IsAmbulo
1 Isambulo ngoJesu Krestu, asinikelwe nguZimu, ukutjengisa iinceku zakhe izinto ekufuze zenzeke msinyana. Wathumela ingilozakhe begodu wasiveza ngeembonakaliso asebenzisa yona encekwinakhe uJwanisi, 2 onikele ubufakazi elizwini elivela kuZimu nebufakazini obuvela kuJesu Krestu, iye, ezintweni zoke azibonileko. 3 Uyathaba loyo ofunda ngokuzwakalako nalabo abezwa amezwi wesiphorofidwesi nabalalela izinto ezitlolwe kiso, ngombana isikhathi esibekiweko sitjhidele.
4 UJwanisi emabandleni alikhomba asesifundeni se-Asiya:
Kwangathi ningaba nomusa omkhulu nokuthula okuvela “kiloyo okhona nobekakhona nozako,” nemimoyeni elikhomba ephambi kwesihlalo sakhe sobukhosi, 5 nakuJesu Krestu, “uFakazi oThembekileko,” “izibulo elivela kwabafileko,” “uMbusi wamakhosi wephasi.”
Kuye osithandako nositjhaphulula ezonweni zethu ngeengazi zakhe— 6 usenze saba mbuso, saba baphristi kuZimakhe, uBaba—iye iphazimulo namandla awabe kuye ngokungapheliko. Amen.
7 Qalani! Uza ngamafu, begodu woke amehlo azombona, nalabo abamgwazako; nazo zoke iintjhaba zephasi zizozibetha zisesizini ngebanga lakhe. Amen.
8 “Ngingu-Alfa no-Omega,”* kutjho uJehova uZimu, “loyo okhona nobekakhona nozako, uMninimandla woke.”
9 Mina Jwanisi, umfowenu nomhlanganyeli nani esizini, embusweni nekukghodlheleleni njengomlandeli kaJesu, bengisesihlengeleni esibizwa ngokuthi yiPatmosi ngebanga lokukhuluma ngoZimu nokunikela ubufakazi malungana noJesu. 10 Ngokuphefumulelwa ngaba selangeni leKosi, ngezwa ngemva kwami ilizwi elinamandla njengebhorompita, 11 lithi: “Okubonako, kutlole emsongweni begodu ukuthumele emabandleni alikhomba: e-Efesu, eSmirna, ePhergamu, eThiyathira, eSardisi, eFiladelfiya neLawodikeya.”
12 Ngaphenduka bona ngiqale ukuthi ngubani ebekakhuluma nami, nangiphendukako, ngabona amalithi weembani wegolide alikhomba, 13 hlangana namalithi weembani ngabona othileko onjengendodana yomuntu, ambathiswe isambatho esifika phasi eenyaweni begodu abophe ibhande legolide esifubeni sakhe. 14 Ihlokwakhe neenhluthu zakhe bezimhlophe njengewulu emhlophe, njengegabhogo, namehlwakhe bewanjengelangabi lomlilo, 15 iinyawo zakhe bezinjengekhopha etsengisiweko nayincibilikiswa emlilweni omkhulu, nelizwi lakhe belinjengetjhada lamanzi amanengi. 16 Bekaphethe iinkwekwezi ezilikhomba ngesandla sakhe sokudla, emlonyenakhe kuphuma isabula ebukhali, ede, esika mahlangothi womabili, ubuso bakhe bebunjengelanga nalifike esitlhorini sokuphazimula kwalo. 17 Ngithe nangimbonako, ngawela eenyaweni zakhe njengofileko.
Wabeka isandla sakhe sokudla phezu kwami wathi: “Ungasabi. NgingewokuThoma newamaSwaphela, 18 nophilako, begodu khengafa, kodwana qala! Ngiphila phakade naphakade, begodu ngineenlodlhelo zokufa nezeThuna. 19 Nje-ke tlola phasi izinto ozibonileko, nezinto ezikhona nje, nezinto ezizokwenzeka ngemva kwalokhu. 20 Malungana nefihlo ecwengileko yeenkwekwezi ezilikhomba owazibona ngesandleni sami sokudla neyamalithi weembani wegolide alikhomba: Iinkwekwezi ezilikhomba zijamele iingilozi zamabandla alikhomba begodu amalithi weembani alikhomba ajamele amabandla alikhomba.