Busanaki aBimiri ba Yehova bakibuka akalyo k’erigholo-gholo k’oMukama omo nzira eyisighene n’ey’ebindi bisomo?

Tukakwama ebyalaghiro by’eBiblia tukakola Akalyo k’Omukama akerigholo-gholo, akakanahulawamo “emesa yʼOmukama,” kutse “erirya ry’oMukama,” n’Eryibuka obuholo lwa Yesu. (1 Abanya Korinto 11:20; NTN62) Aliwe emyatsi eyo ebindi bisomo bikirirye n’eyo bikakola oko mwatsi oyo, sibihambane n’eBiblia.

Busanaki?

Ekikaleka itwakola Akalyo k’Omukama aky’erigholo-gholo ni busana n’eryibuka Yesu, tukakangania erisima lyetu oko ebyo atukolera, nibughambu eriyiherera busana netu. (Matayo 20:28; 1 Abanya Korinto 11:24) Eryibuka oluholo lwa Yesu si sakramenti, kutse mitsye milebe y’ebisomo eyikaleka oMungu inyasima omundu n’erimughanyira amalolo wiwe.a EBiblia yikatukangiriraya yiti amalolo anganaghanyirwa erilabira erikirirya Yesu, butsira erilabira emitsye milebe y’ebisomo.​—Abanya Roma 3:25; 1 Yoane 2:1, 2.

Kangahi?

Yesu mwasaba abigha biwe eribya bakyibuka Akalyo k’Omukama ak’erigholo-gholo, aliwe mwatabugha nga b’abye bakakolako kangahi. (Luka 22:19) Abaghuma bakalengekana bati ni k’eryibukwa kaghuma oko mwisi, n’abandi bati kaghuma oko yenga, n’abandi bati obuli kiro, n’abandi bati ngendo nyingi obuli kiro, kutse ngoko mundu angatoka.b Aliwe hane emyatsi eyo tutolere erilengekaniako.

Yesu mwatsukisya Akalyo k’oMukama ak’erigholo-gholo omo kiro ky’aBayahudi eky’erirya eRikiruka [ePasaka], neryo mwahola oho nyuma omo kiro ekyo. (Matayo 26:1, 2) Ekyo siyabya mbandano. Amasako akasosekanaya eriyiherera lya Yesu n’ekyana kyʼembuli kyʼErikiruka [ky’ePasaka.] (1 Abanya Korinto 5:7, 8) E Pasaka iyikyibukawa kaghuma oko mwaka. (Erilwayo 12:1-6; Abalawi 23:5) Kobine bitya n’Okwibuka oluholo lwa Yesu. Abakristo by’erimbere ibakyibuka Oluholo lwa Yesu kaghuma oko mwaka,c n’abimiri ba Yehova bakakwama olughobe olo oluseghemere eBiblia.

Ekiro n’esaha

Ngoko Yesu akola kikatuwatikaya eriminya ekiro n’endambi y’erikola omuhindano w’Eryibuka oluholo lwa Yesu. Yesu mwatsukikya omwatsi oyo ekiro 14 Omwisi we Nisani, 33 M.W., eryuba lyabilenga, erikwamana n’akalendari ak’Abayuda ba kera. (Matayo 26:18-20, 26) Tukinalola embere eryibuka oluholo lwa Yesu obuli mwaka ekiro ekyo kyabihika, tukigha Abakristo by’erimbere.d

Nomo ekiro 14 Omwisi we Nisani, 33 M.W. kyabya kiro kye tano, obuli mwaka ekiro ekyo kyanganahika omo bindi biro by’eyenga. Tukakolesaya emighanzo eyabya yikakolesibwa oko mughulu wa Yesu, tutoke eriminya ekiro 14, Omwisi we Nisani nga kikenditoghera omo kiro kyahi, omo mwanya w’erikolesya akalendari k’Abayahudi ba munabwire.e

Obundu [omukati] n’ebinyu

Abere akatsukisya akalyo k’Omukama, Yesu mwakolesya obundu obutemo kihamya n’ebinyu by’erangyi y’engula, ebyasighalira oko kalyo k’ePasaka. (Matayo 26:26-28) Tukamwigha, netu tukakolesaya obundu [omukati] obutemo kihamya kutse kindi kindu n’ebinyu eby’erangyi y’omusasi ebititahirirwemo kindi kindu, butsira amaghetse owakalwa omo mulikiliki w’ebinyu kutse ebinyu ebirimo sukari n’eyindi myatsi.

Ebisomo bilebe bikakolesaya omukati owalimo ekihamya, aliwe omo Biblia, kangyi-kangyi ekihamia kikasosekanaya erilolo n’erihonda. (Luka 12:1; 1 Abanya Korinto 5:6-8; Abanya Galatia 5:7-9) Okwekyo, omukati owatemo kihamya kutse owatahirirwemo kindi kindu kyosi-Kyosi w’atolere erisosekania omubiri wa Yesu owate n’erilolo. (1 Petero 2:22) Oghundi mutsye owatahambene n’Amasako ry’erikolesya eyisande eyikalwa omo mulikiliki w’ebinyu eyiteyahya. Ebisomo bilebe bikakola bitya kundi babirighania abandu babo eripulya obwabu, omwatsi owatahambene n’Amasako.​—1 Timoteo 5:23.

Omukati n’ebinyu ni bisosekanio

Omukati owatemo kihamya n’ebinyu by’erangi y’engula ebikakolesibawa ekiro ky’Eryebuka oluholo lwa Yesu, bikasosekanaya omubiri n’omusasi wa Yesu. Sibiribinduka n’eribya mubiri na musasi wa Kristo ngoko abandi bakalengekanaya. Tulebaye amasako w’eBiblia awakaleka itwabugha tutya.

• Yesu amabya imwasaba abigha biwe erinywa omusasi wiwe, kwesi imwasababo eritendisikya omughambo w’oMungu owakaghanisaya erirya omusasi. (Enzuko 9:4; Emibiri 15:28, 29) Ekyo sikyangatokekana, kundi Yesu syangasabire abandi eritendisikya omughambo w’oMungu owakabugha ati omusasi abuyirire.​—Yoane 8:28, 29.

• Abigha bamabya imubanywa omusasi wa Yesu, syendibugha ati omusasi wiwe “akendyutika, nwt;” akakangania ngoko syalyaherera engebe yiwe.​—Matayo 26:28.

• Yesu mwayiha [mwayiherera] “engendo nguma” oko mughulu wosi. (Abaebrania 9:25, 26) Aliwe, omukati n’ebinyu byamabya ibikabinduka omubiri n’omusasi wa Kristo omughulu w’akalyo k’erigholo-gholo k’oMukama, kwesi abakalya kuko bakaherera Yesu esyongendo nyingi.

• Yesu mwabugha ati: “Mukole mutya erinyibuka,” aliwe bwatabugha ati: “Mukole mutya mukaniyerera.”​—1 Abanya Korinto 11:24.

Abakikiriraya bati omukati n’ebinyu bikabinduka kwenene-kwenene mo mubiri n’omusasi wa Yesu, bakabugha bati bikirirye ekyo kundi ebinywa bilebe by’emilondo milebe y’eBiblia bibuyire bitya. Ng’ekyerileberyako, esyombindula nyingyi sy’eBiblia sikabugha oko binyu siti: “Oyu ni musasi wage.” (Matayo 26:28) Aliwe, Ebinywa bya Yesu ebyo kandi byanganabindulwa biti: “Eki ni kisosekanio ky’omusasi waghe,” “Eki kikimanira omusasi waghe,” kutse “Eki kisosekanibwe n’omusasi waghe.”f Yesu mwakolesya enyinywa by’omusyo akasosekania ekindu n’ekindi, ngoko abya abeghere erikola.​—Matayo 13:34, 35.

Abakalya oko mukati n’erinywa oko binyu ni bahi?

Omughuku Abimiri ba Yehova bakakola omuhindano w’Eryebuka oluholo lwa Yesu, abakalya oko mukati n’eripolya oko binyu bakabya bake kutsibu. Busanaki?

Yesu mwatsukisya “Endagane nyihya-nyihya” akuta omusasi wiwe. Endaghane eyo muyimya omwanya w’endaghane ya kera eyo Yehova akola n’ekihanda kye Israeli. (Abaebrania 8:10-13) Abali omo ndaghane nyihya-nyihya eyo bakalya oko mukati n’erinywa oko binyu omughu w’omuhindano w’Eryibuka Oliholo lwa Yesu. Si b’Ababakristo bosi iyehe, aliwe “ababiribirikirwa” n’oMungu basa omo nzira y’embaghane. (Abaebrania 9:15; Luka 22:20) Abandu abo bakendisyatabala na Kristo, eBiblia yiti abandu 144 000 basa bo bawite olusunzo olo.—Luka 22:28-30; Eribisulirwa 5:9, 10; 14:1, 3.

Mbaghane n’“ekihyo kike” kyabandu abakendisyayatabala na Yesu, abangyi b’okw’itwe bimiri ba Yehova bali n’amaha aweribya b’oko “endeko nene” bakendisyabana engebe y’erikota oko kihugho. (Luka 12:32; Eribisulirwa 7:9, 10) Nomo abawite amaha w’erisyasighala oko kihugho sibalirya oko mukati n’erinywa oko binyu, bakahika oko muhindano w’Eryibuka oluholo lwa Yesu bakanganania erisima lyabo oko ekyo Yesu abakolera, akayiherera busana nabo.​—1 Yoane 2:2.