugha aho mbere, abira abo ukasombola banganakuwatikya eribya Mukristo oyukulire. (Soma Emisyo 13:20.) Obutseme bwa mwali wetu oyukahulawa mo Sara mobwatsuka erikeha. Neryo mohabya omwatsi owamuwatikaya eritasyabya n’obutseme. Sara akabugha ati: “Monabana abira abuwene oko ndambi eyitolere. Ingye n’oghundi mwali wetu oyo wabya iniakine musika itukasungana obuli yenga busana n’er’igha haghuma Akaleberyo k’Omuteya. Oghundi mwira mwanyiwatikya eritsuka eribya ngasubirya oko mihindano y’endeko. Busana n’obuwatikya bw’abira baghe abo monatsuka eriyighisya eBiblia n’erisaba. Monatsuka erinokya obwira haghuma na Yehova n’eritsuka eritaswabya n’obutseme.”

14. Julien mwabana abira abuwene b’ati?

¹⁴ Wangatoka wuti erisombola abira abangakukuna erikola ebyuwene? Julien, oyuli musyakulu w’endeko lino, akabugha ati: “Omughulu nabya mulwana, monasunga abira abuwene omw’ibya ngayatulira haghuma nabo. Abira baghe abo babya n’omuhwa kandi mobanyiwatikya erilangira ngoko omubírí w’eritulira akatsemesaya. Monatsuka eriyihiriraho omubírí w’omughulu wosi mo mwatsi ogho ngalandamirira. Kandi monafumbula ngoko sinabya n’abira bangyi abuwene kundi ingasondaya ab’emyaka yaghe basa. Enyuma, monayira abira abuwene n’oko Beteli. Eribaleberyako molyanyiwatikya eribya ngasombola ndeke eby’eriyitsemesyamo kandi molyanyiwatikya eriyitunda hakuhi na Yehova.”

15. Paulo mwaha Timoteo y’erihano ryahi erilebirye obwira? (2 Timoteo 2:20-22)

¹⁵ Wangayira wuti wamabifumbula ngoko omundu mulebe omo ndeko si mwira oyuwene okw’iwe? Paulo abya inyanasi ngoko abandu balebe omo ndeko y’eKikristo y’oko karne k’erimbere sibabya bakalengekania ng’aBakristo abakulire bunya-kirimu, neryo mwahana Timoteo ati ayihighule okw’ibo. (Soma 2 Timoteo 2:20-22.) Obwira bwetu haghuma na Yehova ni kindu ky’obughuli bunene. Siritolere itwaleka omundu wosi-wosi atsandaye obwira obo twakola kutsibu eritsukisya haghuma na Tata wetu w’elubula.​—Esy. 26:4.

ERIYIHIRIRAHO EBY’ERILANDAMIRIRA LYANGAKUWATIKYA LITI ERIKULA BUNYA-KIRIMU?

16. Litolere iwasombola eby’erilandamirira byahi?

¹⁶ Uyihirireho eby’erilandamirira ebyuwene. Uyihirireho eby’erilandamirira ebyangawatya obwikirirya bwaghu n’erikuwatikya eribya Mukristo oyukulire. (Efe. 3:16) Ng’eky’erileberyako, wanganayisogha eryuwania endegheka yaghu y’eriyighisya n’erisoma eBiblia. (Esy. 1:2, 3) Kutse wanganayikasa eribya ukasaba ngendo nyingi, n’emisabe yaghu eribya ikalua oko mutima. Kwamuhwa lyanganabya iritolere iwayiteghererya ndeke eby’eriyitsemesyamo ebyo ukasombola n’emibere yaghu y’erikolesya endambi. (Efe. 5:15, 16) Yehova akenditsema akalangira ukayikasa eribya Mukristo oyukulire bunya-kirimu.

17. Eriwatikya abandi likendikuletera endundi yahi?

¹⁷ Eriwatikya abandi likendileka iwabya Mukristo oyukulire bunya-kirimu. Yesu mwabugha ati: “Erihitya likaleta obutseme kwilaba erihabwa.” (Emib. 20:35) Wamabikolesya endambi n’akaghala kaghu k’omo bulwana busana n’eriwatikya abandi ighukendibana endundi. Ng’eky’erileberyako, wanganalandamirira eriwatikya abakekeluhire n’abatawite amaka ab’omo ndeko yenyu. Wanganabayira omo soko, kutse iwabawatikya erikolesya ebyombo byabo by’ekielektronike. Wamabya ighuli mulume, ulandamirire eribya mughombe muwatikya, utoke eriwatikya abaghala n’abali benyu bo kutsibu. (Flp. 2:4) Kandi ukakanganaya ko wanzire abate Bimiri ba Yehova omughulu ukakanirayabo oko ngulu mbuya y’oBwami. (Mat. 9:36, 37) Kyamabitokekana, ulandamirire erikola omuhanda mulebe w’omubírí w’omughulu wosi.

18. Omubírí w’omughulu wosi angakuwatikya ati eriwatya obwira bwaghu na Yehova?

¹⁸ Omubírí w’omughulu wosi anganakuha ehyanya hingyi hy’eriwatya obwira bwaghu na Yehova. Eribya mupainia lyanganaleka iwayasoma oko Kalasi k’aBatuliri b’oBwami, iwaya oko Beteli, kutse nibya iwasangira oko mubírí w’obuhimbe bw’ekiteokrasi. Mwali wetu mulere omupainia oyukahulawa mo Kaitlyn akabugha ati: “Eribya ngasiba n’abaghala n’abali betu abasi myatsi mingyi molyanyiwatikya eribya Mukristo oyukulire bunya-kirimu enyuma sy’eribatisibwa lyaghe. Eky’erileberyako kyabo mokyanyikuna er’igha eBiblia yo kutsibu n’eryuwania emibere yaghe y’erikangirirya.”

19. Wamabilola embere erikula bunya-kirimu ighukendibana emiyisa yahi?

¹⁹ Wamabilola embere eribya Mukristo oyukulire bunya-kirimu, Yehova iniakendikuha emiyisa mingyi. Isiwendihererya amaka waghu w’obulwana w’oko myatsi yitawite mughaso. (1 Yoa. 2:17) Isiwendihikirwa n’amaghali awakasira omw’iyisogha muhanda. Omo mwanya wekyo, ighukendibana endundi y’ekwenene n’obutseme bw’ekwenene. (Emi. 16:3) Eky’erileberyako kyaghu kibuya ikikendihimba abaghala n’abali benyu, abalere n’abakulire. (1 Tim. 4:12) N’ekikulu oko byosi, ighukendibya n’eritekana n’eriyowa ndeke; emiyisa eyo Yehova akaha abakamutsemesaya n’abawite obwira obuwene haghuma naye.​—Emi. 23:15, 16.