Markosi
5 Ngemva kwalokho bayamela ngaphetjheya kwelwandle esifundeni samaGerasene. 2 UJesu uthe angahlika esikepeni, wahlangana nendoda enedimoni ivela emathuneni.* 3 Beyithanda ukuhlala emathuneni, bekube mhlokho, akunamuntu namunye obekakghona ukuyibopha ayiqinise, beyibhalela ngitjho neenketani. 4 Ibotjhwe kanengi ngamakhamandela nangeenketani, kodwana beyiqhasula iinketani iphule namakhamandela; akunamuntu obekanamandla wokuyihlula. 5 Ubusuku nemini, beyirhuwelela emathuneni neentabeni izisike nangamatje. 6 Kodwana ithe nayibona uJesu kudanyana, yagijima yaguqa phambi kwakhe. 7 Yarhuwelela ngelizwi elikhulu yathi: “Ungifunani Jesu, Ndodana kaZimu oPhezukoke? Ngikufungisa ngoZimu bona ungangitlhorisi.” 8 Yarhuwelela njalo ngombana uJesu bekathi kilo: “Phuma kuye, wena dimoni ndina.” 9 Kodwana uJesu wayibuza wathi: “Ungubani ibizo lakho?” Yaphendula yathi: “NginguLegiyona,* ngombana sibanengi.” 10 Yaphikelela irabhela uJesu bona angaqothi amadimoni lawo enarheni leyo.
11 Bekunomhlambi omkhulu wezavukazana udla lapho entabeni. 12 Ngalokho amadimoni amncenga athi: “Sithumela ezavukazaneni, bona singene kizo.” 13 Wawavumela. Amadimoni aphuma-ke angena ezavukazaneni, umhlambi woke wagijimela ngeliweni wadlhumukela ngelwandle, izavukazana ezingaba zi-2 000, zacwila ngelwandle. 14 Abelusi bazo babaleka babika lokhu edorobheni nemaphandleni, abantu beza bazokubona okwenzekileko. 15 Ngalokho baya kuJesu babona indoda ebeyingenwe lidimoni, leya ebeyineLegiyona, ihlezi lapho yembethe, ibuyelwe namkhumbulo, abantu basaba khulu. 16 Godu, labo abazibonele ngawabo babahlathululela ukuthi kwenzekeni endodeni ebeyinedimoni nezavukazaneni. 17 Yeke barabhela uJesu bona akhambe esifundeni sabo.
18 Uthe nakasakhwela ngesikepeni, indoda ebeyingenwe lidimoni yamncenga ibawa ukukhamba naye. 19 Kodwana uJesu akhenge ayivumele, wathi kiyo: “Iya ekhaya eenhlotjeni zakho, uzibikele zoke izinto uJehova akwenzele zona nomusa akwenzele wona.” 20 Indoda le yakhamba yathoma ukutjhumayela eDekapolisi* ngazo zoke izinto uJesu ayenzele zona, yeke boke abantu barareka khulu.
21 Godu ngemva kobana uJesu ayamele eligwini elingaphetjheya ngesikepe, isiqubuthu esikhulu sabuthana kuye, bekaseduze nelwandle. 22 Omunye wabaphathi abangamele isinagogo, ebekuthiwa nguJayirosi, weza, wathi nakambonako, waguqa phambi kwakhe. 23 Wamncenga kanengi athi: “Umntazanyanami ugulela ukufa. Ngibawa uze uzombeka izandla bona aphole bekaphile.” 24 Khonokho uJesu wakhamba naye, isiqubuthu esikhulu samlandela sisunduzelana kuye.
25 Khonapho bekunomfazi obesekuminyaka eli-12 aphethwe bulwelwe bokuphopha iingazi. 26 Wahlunguphazwa khulu bodorhodere abanengi bewaphelelwa ngikho koke agade anakho, kodwana khenge alapheke, kunalokho, ukugula kwakhe kwarhagala khulu. 27 Kuthe nakezwa umbiko ngoJesu, wakhukhutha ngemva kwakhe hlangana nesiqubuthu, wakghwatha isambatho sakhe sangaphandle, 28 ngombana bekasolo athi: “Nangingakghwatha isambatho sakhe sangaphandle nje kwaphela, ngizokuphola.” 29 Khonokho ukuphopha kwakhe iingazi kwaphela, wezwa nemzimbenakhe ukuthi ulatjhiwe ekuguleni okubuhlungu.
30 Msinyana uJesu walemuka bona amandla aphumile kuye, wajika waqala isiqubuthu wasibuza wathi: “Ngubani okghwathe isambatho sami sangaphandle?” 31 Abafundi bathi kuye: “Uyasibona isiqubuthu sisunduzelana kuwe, kodwana ubuza ukuthi, ‘Ngubani ongikghwathileko?’ ” 32 Nokho, wathalaza afuna ukubona ukuthi ngubani omkghwathileko. 33 Azi ukuthi kwenzekeni kuye, umfazi lo weza kuJesu ahlengezela ngokwesaba, waguqa phambi kwakhe wamtjela loke iqiniso. 34 Wathi kuye: “Ndodakazi, ukukholwa kwakho kukupholisile. Khamba ngokuthula uphole ekuguleni kwakho okubuhlungu.”
35 Kuthe asakhuluma, amanye amadoda avela emzini womphathi ongamele isinagogo eza athi: “Indodakazakho ihlongakele! Usamtshwenyelani uMfundisi?” 36 Kodwana uJesu wakuzwa abakutjhoko wathi kumphathi ongamele isinagogo: “Ungasabi, kholwa nje kwaphela.” 37 Nje-ke akhenge avumele nanyana ngubani bona amlandele ngaphandle kwakaPitrosi, uJakopo noJwanisi umfowabo lakaJakopo.
38 Kuthe nabafika emzini womphathi ongamele isinagogo, wabona kunesiphithiphithi nabantu abakhihla isililo esikhulu. 39 Wangena ngaphakathi, wathi kibo: “Kubayini nilila nibanga nesiphithiphithi? Umntwana lo akakahlongakali kodwana ulele.” 40 Nabezwa lokho bamhleka ubudlhadlha. Kuthe sekabakhuphele boke ngaphandle, wathatha uyise nonina lomntwana nalabo abakhamba naye, wangena lapho umntwana akhona. 41 Wabamba isandla somntwana, wathi kuye: “Thalitha kumi,” okutjho ukuthi, “Mntazanyana, ngithi kuwe, vuka!” 42 Khonokho umntazana wavuka wathoma ukukhamba. (Bekaneminyaka eli-12.) Nababona lokho, akhenge bakghone ukuzibamba ngombana bebathabe khulu. 43 Kodwana wabayala ngokubuyelelweko bona bangatjeli muntu ngalokhu, nokuthi banikele umntwana loyo ukudla.