Mubambalyabo ebiminyikalo by’erangyi y’ekisumbu
Maud ali omo kihugho kye France kandi akakola omubírí w’eriwatikya abana abali n’obulema omughulu bali ekalasi. Lino-lino, mwakwama abakolo b’omo kalasi kalebe bakakangiriribwa emyatsi eyilebirye eritibwa ry’Abayahudi elyakolawa omo syokambi sy’amaghali sy’Abanazi. Omughalima mwabugha ati ebiminyikalo bilebe byabya bikasonerwa oko syongyimba sy’ababya babohirwe, kandi ati erangyi y’ekiminyikalo ekyo omundu oyubohirwe abya akambala kyabya kikaleka ibaminya ng’ali omo kambi mo busanaki.
Akakania oko kiminyikalo ky’erangi y’ekisumbu, omughalima mwabugha ati: “Ngalengekanaya nyiti ababya bakambala ekiminyikalo ky’erangi y’ekisumbu babya bandu abakakola emyatsi y’engyingo n’abandu b’olubuto lughumerera.” Akalasi kabere kahwa, Maud mwayakania n’omughalima oyo n’erimubwira ngoko ekiminyikalo ky’erangi y’ekisumbu kyabya kiminyisyo ekyabya kikawatikya erikakangania Abimiri ba Yehova.a Mwamubwira ati akendimuletera ebikakanaya oko mwatsyi oyo ko buli. Omughalima mwaligha, kandi mwamusaba ati akanaye oko myatsi oyo embere sy’abakolo.
Bakakania oko mwatsi mughumerera oyo, aliwe omo kandi kalasi, oghundi mughalima mwakolesya akarte akaliko ebiminyisyo mbiriri-mbiriri ebyo ababya babohirwe omo kambi babya bakambala. Akarte ako kabya kakakangania ndeke-ndeke ngoko ekiminyikalo ky’erangi y’ekisumbu kyabya kikahirwa oko syongyimba sy’Abimiri ba Yehova. Akalasi kabere kahwa, Maud mwamubwira ati akendimuletera ebikakanaya buli oko mwatsi oyo. Mwaligha, kandi naye mwasaba Maud ati akanaye oko omwatsi oyo embere sy’abakolo.
Maud anawite oko bitsapo bisatu ebyo akolesaya
Maud mwateghekania omukania w’esyodakika 15. Abere akasonda eritsuka erikania n’akalasi k’erimbere, omughalima mwamubwira ati akolesaye esaha nguma eyo bangakolesirye eryigha! Maud mwatsuka erikangania evideo eyikakanganaya ngoko Abanazi babya bakaghendererya Abimiri ba Yehova. Evideo yabere yahika ahakakanganaya ngoko Abanazi mubalusya abana 800 oko babuti babo ababya Bimiri ba Yehova, Maud mwimania evideo n’erisoma ebyo abana basatu ba kubo bakabugha. Evideo yabere yabihwa, Maud mwasoma ebaruha eyo Mwimiri wa Yehova mulwana w’omo Autriche, oyukahulawamo Gerhard Steinacher ahandika oko 1940. Omo baruha eyo, omulwana w’emyaka 19 oyo akalagha ababuti biwe embere sy’eritibwa n’Abanazi.b
Maud mwayalabya omukania wiwe oyo n’omo kandi kalasi. Busana n’obutubaha bwiwe, lino abaghalima babiri abo bakabya bakangirirya oko sy’okambi sy’amaghali esy’Abanazi, rero bakakanganaya ngoko Abimiri ba Yehova babya omo bandu ababohawa.
a Omo Mwalwa w’Akabiri w’Ekihugho kyosi, Abimiri ba Yehova omo Bujerumani, [ababya bakahulwa mo Bibelforscher (Abigha b’eBiblia)], mubabohwa busana n’erighana erisiyika obutabali bwa Banazi.
b Gerhard Steinacher mwatswerwa oluholo busana n’erighana erikola omubírí w’obusuda omo Bujerumani. Omo baruha yiwe akalagha ekihanda kiwe, akahandika ati: “Nyikine mwana. Ngendikinda erilengwako eri oMukama iyulyamba akaghala, n’ekyo kyo ngamusaba.” Ekiro ekikwamire Gerhard mwitibwa. Okw’isinda yiwe kuli ebinywa bino: “Mwahola busana n’erisikya oMungu.”