EBYO ABALWANA N’ABAMBESA BAKAYIBULAYA
EBiblia yanganiwatikya yiti?—Ekitsweka 1: Uminye eBiblia yaghu yo ndeke
“Monayikasa erisoma eBiblia, aliwe monaluha busana n’obunene bwayo!”—Briana, ow’emyaka 15.
Ukanayowa utya? Omwatsi ono akendikuwatikya!
Erisoma eBiblia liwite ndundi yahi?
Erisoma eBiblia likanakuletera obulundu? Byamabya bitya, oyo si mwatsi mugheni. Wanganalangira eBiblia mo kitabu ky’ehiyani hingyi kutsibu ehilabire oko 1 000 eyihandikire omo hihandiko hike-hike butsira pitsa. Wanganalangira uti omo mwanya w’erisoma eBiblia kwanya iwakwama etelevizyo n’esyovideo!
Aliwe terilengekania oko kino: wamabibughula akasanduku akalimo ebindu by’obughuli bya kera, ahate eritika-tika ighukendyanza eriminya nga kalimoki.
EBiblia ko yine ng’akasanduku ako. Yirimo amenge awangasosekanibwa n’ebindu by’obughuli, awangakuwatikya
Eriyisogha ndeke
Erihulikirirana n’ababuti baghu
Eribana abira abuwene
Eriminya ekyo wangakola omughulu wamahangya-hangya
Ekitabu kya kera ekyo kyanganatasyawatikya kutsibu kiti oko mughulu wetu ono? Kundi ‘Amasako gosi oMungu yo wategekanayago.’ (2 Timoteo 3:16) Ekyo n’ibughambu amahano awali omo Biblia akalua oko mundu w’amenge manene kutsibu.
Ebiblia yiri ng’akasanduku akalimo amenge w’obughuli bunene
Nangasoma eBiblia yo nyiti?
Enzira y’erimbere: Usome eBiblia eritsuka oko mwanzo erihika oko mwiso. Ekyo kikendikuwatikya eriminya enzumwa ngulu y’eBiblia. Hali nzira nyingyi sy’erisoma eBiblia. Tulebaye esibiri sya kusyo:
Wanganasoma ebitabu 66 by’eBiblia ngoko binatondekene, eritsuka oko Enzuko erihika oko Eribisulirwa.
Wanganasoma eBiblia omw’itondekania emighulu—n’ibughambu omw’ikwama omughulu ogho emyatsi yakolekako.
Erihano: Enyongeza A7 eyiri omo Tafsiri ya Ulimwengu Mupya yikakanganaya emyatsi mikulu-mikulu y’engebe ya Yesu y’oko kihugho.
Enzira y’akabiri: Usondaye ebilebirye obulema bulebe obo uli nabo. Ng’eky’erileberyako:
Unanzire eribana abira abangayiketerwa? Usome omwatsi wa Yonatana na Dawidi. (1 Samweli, ekihande 18-20) Neryo usondaye eriminya Dawidi ng’abya n’emibere yahi eyuwene eyaleka Yonatana inyamutsemera.
Unanzire eriwatya obutoki bwaghu bw’erikinda erilengwako? Usome omwatsi owakakanaya oko Yosefu ngoko akinda erilengwako. (Enzuko, ekihande 39) Neryo ukolesaye ekitswe “Ngoko wangakinda erilengwako. . . Yosefu—Ekihande 1” na “Mwatsongerwa eby’amabehi! Yosefu—Ekihande 2” utoke eribana esyosomo esyangakuwatikya esiri omo mwatsi oyo.
Unanzire eriminya omusabe ng’angakuwatikya ati? Usome omwatsi wa Nehemia. (Nehemia, ekihande 2) Neryo ukolesaye ekitsweka “OMungu mwasubirya oko misabe yiwe” utoke eribana omo mwatsi oyo mw’esyosomo esyangakuwatikya.
Erihano: Omughulu ukasoma eBiblia, uyikase eribya ahate olukanda, utoke erihira amalengekania oko ebyo ukasoma.
Enzira y’akasatu: Usombole omwatsi mulebe kutse olwimbo lulebe oluhandikire omo Biblia, neryo iwasomagho n’erilebya ng’akulebirye ati. Wabisomagho, iwayibulya amabulyo ng’ano:
Ekyaleka Yehova inyahira omwatsi oyu w’omo Biblia niki?
Amanyighisyaki oko mibere ya Yehova n’oko nzira yiwe y’erikola mw’emyatsi?
Nangakolesyagho nyiti omw’ibyaho lyaghe?
Erihano: Ukolesaye e Tafsiri ya Ulimwengu Mupya utoke eribana esyovideo, amakarte, n’eyindi myatsi eyikendikuwatikya eryowa ndeke ebyo ukasoma omo Biblia.