Lukasi
6 Nje-ke wadlula phakathi kwamasimu wekoroyi ngesabatha, abafundi bakhe bakha iinqwambi zekoroyi, bazihlikihla ngezandla, badla. 2 Nababona lokho abanye abaFarisi bathi: “Kubayini nenza into engakavumeleki ngeSabatha?” 3 UJesu wabaphendula wathi: “Akhenge nifunde na ukuthi uDavida wenzani lokha yena namadoda ebekakhamba nawo balambile? 4 Wangena ngendlini kaZimu wanikelwa izikwa zomnikelo* wadla, wanikela namadoda akhamba nawo ezinye zazo, okungakavumeleki ngananyana ngubani bona azidle ngaphandle kwabaphristi kwaphela.” 5 Bese wathi kibo: “INdodana yomuntu iyiKosi yeSabatha.”
6 Ngelinye isabatha wangena ngesinagogeni wathoma ukufundisa. Khonapho bekunendoda etjhwabene isandla sokudla. 7 Nje-ke abatloli nabaFarisi bamqalisisa uJesu bafuna ukubona ukuthi uzokulapha ngeSabatha na, khona bazakufumana into abangammangalela ngayo. 8 Kodwana yena bekazi ukuthi bacabangani, yeke wathi endodeni etjhwabene isandla: “Sikima ujame phakathi nendawo.” Yasikima yajama khona. 9 Nje-ke uJesu wathi kibo: “Akhengibuze kini madoda, Kuvumelekile na ngeSabatha ukwenza okuhle namkha ukulimaza, ukusindisa ukuphila namkha ukukubhubhisa?” 10 Wabaqala boke, ngemva kwalokho wathi endodeni leyo: “Thabulula isandla sakho.” Yenza njalo, isandla sayo sathabuluka. 11 Kodwana bathukuthela babibhelana, bathoma ukuhlanganisa iinhloko bademba ukuthi bangamenzani uJesu.
12 Ngelinye lamalanga lawo waphuma wayokuthandaza entabeni, wathandaza kuZimu ubusuku boke. 13 Kuthe nakusako, wabiza abafundi bakhe, wakhetha hlangana nabo abali-12, wababiza ngokuthi bapostoli: 14 BekunguSimoni, amthiya nangokuthi nguPitrosi, u-Andrisi umfowabo, uJakopo, uJwanisi, uFlebhe, uBhartholomewu, 15 uMatewu, uTomasi, uJakopo indodana ka-Alfiyosi, uSimoni obizwa ngokuthi “otjhisekako,” 16 uJudasi indodana kaJakopo, noJudasi Iskariyodi, owathengisa uJesu.
17 Wehla nabo wajama endaweni endlalekileko, lapho bekunesiqubuthu esikhulu sabafundi bakhe, nesiqubuthu esikhulu sabantu abavela kilo loke iJudiya neJerusalema nesifundeni esimagega nelwandle seTirosi neSidoni, abeza bona bazomlalela begodu balatjhwe ekuguleni kwabo. 18 Ngitjho nalabo egade batshwenywa mimoya emimbi balatjhwa. 19 Soke isiqubuthu besifuna ukumkghwatha, ngombana bekuphuma amandla kuye abalaphe boke.
20 Waphakamisa amehlo waqala abafundi bakhe wathi:
“Niyathaba nina enidududu, ngombana umBuso kaZimu ngewenu.
21 “Niyathaba nina enilambileko nje, ngombana nizokusuthiswa.
“Niyathaba nina enililako nje, ngombana nizokuhleka.
22 “Niyathaba abantu nabanihloyako, baninina, banithuka begodu bahlambalaza ibizo lenu ngebanga leNdodana yomuntu. 23 Mhlokho, thabani neqayeqe, ngombana umvuzo wenu mkhulu ezulwini, ngizo kanye izinto abokhokho babo abazenza ebaphorofidini.
24 “Kodwana maye kini abanjingileko, ngombana senibufumene boke ubumnandi benu.
25 “Maye kini abasuthiko nje, ngombana nizokulamba.
“Maye, nina enihlekako nje, ngombana nizokulila.
26 “Maye kini lokha boke abantu banikhuluma kuhle, ngombana ngilokho abokhokho babo abakwenza ebaphorofidini bamanga.
27 “Kodwana mina ngithi kini enilaleleko: Ragelani phambili nithanda izitha zenu, nenze okuhle kilabo abanihloyako, 28 nibusise abaniqalekisako, nithandazele nalabo abanithukako. 29 Kiloyo okubetha komunye umhlathi, mnikele nomunye; kiloyo okuthathela isambatho sangaphandle, mvumele athathe nesangaphakathi. 30 Yipha woke umuntu okubawako, naloyo okuthathela izinto zakho, ungambawi bona azibuyise.
31 “Godu, lokho enifuna abantu bakwenze kini, nani kwenzeni kibo.
32 “Ngombana nanithanda labo abanithandako, kunizuzisa ngani lokho? Phela nezoni zithanda labo abazithandako. 33 Kanti nanenza okuhle kwaphela kilabo abenza okuhle kini, kunizuzisa ngani lokho? Phela nezoni zenza okufanako. 34 Godu, naniboleka* kwaphela labo enilindele bona banibhadele, kunizuzisa ngani lokho? Phela nezoni ziboleka izoni bona zizokufumana lokho ezikubolekisileko. 35 Ngokuphambene nalokho, ragelani phambili nithanda izitha zenu, nenza okuhle, begodu niboleka ningalindeli ukubuyiselwa litho; ngalokho umvuzo wenu ozokuba mkhulu, nizokuba madodana woPhezukoke, ngombana unomusa kwabangathokoziko nabangakalungi. 36 Ragelani phambili ninesirhawu, njengombana noYihlo anesirhawu.
37 “Ngaphezu kwalokho, lisani ukwahlulela, nani angekhe nahlulelwe; lisani ukusola abanye, nani angekhe nisolwe. Ragelani phambili nilibalela, nani nizokulitjalelwa. 38 Kwenzeni umukghwa ukupha, nani bazanipha. Bazakuthela eenkhwanyeni eziseemfubeni zenu* isilinganiso esihle, esigandelelweko, sakhuhluzwa, begodu saphuphuma. Ngombana ngesilinganiso enilinganisa ngaso, nani nizokulinganiswa ngaso.”
39 Godu wabatjela omunye umfanekiso wathi: “Isiphofu angekhe sanqophisa isiphofu, akusinjalo? Angeze na zawela ngemgodini zombili? 40 Umfundi akasingaphezu komfundisakhe, kodwana nanyana ngubani ofundiswe ngokupheleleko uzokuba njengomfundisakhe. 41 Nje-ke, kubayini uqala ilithi elingelihlweni lomfowenu kukulapho ungasiboni isigodokazi esingelihlweni lakho? 42 Ungatjho njani kumfowenu ukuthi, ‘Mfowethu, ngibawa ukukhupha ilithi elingelihlweni lakho,’ khisibe wena awusiboni isigodo esingelihlweni lakho? Mzenzisi! Thoma ngokukhupha isigodo esingelihlweni lakho, bese uzokubona kuhle ukuthi ungalikhupha njani ilithi elingelihlweni lomfowenu.
43 “Ngombana akunamuthi omuhle othela iinthelo ezibolileko, kanti nomuthi obolileko awutheli iinthelo ezihle. 44 Ngombana umuthi ngamunye waziwa ngeenthelo zawo. Ngokwesibonelo, abantu abavuni amafeyi namkha amadiribe emithini yameva. 45 Umuntu olungileko ukhupha okuhle ngemnothweni omuhle wehliziywakhe, kodwana umuntu omumbi ukhupha okumbi emnothwenakhe omumbi; ngombana umlomo ukhuluma lokho okuphuphuma ngehliziyweni.
46 “Nje-ke, kubayini ningibiza ngokuthi ‘Kosi! Kosi!’ kodwana ningenzi izinto engizitjhoko? 47 Woke umuntu oza kimi ezwe amezwami begodu awenze, ngizanitjengisa ukuthi unjengobani: 48 Unjengendoda eyathi nayakha indlu yemba yatjhinga phasi khulu yabeka isisekelo edwaleni. Ngebanga lalokho, kwathi nakufika iinrhurhula, umlambo wayibetha ngamandla indlu leyo kodwana azange ube namandla aneleko wokuyisikinya, ngombana beyakhiwe kuhle. 49 Ngakelinye ihlangothi, nanyana ngubani ozwako kodwana angenzi litho, unjengendoda eyakha indlu ehlabathini enganasisekelo. Umlambo wayibetha, msinyana yagirika, ukuwa kwayo kwaba kukhulu.”