Unemwowa erikungwa?

1. Yesu akendikolaki hano ho sesene?

TULI omo mughulu ogho emyatsi yinemubinduka kutsibu! Hano ho sesene, Yesu akenditswera obuli mundu oyw’ikere oko kihugho. Yesu mwatuwatikya eriminya ngoko eritswera eryo linemuhika hakuhi. Neryo mwaha abigha biwe “ekiminyikalo” eky’obuminyereri ekikakanganaya eribyaho riwe eritelangirika “n’eky’ebiro by’enduli y’ekihugho.” (Mat. 24:3) Obuminyereri obo bukabanika omo Matayo esura 24 n’eye 25 n’omo Mariko esura 13 n’omo Luka esura 21.

2. Tukendikania okuki omo mwatsi ono, kandi busanaki ekyo kikendituwatikya?

² Yesu mwateka emisyo isatu eyangatuwatikya eribya itunayiteghekenie. Emisyo eyo yikatukunga. Hali omusyo w’esyombuli n’esyombene, omusyo w’abambesa ab’amenge n’abakiru, n’omusyo w’esyotalanta. Obuli musyo akendituwatikya eriminya ndeke busanaki Yesu akendisyatswera obuli mundu erikwamana n’ebyakola. Omo mwatsi ono, tukendikania oko misyo eyo, n’erilangira nga yanganatwighisyaki. Tutsuke n’omusyo w’esyombuli n’esyombene.

ESYOMBULI N’ESYOMBENE

3. Yesu akendisyatswera abandu mughulu wahi?

³ Omo musyo w’esyombuli n’esyombene, Yesu mwabugha ati akendisyatswera abandu erikwamana ngoko bayiwata babyowa engulu mbula, n’erikwamana ngoko bawatikaya abaghala babo Kristo abahirirweko amaghuta. (Mat. 25:31-46) Oko mughulu we “ryaghalwa rinene,” Yesu akendisyatswerabo mo mbuli kutse mbene mughulu muke embere sye Armagedoni. (Mat. 24:21) Ngoko omulisya akasombola esyombuli omo sy’ombene, Yesu akendisyasombola abandu abawatikaya butaleghula abaghombe biwe abahirirweko amaghuta n’erihighulabo oko bandu abatawatikayabo.

4. Ngoko kiri omo Isaya 11:3, 4, busanaki twanganayiketera ngoko Yesu akendisyatswera abandu omo ritunganene? (Ulebaye y’oko kijalada.)

⁴ Amaminyereri w’eBiblia akakanganaya ngoko Yehova abirisombola Yesu mo Mutsweri. Yesu akendisyatswera abandu omo ritunganene. (Soma Isaya 11:3, 4.) Anemulebya ebyo abandu bakakola, ebyo bakalengekanaya n’ebyo bakabugha, nibya ngoko bakakolera abaghala babo Yesu abahirirweko amaghuta. (Mat. 12:36, 37; 25:40) Yesu akendisyaminya abawatikaya abaghala babo abahirirweko amaghuta n’eriwatikya oko mubiiri wabo.a Eky’omughaso munene ekyo omundu angakola eriwatikya abaghala babo Kristo, ry’eritulira engulu mbuya. Abakawatikayabo omo nzira eyo, basyatswerwamo “abatunganene,” neryo bakendisyabya n’akanya ak’eribana “engebe y’erikota” oko kihugho. (Mat. 25:46; Erib. 7:16, 17) Ekyo ni kihembo kibuya nga oko bandu abakendisyasighala bataleghula! Amena wabo akendisyahandikwa omo “kitabu ky’engebe” bamabisighala bataleghula oko mughulu w’eryaghalwa rinene n’enyuma w’aho.​—Erib. 20:15.

5. Omusyo w’esyombuli n’esyombene akatukuna erikolaki, n’abahi bo batolere erikola ekyo?

⁵ Ubye mutaleghula. Omusyo wa Yesu w’esyombuli n’esyombene alebirye kutsibu-tsibu abakendisyabya hano oko kihugho ko kera na kera. Bakakanganaya obwikirirya bwabo omwiwatikya abaghala babo Kristo oko mubiiri w’eritulira, n’erikwama butaleghula obusondoli bw’omughombe mutaleghula n’ow’amenge oyo Yesu abirisombola. (Mat. 24:45) Aliwe, n’abawite amaha w’erisyaya elubula, nabo kutya batolere eriyiteghererya ndeke omusyo w’esyombuli n’esyombene. Busanaki? Kundi Yesu anemuyiteghererya ndeke ebyo bakakola, ebyo bakalengekanaya n’ebyo bakabugha. Nabo batolere ibabya bataleghula. Yesu mwakania oko yindi misyo ibiri eyikakunga kutsibu-tsibu abahirirweko amaghuta. Emisyo eyo nayo yikabanika omo Matayo esura 25. Neryo muleke tukanaye n’ok’omusyo w’abambesa b’amenge n’abakiru.

ABAMBESA B’AMENGE N’ABAKIRU

6. Abambesa itano mubakangania bati ngoko ni b’amenge? (Matayo 25:6-10)

⁶ Omo musyo w’abambesa, Yesu mwakania oko bambesa ikumi abayahindana n’omulunga. (Mat. 25:1-4) Abosi babya banzire eriya oko ndwa n’omulunga. Yesu mwahula abambesa itano mo “b’amenge” n’abandi itano mo “bakiru.” Ab’amenge mubayiteghekania ndeke n’erilindirira omulunga erihikira aho end’yasira, nomo endy’asa omo kiro kutsibu. Neryo mubahira omo syotala syabo mw’amaghuta aw’endiwatikyabo erikolerya omo mwirimya. Nibya mubaheka n’awandi maghuta agho bangakolesirye omulunga amabibulirayo. Neryo babya ibabiriyiteghekania ndeke esyotala syabo isisyalima. (Soma Matayo 25:6-10.) Omulunga abere abyasa, abambesa b’amenge mubingira n’omulunga oko fete y’endwa. Ko bikendisyabya bitya n’oko Bakristo abahirirweko amaghuta, abakendisyakangania ngoko banayiteghekenie omw’isighala bataleghula erihika ekiro Kristo akendisyasa; bakendisyahembwa n’eringira n’Omulunga Yesu omo Bwami bwiwe bw’elubula.b (Erib. 7:1-3) Neryo mubyabya biti n’oko bambesa itano bakiru?

7. Niko kyo kyahikira abambesa itano bakiru, kandi busanaki?

⁷ Abambesa itano bakiru ibo sibabya bayiteghekenie omughulu omulunga ahika. Esyotala syabo syabya sikasonda erilima, kandi mubataheka awandi maghuta w’erihiramo. Babere bowa ngoko omulunga anemwasa, mubayaghula amaghuta. Omulunga mwahika isibali basubula. Oko ndambi eyo, abambesa “ababya ibanayiteghekenie, mubingira n’omulunga omo kisendebele ky’endwa. Neryo omulango mwakingwa.” (Mat. 25:10) Abambesa bakiru bakasonda eringira, omulunga mwabwirabo ati: “Oko kwenene ngababwira, sinibasi.” (Mat. 25:11, 12) Abambesa abo mubatayiteghekania okw’ilindirira omulunga ngoko byabya bitolere. Ekyo kyamakangiriryaki Abakristo abahirirweko amaghuta?

8-9. Abahirirweko amaghuta banganighaki oko musyo w’abambesa? (Ulebaye n’epitsa.)

⁸ Ubye ighunayiteghekenie n’eriteya. Yesu mwatasonda eribugha ati hakendisyabya emihanda ibiri y’Abakristo abahirirweko amaghuta: Abakendisyayiteghekenia erilindirira erihika oko mwiso w’ekihugho kino, n’abatendisyayiteghekenia. Aliwe, abya akakangania ekyangahikira abahirirweko amaghuta bamatendisyayiteghekania okw’iyiyinia butaleghula erihika oko nduli. Bamatendisyakola ekyo, isibendisyabana ekihembo. (Yoh. 14:3, 4) Oyo ni mwatsi w’omughaso munene! Nomo twangabya n’amaha w’erisyaya elubula kutse aw’erisyasighala oko kihugho, litolere itwalengekania kutsibu okw’ikunga erikabanika omo musyo w’abambesa. Obuli mughuma w’okw’itwe atolere eriteya n’eriyiteghekania atoke eriyiyinia erihika oko nduli.​—Mat. 24:13.

⁹ Abere abikania oko musyo w’abambesa erikangania ngoko ni ky’omughaso munene eribya itunayiteghekenie n’eriteya, Yesu mwakania n’oko musyo w’esyotalanta. Omusyo oyu akakanganaya omughaso w’erikola n’omuhwa.

ESYOTALANTA

10. Abaghombe babiri mubakangania bati ngoko ni bataleghula? (Matayo 25:19-23)

¹⁰ Omo musyo w’esyotalanta, Yesu mwakania oko baghombe babiri ababya bataleghula oko mukama wabo, n’oghundi oywaleghula. (Mat. 25:14-18) Abaghombe babiri mubakangania ngoko ni bataleghula omw’ikola n’omuhwa n’eritundya ebindu by’omukama wabo. Embere sy’eribalama, mwahabo esyotalanta, ni bugha ambu esyofranga nene. Abaghombe babiri abo mubakola n’omuhwa n’erikolesya esyofranga esyo n’amenge. Ekyo mukyalwira mo ki? Omukama wabo mweyabo ibabiritundyasyo, isyabiributa esindi kabiri. Omukama wabo mwasimabo n’eribabwira ati bingire “omo butseme bw’omukama [wabo].” (Soma Matayo 25:19-23.) Neryo mubyabya biti oko mughombe w’akasatu? Mwakolesya ati esyofranga esyo mukama wiwe amuha?

11. Ekyahikira omughombe “mughata” niki, kandi busanaki?

¹¹ Omughombe w’akasatu mwahabwa etalanta nguma, aliwe abya “mughata!” Omukama wiwe mwamusaba erikolesya etalanta eyo n’amenge. Aliwe, iye mwayatakulirayo omo kitaka. Omukama wiwe abere abisubula, omughombe oyo mwamusubulirya etalanta nguma eyo. Omughombe oyo abya mutsibu. Omo mwanya w’erisaba obughanyiri oko mukama wiwe kundi mwatitatundya esyofranga siwe, mwabwira omukama wiwe omo bukali ati “uli mundu oyukalire.” Omukama wiwe mwatamwanza. Nibya, mwamusaghula etalanta nguma eyo n’erimuhigha omo nyumba yiwe.​—Mat. 25:24, 26-30.

12. Abaghombe babiri bataleghula bakasosekanayaki munabwire?

¹² Abaghombe babiri bataleghula abo bakasosekanaya Abakristo bataleghula abahirirweko amaghuta. N’omukama, ni bugha ambu Yesu, akababirikira eringira “omo butseme bw’omukama [wabo].” Bakabana ekihembo kyabo ky’elubula, ni bugha ambu erilubuka ry’erimbere. (Mat. 25:21, 23; Erib. 20:5b) Oko lundi luhande, eky’erileberyako eky’omughombe mughata kikakunga Abakristo abahirirweko amaghuta. Kiti?

13-14. Abakristo abahirirweko amaghuta bakighaki oko musyo w’esyotalanta? (Ulebaye n’epitsa.)

¹³ Ubye ukakola n’omuhwa munene. Omo musyo y’esyotalanta n’omusyo w’abambesa, Yesu mwatasonda eribugha ati abahirirweko amaghuta bakendisyabya baghata. Aliwe, abya akasonda erikangania ekyendihikirabo bamabiherya omuhwa wabo. Sibenditolera ‘eribirikirwa n’erisombolwa n’oMungu,’ kandi sibendilighirwa eringira omo Bwami bw’elubula.​—2 Pet. 1:10.

¹⁴ Omusyo wa Yesu ow’abambesa n’ow’esyotalanta akatukanganaya ndeke ngoko Abakristo bosi abahirirweko amaghuta batolere eribya ibanayiteghekenie n’eriteya, kandi batolere eribya n’omuhwa munene. Aliwe kandi, Yesu mwabugha oghundi mwatsi owakakunga Abakristo abahirirweko amaghuta. Erihano rya Yesu erikabanika omo Matayo 24:40, 41 naryo rikakanaya okw’itswerwa ry’enduli ery’abahirirweko amaghuta.

NI BAHI BO “BAKENDISYAGHENDA”?

15-16. Erisako rya Matayo 24:40, 41 rikawatikaya riti abahirirweko amaghuta erilangira ngoko batolere erilola embere eriteya?

¹⁵ Embere sy’eriteka emisyo isatu eyo twamabikaniako, Yesu mwatsuka erikania okw’itswerwa ry’enduli ery’Abakristo abahirirweko amaghuta ery’endikangania oyulighirwe nga yo wahi. Mwakania oko balume babiri abanemukola omo ririma n’abakali babiri abanemuswa oko luso. Abalume bali nga banemukola omubiiri mughumerera, n’abakali nabo kutya; aliwe Yesu mwabugha ati “bakendisyaghenda n’omughuma n’oghundi iniasighala.” (Soma Matayo 24:40, 41.) Neryo mwahana abaghombe biwe ati: “Muteghaye, kundi simwasi Omukama wenyu ng’akendisyahika kiro kyahi.” (Mat. 24:42) Enyuma sy’eriteka omusyo ow’abambesa, Yesu mwabugha oghundi mwatsi owali ng’oyo. (Mat. 25:13) Ebinywa biwe ebyo, nina bighumerera? Alinga. Abahirirweko amaghuta oko kwenene, kandi abakendisyasighala bataleghula bo “bakendisyaghenda” haghuma na Yesu omo Bwami bw’elubula.​—Yoh. 14:3.

¹⁶ Ubye ukateya. Omukristo wosi-wosi oyuhirirweko amaghuta amatendilola embere eriteya isyendisyahindanibwa kughuma “n’abasombolwa.” (Mat. 24:31) Kandi n’abosi abawite amaha w’erisyabyaho kera na kera oko kihugho, nabo batolere erilola embere eriteya n’erisighala bataleghula.

17. Busanaki siritolere tukahangya-hangya Yehova amabiyisogha erihira oko bandu balebe kw’amaghuta oko mughulu wetu ono?

¹⁷ Kundi twabiriminya Yehova yo ndeke, tulighire kundu ngoko ebyosi ebyo akakola bitunganene. Situlihanga-hangaya Yehova amabisombola erihira oko bandu balebe kw’amaghuta oko mughulu wetu.c Tukibuka ngoko, omo musyo wiwe w’eririma ry’emizabibu, Yesu mwakania oko bahingyi ababirikirawa erisyakola omo ririma ry’emizabibu oko saa kumi na moya. (Mat. 20:1-16) Ababirikirawa erisyakola oko saa kumi na moya mubahabwa obuhingyi bughumerera n’abatsinduka omwirira. Ko bine bitya n’oko abahirirweko amaghuta. Nomo bangasombolwa oko ndambi yahi, bakendisyahembwa ekihembo kyabo ky’elubula bamabisighala bataleghula.

WOWE ERIKUNGWA

18-19. Mutukigha emyatsi yahi eyikatukunga omo misyo eyo tulyakanayako?

¹⁸ Twamabikania okuki? Twamabilangira ngoko, abawite amaha w’erisyabyaho kera na kera oko kihugho, omusyo w’esyombuli n’esyombene akakanganaya ngoko ni ky’omughaso munene okw’ibo erisighala bataleghula oko Yehova​—munabwire n’omo mughulu w’eryaghalwa rinene. Omo mughulu owakasa oyo, Yesu asyalangira ibamatolera eribana “engebe y’erikota.”​—Mat. 25:46.

¹⁹ Kandi mutukakanaya n’oko misyo ibiri eyikakunga abahirirweko amaghuta. Omo musyo wa Yesu ow’abambesa b’amenge n’abakiru, abambesa itano ba kubo mubakangania ngoko ni b’amenge. Mubayiteghekania n’eriteya, bakalindirira omulunga erihika aho asira. Aliwe abambesa bakiru mubatayiteghekania. Neryo, omulunga mwaghana eringiryabo omo kisendebele ky’endwa yiwe. Netu ngambe itwabya itunayiteghekenie erilindirira erihika ekiro Yesu akendisyaleta enduli y’ekihugho kino. Kandi, omo musyo wa Yesu w’esyotalanta, mutukakanaya oko baghombe babiri bataleghula ababya n’omuhwa munene. Mubakolera omukama wabo yo kutsibu atoke erisimabo. Aliwe, omughombe mughata mwatibitwako. Mutukighaki? Litolere itwabya n’ebingyi by’erikola omo mubiiri wa Yehova erihika oko ndulya. Mutukabughirira omwilangira ngoko abahirirweko amaghuta batolere ibasighala bakateya batoke ‘erisyaghenda’ na Yesu bakayahabwa ekihembo kyabo ky’elubula. Bakakandira kundu ‘erisyahindanibwa haghuma” na Yesu omo lubula. Enyuma sy’amalwa we Armagedoni, bakendisyalunga n’Ekyana ky’Embuli, ni bughambu Yesu.​—2 Tes. 2:1; Erib. 19:9.

20. Yehova akendisyakoleraki abakowa erikunga liwe?

²⁰ Endambi ya Yesu y’erisyatswera abandu yiri hakuhi kutsibu, aliwe situtolere erisagha. Twamabisighala bataleghula, Tata wetu w’elubula iniakendisyatuha “obutoki obulengire obw’abandu” tutoke “erisyabala . . . n’eritoka erisyahangana embere sy’Omughala w’omundu.” (2 Kor. 4:7; Luka 21:36) Nomo twangabya n’amaha aw’erisyaya elubula kutse aw’erisy’ikala oko kihugho, tukatsemesaya Tata wetu w’elubula twamabyowa erikunga erikabanika omo misyo eyo Yesu ateka. Busana n’olukogho lunene lwa Yehova, amena wetu ‘asyabanika iniabirisakwa omo kitabu’ ky’engebe.​—Dan. 12:1; Erib. 3:5.