Yehova syalitulekeranaya

1-2. (a) Busanaki twikirirye kundu ngoko situlilwa n’amaligho itw’ibene? (b) Tukendikania okuki omo mwatsi ono?

OMUGHULU tuli omo maligho awakalire, twanganayowa nga tuli itw’ibene omo musitu munene. Aliwe, situlilwa n’amaligho wetu itw’ibene. Tata wetu w’elubula ow’olwanzo akalangira amaligho wetu kandi akatulagha erituwatikya. Yehova akatulagha ati: “Ngandikuwatikya.”—Isa. 41:10.

² Omo mwatsi ono tukendikania oko syonzira ini esyo Yehova akatuwatikirayamo (1) akatusondola, (2) akatuha ebyo tulaghireko kinya-mubiri, (3) akatuteghaya, n’enzira (4) akatukiranaya. Yehova akatukanganaya ndeke-ndeke ngoko nomo tunemulaba omo maligho awali ati, syangatwibirirwa n’ahake. Kandi sy’endisyatulekerania n’ahake. Kwesi, situli itw’ibene!

YEHOVA AKATUSONDOLA

3-4. Yehova akatusondola ati? (Esyonyimbo 48:14)

³ Soma Esyonyimbo 48:14. Yehova anasi ngoko sitwangatoka eriyisondola kandi tulaghire oko busondoli bwiwe. Neryo, Yehova akasondola ati abaramya biwe munabwire? Akatusondola erilabira eBiblia. (Esy. 119:105) Erilabira Ekinywa kiwe ekyasondolawa n’ekirimu kiwe, Yehova akatuwatikaya eriyisogha ndeke n’erikulya emibere eyikatuwatikaya eribya n’engebe eyuwene munabwire, n’eribya n’amaha w’erisyabana engebe y’erikota omo biro ebikasa.a Ng’eky’erileberyako, akatukangiriraya eritendibya tukabika ekinigha, eribya b’ekwenene omo myatsi yosi eyo tukakoka, n’eryanza abandi bo kutsibu erilua oko mutima. (Esy. 37:8; Ebr. 13:18; 1 Pet. 1:22) Omughulu tukakulaya emibere eyo, tukabya babuti babuya, abalume n’abakali abuwene omo ndwa, n’eribya bira abuwene.

⁴ Kandi Yehova abirihandikisya omo Kinywa kiwe emyatsi y’abandu abalaba omo maligho n’eriyowa ng’itwe. (1 Kor. 10:13; Yak. 5:17) Omughulu tukasoma oko myatsi y’abandu abo, n’erikolesya esyosomo esyo tukabana omo myatsi eyo, tukabana endundi omo syonzira ng’ibiri. Ey’erimbere, tukaminya ngoko sitw’ibene tukabana amaligho omo ngebe. Abandi nabo mubabana amaligho nga wetu kandi mubatoka eriyiyinia kundi Yehova mwawatikyabo. (1 Pet. 5:9) Ey’akabiri, tukaminya ebyangatuwatikya eriyiyinia omo maligho wetu n’erisighala itunatsemire.—Rom. 15:4.

5. Yehova akakolesaya bahi eritusondola?

⁵ N’ekindi Yehova akakolesaya abaghala n’abali betu eritusondola.b Ng’eky’erileberyako, kangyi-kangyi abalebya b’emitimbo bakatulenderera busana n’eritusikya mutima. Emikania yabo yikawataya obwikirirya bwetu n’erituwatikya erisighala omo bughuma. (Emib. 15:40–16:5) N’abasyakulu nabo bakakola kutsibu eriwatikya obuli mughuma w’okw’itwe erisighala hakuhi na Yehova. (1 Pet. 5:2, 3) N’ababuti nabo bakakangiriraya abana babo eryanza Yehova kandi ngoko bangayisogha n’amenge n’erikulya emibere eyuwene. (Misyo 22:6) N’abali betu abakulire bunya-kirimu bakawatikaya abali betu abakine bambesa omw’ibya eby’erileberyako ebyuwene okw’ibo, omw’ibaha amahano agho balaghireko, n’omw’ibasikya mutima.—Tito 2:3-5.

6. Litolere itwakolaki tutoke eribana endundi omo busondoli obo Yehova akatuha?

⁶ Yehova akatuha obusondoli tutoke eriyisogha n’amenge n’eribya n’obutseme. Litolere itwakolaki tutoke eribana endundi omo buwatikya n’amahano agho Yehova akatuha? Emisyo 3:5, 6 ikabugha yiti: “Uyiketere Yehova n’omutima waghu wosi, isiwayiketera obwenge bwaghu.” Twamabikolesya erihano riwe eryo, “naye, iniakendilungula esyonzira [syetu],” ni bugha ambu, iniakendituwatikya eriyihighula oko syombanza nyingyi n’eribya n’obutseme bw’ekwenene. Tukasima kutsibu ngoko Yehova anasi ndeke obuli mughuma w’okw’itwe, kandi akaha obuli mughuma w’okw’itwe amahano agho alaghireko kundi atwanzire kutsibu!—Esy. 32:8.

YEHOVA AKATUHA EBYO TULAGHIREKO KINYA-MUBIRI

7. Yehova akatuwatikaya ati? (Abanya Filipi 4:19)

⁷ Soma Abanya Filipi 4:19. Eritomeka okw’itusondola, Yehova akatuwatikaya erikola kutsibu tutoke eribana akalyo, eby’eriryambala, n’ah’erikala. (Mat. 6:33; 2 Tes. 3:12) Nomo si kibi eribana emyatsi eyi, Yehova akatusaba eritendihangya-hangya kutsibu busana n’emyatsi eyo. (Mat. 6:25) Busanaki? Kusangwa Yehova Tata wetu syangatulekerania n’ahake. (Mat. 6:8; Ebr. 13:5) Kwesi, omughulu Yehova akabugha ati akendituha ebyo tulaghireko kinya-mubiri, litolere itwayiketera iye kundu.

8. Yehova mwawatikya ati Daudi?

⁸ Tulebaye ngoko Yehova awatikaya Daudi. Omo myaka eyikalire eyo abya akatibita busana n’Omwami Saulo, Yehova mwamuwatikya haghuma n’abalume biwe batoke eribana ebyo balaghireko. Akalengekania ngoko Yehova amuwatikaya omo myaka eyikalire eyo, Daudi mwahandika ati: “Nabya mulere, na lino niri mundu mukulu, aliwe sindinatalangira omutunganene akalekeranibwa, kutse abana biwe bakasabirirya akalyo.” (Esy. 37:25) Kutya nga Daudi, kwa muhwa naghu wabiriyilangirira ngoko Yehova mwakuwatikya eribana ebyo ulaghireko kutse ngoko awatikaya abaghala n’abali betu omo mighulu eyikalire.

9. Yehova akawatikaya ati abandu biwe omo mighulu y’obuhanya? (Ulebaye n’esyopitsa.)

⁹ Kandi, Yehova akawatikaya abandu omo mighulu y’obuhanya. Enzala nene yabere yabihuluka omo Yerusalema oko karne k’erimbere, abaghala n’abali betu ab’omo bindi biharo mubabatumira obuwatikya. (Emib. 11:27-30; Rom. 15:25, 26) Na munabwire, abandu b’oMungu banemukangania omutima w’erihitya owali ng’oyo. Omughulu hakabya obuhanya, Yehova akakuna abandu biwe batoke eritumira abalyahikirawa n’obuhanya b’akalyo, amaghetse, eby’eryambala, n’esyodawa. N’abaghala n’abali betu bakawatikaya okw’itasyakokotya amanyumba, n’Ebisenge by’Obwami ebiryatsanda. Kandi abaghombe ba Yehova bakakolesaya eBiblia erikirania n’erisikya mutima abalyaheraya amanyumba wabo kutse abanzwa babo.c

10-11. Omwatsi wa Borys amakwighisyaki?

¹⁰ Kandi Yehova akawatikaya abatebatsuka erimukolera. Nga Yehova, netu tukarondaya ehyanya hy’erikolera ndeke abatemukolera. (Gal. 6:10) Omughulu tukakola tutya, ekyo kyanganaleka ibasonda eriminya bingyi oko Yehova. Tulebaye eky’erileberyako kya Borys, omukulu wa kalasi kaghuma omo Ikrene. Nomo si Mwimiri wa Yehova, Borys akakolera ndeke abakolo biwe Bimiri ba Yehova kandi akasikaya ebyo bikirirye. Borys abere abiyisogha eritibitira omo kindi kiharo ekitemo amalwa, abaghala betu mubamuwatikya. Oho nyuma, Borys mwahindana netu oko Muhindano w’Eryibuka Oluholo lwa Yesu. Omughulu akalengekanaya oko byosi ebyo abaghala betu bamukolera, Borys mwabugha ati: “Abimiri ba Yehova mubanitsomana kutsibu n’eriniwatikya. Ngasimabo erilua oko mutima.”

¹¹ Netu kutya, twanganigha Tata wetu w’elubula oyukakwira abandu b’obulighe omw’ikangania olwanzo abali omo bwagha nibya nomo banganabya isi Bimiri ba Yehova. (Luka 6:31, 36) Twikirirye kundu ngoko olwanzo olo tukabakanganaya lwanganabakuna eryanza erigha bingyi oko Yehova n’eritsuka erimukolera haghuma netu. (1 Pet. 2:12) Aliwe nomo banganabula eriyisogha erikolera Yehova, itwe itukendibya n’obutseme kundi “erihitya rikaletera obutseme bunene kulenga erihabwa.”—Emib. 20:35.

YEHOVA AKATUTEGHAYA

12. Ni buteya bwahi obo Yehova akalagha abandu biwe ng’ekikuto? (Esyonyimbo 91:1, 2, 14)

¹² Soma Esyonyimbo 91:1, 2, 14. Munabwire Yehova akatulagha eriteya abandu biwe oko mwatsi wosi-wosi owangatsandya obwira bwabo haghuma naye. Yehova syendisyalighira Sitani akakiraye abandu biwe erileka erimukolera ngoko anzire. (Yoh. 17:15) Kandi omughulu w’“eryaghalwa rinene” twanganayiketera kundu ngoko Yehova akendisyaberererya eriyilagha liwe ry’eriteya abandu biwe bunya-kirimu na kinya-mubiri.—Erib. 7:9, 14.

13. Yehova akateghaya ati obuli mughuma w’okw’itwe?

¹³ Yehova akateghaya ati obuli mughuma w’okw’itwe? Yehova abirituha eBiblia tutoke eriminya ekibi n’ekibuya. (Ebr. 5:14) Omughulu tukakolesaya ebyo tukigha omo Biblia tukateghaya obwira bwetu haghuma na Yehova kandi tukayisogha n’amenge, neryo itwabya n’engebe eyuwene n’ey’obutseme. (Esy. 91:4) Kandi Yehova akatuteghaya erilabira endeko. (Isa. 32:1, 2) Abaghala n’abali betu omo ndeko banzire Yehova kandi bakamwowa. Eribya tukalabya nabo endambi oko mihindano, omo mubiiri w’eritulira, n’omo myatsi y’eriyitsemesyamo kikatusikaya mutima n’erituwatikya eriyihighula oko ebituwene.—Misyo 13:20.

14. (a) Busanaki oMungu akanalighira amaligho erituhikira? (b) Esyonyimbo 9:10 sikaleka itwayiketeraki? (Ulebaye n’ebinywa by’eyikwa.)

¹⁴ Kera, ihakanabya endambi Yehova iniateya abaramya biwe oko luholo n’okw’ighalibwa. Aliwe, isyalikola atya mughulu wosi. Ndambi silebe tukanahikirawa n’“emyatsi eyo omundu atayilindirireko.” (Omug. 9:11) Kandi, erikangania ngoko Sitani ni mubehi, Yehova iniakanalighira abaghombe biwe eryaghalibwa, nibya n’erihikirwa n’oluholo. (Yobu 2:4-6; Mat. 23:34) Na munabwire ko bine bitya. Nomo Yehova syalilusayaho amaligho wetu, twanganayiketera kundu ngoko syendisyalekerania n’ahake abamwanzire.d—Esy. 9:10.

YEHOVA AKATUKIRANAYA

15. Tukakiranibawa tuti erilabira omusabe, Ekinywa ky’oMungu, n’Abakristo balikyetu? (2 Abanya Korinto 1:3, 4)

¹⁵ Soma 2 Abanya Korinto 1:3, 4. Ndambi silebe tukanahikirawa n’amaligho n’erihangya-hangya. Kwa muhwa lino unemulaba omo myatsi eyikalire eyikaleka iwayowa nga uli ighuwene. Hane omundu oyunemulangira ebyo ukalabamo? Inga, Yehova analangire. Akalangira obulumi bwetu, aliwe kandi “akatukiranaya omo malighe wetu wosi.” Akakola ekyo kyo ati? Omughulu tukalemba-lemba Yehova omo musabe, akatuha “obuholo bw’oMungu obulengire ebyosi ebyo abandu bangalengekania.” (Filip. 4:6, 7) Kandi tukakiranibawa omughulu tukasoma omo Biblia ebinywa ebyo Yehova akatubwira. Omo Biblia, akatukanganaya ngoko atwanzire, akatukangiriraya ngoko twangabya n’amenge, kandi akatuha amaha. Tukakiranibawa oko mihindano yetu, eyo tukasikibawa mutima erilabira eBiblia n’eyo tukabya haghuma n’abaghala n’abali betu abatwanzire.

16. Eky’erileberyako kya Nathan na Priscilla kyamakwighisyaki?

¹⁶ Erikangania ngoko Yehova akatukiranaya n’eritusikya mutima erilabira Ekinywa kiwe, tulebaye eky’erileberyako kya Nathan na Priscilla abikere e Amerika. Mubayisogha erihumira eyiri obwagha bw’abatuliri bw’Obwami. Nathan akabugha ati: “Ituyiketere ngoko Yehova akenditsumula ebyo tukayakola.” Aliwe, babere babihika omo kiharo kyabo kihya, mubahikirwa n’obukoni obo batabya bayilindirireko, n’eribulirwa esyofranga. Mukyasaba Nathan na Priscilla erisuba eka wabo, n’eyo mubayalola embere eribulirwa esyofranga. Nathan akatasyabugha ati: “Ingayibulaya busanaki Yehova mwatatutsumula ngoko twabya tukalengekania. Nibya munatsuka eriyibulya nga nabirikola omwatsi mulebe owatuwene.” Aliwe, ebiro bikalaba, Nathan na Priscilla mubaminya ngoko oMungu mwatabasighania omo mighulu eyikalire eyo. Kandi Nathan akatasyabugha ati: “Omo mighulu eyikalire eyo, eBiblia muyabya ng’omwira w’amenge oyukatusikaya mutima n’eritusondola. Omo mwanya w’erihwerya amalengekania wetu oko maligho, mutwalengekania ngoko Yehova abya akatuwatikya eriyiyinia. Ekyo mukyaleka itwayiketera kundu ngoko Yehova akendilola embere erituwatikya omo biro ebikasa.”

17. Mwali wetu Helga mwakiranibwa ati? (Ulebaye n’epitsa.)

¹⁷ Abaghala n’abali betu nabo banganatukirania. Bati? Tukanaye oko ky’erileberyako kya mwali wetu Helga, owe Hongri. Omo myaka mingyi, mwalaba omo maligho mangyi, n’amaligho ayo mwaleka iniahangya-hangya n’eriyowa mo mundu bule. Aliwe, akabya abilengekania oko mighulu eyo, akalangira ngoko Yehova abya akakolesya abaghala n’abali betu b’omo ndeko erimukirania. Akabugha ati: “Mughulu wosi Yehova iniakaniwatikaya abilangira ngoko akaghala kaghe kamabikeha busana n’omubiiri waghe, erisulubirira omwana waghe oyo wabya alwere, na busana n’awandi maligho. Omo myaka 30 eyamabilaba, obuli kiro Yehova akaberereraya omulaghe wiwe w’erinikirania. Kangyi-kangyi akamba akaghala erilabira ebinywa by’abandi ebyuwene n’ebitsemesirye. Kangyi-kangyi ibakanitumira emesaje, akarte, kutse ebinywa by’erinisima omughulu nilaghire kubyo ko kutsibu.”

18. Twangakirania tuti abandi?

¹⁸ Tuwite olusunzo lw’erikirania abandi ng’oMungu wetu. Twangakola ekyo kyo tuti? Omw’ihulikirabo butsira eribatwa akalimi, omw’isikyabo mutima erilabira ebinywa byetu, n’eriwatikyabo omo nzira mbiriri-mbiriri. (Misyo 3:27) Tukayikasa erikirania abosi abanemughalwa, erihirako n’abatebatsuka erikolera oMungu. Omughulu abahimbani betu bakahikirawa n’amaligho, amakoni, kutse erihangya-hangya, tukabalenderera, itwabahulikirira, n’eribakanirya oko masako malebe w’omo Biblia awakasikaya mutima. Omughulu tukakola nga Yehova Mungu “oyukatukiranaya omo byosi,” tukawatikaya abaramya balikyetu eriyiyinia omo maligho, aliwe kandi twanganawatikya abatekolera oMungu eryanza eriminya bingyi okw’iye.—Mat. 5:16.

MUGHULU WOSI YEHOVA ASYATUWATIKYA

19. Yehova akatukoleraki, netu twanganamwigha tuti?

¹⁹ Yehova atsomene kutsibu abosi abamwanzire. Syalitulekeranaya omughulu tunemughalwa. Ngoko omubuti w’olwanzo atsomene omwana wiwe, Yehova naye atsomene abaramya biwe bataleghula. Akatusondola, akatuha ebyo tulaghireko kinya-mubiri, akatuteghaya, n’eritukirania. Tukakola nga Tata wetu w’elubula ow’olwanzo omughulu tukawatikaya abandi n’eribasikya mutima omo mighulu eyikalire. Nomo twangalaba omo maligho awali ati, twanganikirirya ngoko Yehova ane haghuma netu. Abiritulagha ati: “Sigubahe, kusangwa indi haguma nawe.” (Isa. 41:10) Omulaghe oyu amaleka itwikirirya kundu ngoko Yehova syangatulekerania n’ahake.