Jakopo
5 Lalelani-ke, nina bantu abanjingileko, lilani nirhahlawule ngebanga lamatlhuwo azonehlela. 2 Umnothwenu ubolile, nezambatho zenu zidliwe ziingogwana.* 3 Igolide nesiliva lenu likghore ngokupheleleko, nokukghora kwalo kuzokuba bufakazi obunilahlako begodu kuzokudla inyamenu. Lokho enizibulungele khona kuzokuba njengomlilo ngemihla yokuphela. 4 Qalani! Imirholo eniyigugudlheleko yeensebenzi ezivune amasimenu isolo iyalila, nokulilela kwabavuni isizo kufikile eendlebeni zakaJehova wamabutho. 5 Niphile ipilo emabothobotho begodu nazanelisa ephasini. Ninonise iinhliziyo zenu ngelanga lokuhlatjwa. 6 Nilahlile; nabulala olungileko. Akaniphikisi na?
7 Nje-ke, bafowethu, bekezelani bekube sekubeni khona kweKosi. Qalani! Umlimi uhlala alindele isithelo esiligugu sephasi, abekezele bekune izulu lokuthoma nezulu lamva. 8 Nani bekezelani; qinisani iinhliziyo zenu, ngombana ukuba khona kweKosi sekutjhidele.
9 Ninganghonghoyili* ngomunye nomunye, bafowethu, ukuze ningahlulelwa. Qalani! UMahluleli ujame phambi kweminyango. 10 Bafowethu, kuthatheni njengesibonelo ukuhlunguphazeka nokubekezela kwabaphorofidi abakhuluma ebizweni lakaJehova. 11 Qalani! Sithi bayathaba* labo abakghodlheleleko. Nizwile ngokukghodlhelela kwakaJobho nabona nomphumela uJehova awunikelako, ukuthi uJehova unethando khulu begodu unesirhawu.
12 Ngaphezu kwakho koke, bafowethu, lisani ukufunga, kungaba ngezulu namkha ngephasi namkha ngananyana ngisiphi isifungo. Kodwana u-“Iye” wenu akatjho u-iye no-“Awa,” atjho u-awa, ukuze ningafanelwa sisahlulelo.
13 Ukhona oqalene nobudisi hlangana nani? Akaragele phambili athandaza. Ukhona othabileko? Akavume amarhubo. 14 Ukhona ogulako hlangana nani? Akabize abadala bebandla, bamthandazele, bamzese ngamafutha ebizweni lakaJehova. 15 Umthandazo wokukholwa uzokwenza ogulako* aphile, noJehova uzomvusa. Godu, nangabe wenze izono, uzokulitjalelwa.
16 Nje-ke, zivumeni ngokutjhaphulukileko izono zenu komunye nomunye begodu nithandazelane, ukuze nilapheke. Ukurabhela komuntu olungileko kunomphumela onamandla. 17 U-Eliya bekamumuntu onamazizo afana nawethu, kodwana wathandaza ngetjiseko bona izulu lingani, azange line enarheni iminyaka emithathu neenyanga ezisithandathu. 18 Wathandaza godu, izulu lana nenarha yathela.
19 Bafowethu, nakukhona hlangana nani ophambukiswako eqinisweni bese omunye ambuyise, 20 yazini ukuthi nanyana ngubani obuyisa isoni endlelenaso eyonakeleko, uzosisindisa* ekufeni begodu uzokugubuzesa izono ezinengi.