Wanganabyaho kera na kera

1. Erilengekania oko mulaghe wa Yehova ow’engebe y’erikota likaleka itwayowa tuti?

YEHOVA akalagha ati abakamowa basyabana “engebe yʼerikota.” (Rom. 6:23) Omughulu tukalengekanaya oko ebyo Yehova akatuha, oko kwenene tukamwanza kutsibu. Talengekanaoko kino: Tata wetu w’elubula atwanzire kutsibu, neryo sihali ekyangatughabula okw’iye.

2. Omulaghe ow’engebe y’erikota akatuwatikaya ati?

² Omulaghe w’oMungu ow’engebe y’erikota akatuwatikaya eriyiyinia omo maligho wetu wa munabwire. Nomo esyonzighu syetu syanganabugha siti sikenditwita, sitwangaleka erikolera Yehova. Busanaki? Ekighuma ky’oko myatsi eyikaleka itutaleka erikolera Yehova ni busana tunasi ngoko twamabihola itune bataleghula oko Yehova, iniakendisyatulubukya itunawite amaha w’eritendisyasyahola. (Yoa. 5:28, 29; 1 Kor. 15:55-58; Ebr. 2:15) Busanaki twanganikirirya ngoko kinatokekene okw’itwe eribyaho kera na kera? Tulebaye emyatsi eyikwamire.

YEHOVA ALIHO KERA NA KERA

3. Busanaki twanganikirirya ngoko Yehova anganatuwatikya erisyabyaho kera na kera? (Esyonyimbo 102:12, 24, 27)

³ Tunasi ngoko Yehova akendisyatuwatikya erisyabyaho kera na kera kundi iye yo nzuko y’engebe kandi ni wa kera na kera. (Esy. 36:9) Lebaya emilondo milebe eyikakanganaya ngoko Yehova atulaho kera na kera kandi ngoko akendisyabyaho kera na kera. Esyonyimbo 90:2 sikabugha siti Yehova ni wa “kera na kera.” N’ Esyonyimbo 102 nasyo sikakanaya oko mwatsi mughumerera oyo. (Soma Esyonyimbo 102:12, 24, 27.) N’omuminyereri Habakuki mwahandika oko tata wetu w’elubula ati: “Uwe Yehova, oMungu wage, Oyubuyirire wage, suli wʼErikota kwehĩ? Siwendisyahola.”​—Hab. 1:12.

4. Linatolere itwahangya-hangya kyamabitukalako eriligha ngoko Yehova atulaho erilua kera na kera? Kanaya.

⁴ Kikanakukalako eriligha ngoko Yehova aliho erilua “kera na kera”? (Isa. 40:28) Kikanakala n’oko bandi bandu bangyi eriligha omwatsi oyo. Elihu mwabugha atya oko Mungu: “Emiganzo yʼemyaka yiwe sirisomboleka.” (Yobu 36:26) Aliwe eritendiowa omwatsi wo ndeke sikibughire kiti omwatsi oyo si w’ekwenene. Ng’eky’erileberyako, twanganabya isitwasi omuliro owakakaya esyotala ng’akakola ati, aliwe ekyo kinasondire eribugha kiti omuliro oyo syali? Iyehe, ko bite bitya! Kutya, itwe bandu twanganataluka eriminya ndeke ngoko Yehova atulaho erilua kera na kera kandi ngoko akendisyabya inyaneho kera na kera. Aliwe ekyo sikisondir’ibugha kiti oMungu syaliho erilua kera na kera. OMuhangyiki syalitwiriraya oko ebyo twangaminya kutse ebyo tutetwangaminya. (Rom. 11:33-36) Kandi atulaho kera embere sy’ebindu byosi ebiri omo buhangwa​—ng’eryuba n’esyongununu. Twikirirye ngoko Yehova “Ni ye oyo wahangika ekihugo omo maka wuwe.” Ni kwenene, atulaho erilua kera na kera, embere ‘sy’erisanza olubula omwʼiminya liwe.’ (Yer. 51:15; Emi. 17:24) Ni ghundi mwatsi wahi owangaleka itwikirirya ngoko kinatokekene okw’itwe eribyaho kera na kera?

MOTWAHAGNYIKWA ERISYABYAHO KERA NA KERA

5. Ababuti betu b’erimbere babya n’amaha wahi?

⁵ Ebindu byosi ebyo Yehova ahangyika byendibya bikahola erilusyako abandu. Mwabumba omundu n’obutoki bw’embaghane obw’eritendihola. Aliwe Yehova mwabwira Adamu ati: “Nikwa oko biguma byʼomuti wʼeriminya ekibuya nʼekibi, susyerya kubyo. Kusangwa oko kiro wasyalya kubyo wasyahola kundu.” (Enz. 2:17) Adamu na Eva baly’owa Yehova, sibendihola. Twanganabugha tuti Yehova anganalighirebo erirya oko bighuma by’“omuti wʼengebe.” Ekyo kyangakanganirye ngoko Yehova amalighirabo ‘erikota.’b​—Enz. 3:22.

6-7. (a) Ni yindi myatsi yahi yo yikakanganaya ngoko abandu mobatabumbwa busana n’eribya bakahola? (b) Ni myatsi yahi eyo wanzire erisyakola? (Lebaya esyopitsa.)

⁶ Abak’igha obongo babirifumbula ngoko obongo bwetu buwite obutoki bw’eribika emyatsi mingyi kulenga eyo tuk’igha omo ngebe yetu lino. Ekyo kikaswekaya kutsibu!” Omo 2010 egazeti Scientific American Mind moyabugha yiti obwongo bw’omundu buwite obutoki bw’erihamba emyatsi eyangaghonera omo video y’esyosaha milioni 3. Omundu amakwama evideo eyo inyakendibugha emyaka 300 akakwamayo. Aliwe obongo bwetu bwanganabya n’obutoki bunene kulenga n’obo. Ekyo kikakanganaya ngoko Yehova mwabumba obongo bwetu n’obutoki bw’eribika emyatsi mingyi kulenga eyo tuk’igha omo myaka 70 kutse 80 ey’eribyaho lyetu.​—Esy. 90:10.

⁷ Kandi, Yehova mwatubumba n’engumbu nene y’eryanza eribyaho. EBiblia ikakania oko bandu, yikabugha yiti oMungu “abirihira erikota omo mutima wabo.” (Omug. 3:11) Ekyo ni kighuma ky’oko bikaleka itwalangira oluholo mo nzighu yetu. (1 Kor. 15:26) Twamabilwala, tukanalw’itwayilekerania n’erilindirira oluholo kwehi? Iyehe. Kangyi-kangyi, tukalw’itwayasungana n’omunganga kutse itwasondya edawa eyangatulamya. Oko kwenene, tukakola ekyosi-kyosi ekitolere situhole. N’omughulu omundu oyo twanzire akahola, abye mulere kutse oyukulire, tukayowa muhanda oko mughulu muli. (Yoa. 11:32, 33) Twangan’igha kera na kera kandi twanzire eribyaho kera na kera kundi Omuhangyiki wetu w’olwanzo yo watubumba atya. Oko kwenene, akendisyatuwatikya erisyabyaho kera na kera. Aliwe hane n’eyindi myatsi mingyi eyikaleka itw’ikirirya ngoko twanganabyaho kera na kera. Neryo tulebaye oko ebyo Yehova akola kera n’oko ebyo akakola munabwire ebikakanganaya ngoko syalyabindula erisonda riwe ry’erimbere.

ERISONDA RYA YEHOVA SIRIRIRYATABINDUKA

8. Isaya 55:11 yikatukangirirayaki oko risonda rya Yehova okw’itwe?

⁸ Nomo Adamu na Eva banakola erilolo n’eriletera abana babo b’oluholo, Yehova mwatabindula erisonda liwe. (Soma Isaya 55:11.) Akinanzire abandu bataleghula ibabana engebe ya kera na kera. Ekyo ni kwenene kundi Yehova abiribugha, n’erikola eyindi myatsi busana n’eriberererya erisonda riwe.

9. OMungu abirituha omulaghe wahi? (Danieli 12:2, 13)

⁹ Yehova abirilagha ati akendisyalubukya abaholi n’eribaha akanya ak’eribyaho kera na kera. (Emib. 24:15; Tito 1:1, 2) Omutaleghula Yobu, aby’ikirirye ngoko Yehova alindirire n’omuhwa erisyalubukya abaholi. (Yobu 14:14, 15) Omuminyereri Danieli mwabugha ngoko abandu bakendisyalubukibwa n’erihabwa akanya k’eribyaho kera na kera. (Esy. 37:29; soma Danieli 12:2, 13.) N’Abayahudi babya ibanasi ngoko Yehova akendisyahemba abigha biwe bataleghula omo “ngebe yʼerikota.” (Luka 10:25; 18:18) Yesu mwakania kangyi-kangyi oko mulaghe oyo, kandi naye iyuwene-wene mwalubukibwa na Tata wiwe.​—Mat. 19:29; 22:31, 32; Luka 18:30; Yoa. 11:25.

10. Erilubukibwa ly’abandu eryabya kera likakanganayaki? (Ulebaye epitsa.)

¹⁰ Yehova yukaha abandu b’engebe kandi awite obutoki bw’erisubya abandu b’oko ngebe. Mwaha omuminyereri Eliya y’obutoki bw’erilubukya omughala w’omukwakali owe Zarefati. (1 Bam. 17:21-23) Enyuma sy’aho, omo buwatikya bw’oMungu, omuminyereri Elisa naye mwalubukya omulwana w’omukali mughuma, Omusunemu. (2 Bam. 4:18-20, 34-37) Erilubukibwa ly’abandu abo n’abandi okw’aho, likakanganaya ngoko Yehova awite obutoki bw’erisubya abandu oko ngebe. Omughulu Yesu abya oko kihugho, mwakangania ngoko Tata wiwe abirimuha obutoki obo. (Yoa. 11:23-25, 43, 44) Lino, Yesu ane omo lubula kandi abirihebwa “ehamuli yosi omo lubula n’omo kihugho.” Okw’ekyo, n’iye yutolere eriberererya omulaghe owakabugha ati “abosi abali omo masinda [w’eryibuka]” bakendisyalubukibwa ibalindirira eribyaho kera na kera.​—Mat. 28:18; Yoa. 5:25-29.

11. Embanulo yikaleka yiti ikyatokekana okw’itwe erisyabyaho kera na kera?

¹¹ Busanaki Yehova mwaligha Mughala wiwe mwanze ahole oluholo olukaluma? Yesu mwakangania ekyaleka, omughulu abugha ati: “Kusangwa oMungu mwanza ekihugho ky’atya, kyaleka iniaha Mughala wuwe, Ekyusa kiwe, neryo oyukamwikiriraya syahere, nikwa abye n’engebe y’erikota.” (Yoa. 3:16) Eriha Mughala wiwe mo mbanulo eriswika amalolo wetu, oMungu mwaleka ikyatokekana okw’itwe eribana engebe y’erikota. (Mat. 20:28) Omukwenda Paulo mwakania omo kikuhi oko kitswe ky’omughaso ekyo eky’erisonda ly’oMungu omughulu ahandika ati: “Kusangwa ngoko oluholo lwahika busana n’omundu mughuma, litya erilubuka oko baholi molyahika busana n’omundu mughuma. Kandi ngoko abandu bosi ba Adamu bakahola, litya abosi ababirimatikana na Kristo basyalubukibwa omo ngebe.”​—1 Kor. 15:21, 22.

12. Obwami bukendisyaleka buti erisonda lya Yehova busana netu iryabererera?

¹² Yesu mwakangirirya abigha biwe ati basabe bati Obwami bw’oMungu bwase kandi bati erisonda liwe likoleke oko kihugho. (Mat. 6:9, 10) Abandu eribyaho kera na kera oko kihugho kiri omw’isonda ly’oMungu. Yehova eriberererya ekyo, abirisombola Mughala wiwe yo Masiya eribya Mwami w’Obwami bwiwe. Hamabilaba emyaka mingyi oMungu inyanemusombola abandu 144000 erilua oko kihugho batoke erikola haghuma na Yesu eriberererya erisonda ly’oMungu.​—Erib. 5:9, 10.

13. Yehova anemukolaki lino, naghu ekyo kikakusaba erikolaki?

¹³ Lino Yehova anemuhindania “endeko nene” y’abandu n’eribegheryabo akateghekabo erisyabya ndulani sy’omo Bwami bwiwe. (Erib. 7:9, 10; Yak. 2:8) Abandu aba nomo bane omo kihugho ekighabene busana n’abandu eripona abandi n’amalwa, bakayikasa eriyihighula oko mihanda yosi y’eripona abandi. Emighendere yabo yikakanganaya ko bane muhesa emiyali yabo mw’isuka omo nzira y’erisosekania. (Mika 4:3) Omo mwanya w’erisangira omo malwa awabir’ita abandu bangyi, ibo banemuwatikya abandu eribana “engebe eyiri ngebe kundu” bakabakangirirya oko Mungu w’ekwenene n’erisonda liwe. (1 Tim. 6:19) Abatunga babo banganalwa nabo kutse ibabulirwa esyofranga busana n’eribya oko luhande lw’Obwami bw’oMungu, aliwe Yehova akakola ekyosi babane ebyo balaghireko. (Mat. 6:25, 30-33; Luka 18:29, 30) Emyatsi eyo yikakanganaya ngoko Obwami bw’oMungu ni butabali kundu kandi ngoko bukendilola embere eriberererya erisonda lya Yehova.

OMUGHULU OGHUWENE OWAKASA

14-15. Yehova akendisyaberererya ati omulaghe wiwe ow’erihwerekererya oluholo?

¹⁴ Lino, Yesu ni Mwami omo Bwami bw’oMungu elubula, kandi akendisyaberererya ebyosi ebyo Yehova abirilagha. (2 Kor. 1:20) Eritsuka oko 1914, Yesu anemukinda esyonzighu siwe. (Esy. 110:1, 2) Hakisiya hake iye n’abakatabala haghuma naye, ibabughirira erikinda lyabo n’eritoghotya abandu babi.​—Erib. 6:2.

¹⁵ Omo butabali bwa Yesu obw’emyaka elfu nguma, Yesu akendisyalubukya abaholi, n’erikolya abandu abakowa oMungu okw’ihika-hikana. Enyuma sy’erilengwako ry’enduli, abo Yehova akendisyalangira mo batunganene, “basyikala omo kihugho mo buholo n’erisighalyakyo kera na kera.” (Esy. 37:10, 11, 29) Eky’obutseme, oluholo, “enzighu y’enyuma, yikendisyahwerekereribwa.”​—1 Kor. 15:26.

16. Omwatsi owatolere eritukuna erikolera Yehova ni wahi?

¹⁶ Omwatsi ono amabituwatikya erilangira ngoko Ekinywa ky’oMungu kyo kikaleka itwayiketera ndeke-ndeke ngoko tukendisyabyaho kera na kera. Amaha ayo anganatuwatikya erisighala bataleghula omo mighulu eyikalire eno ey’ebiro by’enduli. Eryanza erisyabyaho kera na kera w’ate mwatsi mukulu owakaleka itwanza eritsemesya Yehova. Aliwe, omwatsi mukulu owakaleka itwanza eribya bataleghula oko Yehova na Yesu, ni kundi tubanzire kutsibu. (2 Kor. 5:14, 15) Olwanzo olo lukatukuna eriyikasa erigha emibere yabo n’eribwira abandi oko maha agho tuwite. (Rom. 10:13-15) Omughulu tukayikasa eritsomana abandi n’eribawatikya, tukabya bandu abo Yehova anzire ibabya bira biwe kera na kera.​—Ebr. 13:16.

17. Litolere obuli mundu iniayisogha erikolaki? (Matayo 7:13, 14)

¹⁷ Tunemwendisyabya omo kati-kati k’abandu abakendisyabana engebe y’erikota? Yehova abirituha akanya k’erisyabanayo. Litolere itwayisogha lino erisighala omo nzira eyikalolaya oko ngebe. (Soma Matayo 7:13, 14.) Engebe y’erikota yikendisyabya yiti? Tukendisyakania okw’ekyo omo mwatsi owakwamire.