Juda
1 UJuda, isigqila sakaJesu Krestu, begodu omfowabo kaJakopo, kilabo ababiziweko abathandwa nguZimu uBaba nababekelwe uJesu Krestu:
2 Kwangathi ningandiselwa isirhawu, ukuthula nethando.
3 Bathandekako, nanyana bengenza koke engingakwenza bona nginitlolele ngesindiso esiyihlanganyelako, ngikubone kutlhogeka ukunitlolela bonyana nginikhuthaze ukuthi nikulwele ngamandla ukukholwa okunikelwe abacwengileko kwaba kanye kwaphela. 4 Nginitlolele ngebanga lokobana kunabantu abathileko abangene ngokukhukhutha hlangana nani, labo ebebakhethelwe kade isahlulelwesi ngemiTlolo; bababantu abangamsabiko uZimu, abajika umusa omkhulu kaZimethu bawenze ibanga lokwenza amanyala bangabi neenhloni* begodu bazibonakalise banamala eKosinethu okungiyo kwaphela eyasithengako, uJesu Krestu.
5 Nanyana nizazi kuhle tle zoke izintwezi, ngifuna ukunikhumbuza bona uJehova wasindisa isitjhaba enarheni yeGibhide, ngemva kwalokho watjhabalalisa labo abangatjengisi ukuthi bayakholwa. 6 Neengilozi ezingakhenge zihlale esikhundleni sazo sekuthomeni kodwana zatjhiya indawazo yokuhlala efaneleko, uzibeke ngokubotjhwa kwasafuthi ebumnyameni obukhulu bekufike isahlulelo sazo ngelanga elikhulu. 7 ISodoma neGomora namadorobho ayibhodileko yenza okufanako, yazinikela ezenzweni zomseme ezisisono* ezinyenyisako begodu yalandela iinkanuko zenyama ezingasingezemvelo; iindawezi zibekwe phambi kwethu njengesibonelo esisiyeleliso ngokufumana isigwebo sokwahlulelwa somlilo ongapheliko.
8 Naphezu kwalokhu, abantwaba nabo bazitika ngamabhudango, basilaphaza inyama, badelela ilawulo begodu bakhuluma kumbi ngabaphazimulako. 9 Kodwana lokha uMikhayeli ingilozi ekulu aba nokungazwani noDeveli, baphikisana ngesidumbu sakaMosi, wathobeka, akhenge amahlulele ngamezwi amambi, kodwana wathi: “Kwangathi uJehova angakukhalima.” 10 Kodwana abantwaba bakhuluma kumbi ngazo zoke izinto abangazizwisisiko. Kizo zoke izinto abazizwisisa ngemizwa yemvelo enjengeyeenlwana ezinganangqondo, baragela phambili bazonakalisa.
11 Kumbi khulu ngabo, ngombana balandele indlela kaKayini begodu bagijimela ekambweni yokona kaBhalami bona bafumane umvuzo, batjhabalele ekulumweni yokuvukela kaKora! 12 Laba bamadwala afihleke ngaphasi kwamanzi eminyanyenenu yethando kukulapho badla nani, babelusi abazondla bona ngokwabo ngaphandle kokusaba; bamamafu anganazulu aphetjhulwa mmoya; bamimithi engananthelo ngesiruthwana, efe ukufa* begodu yaruthulwa; 13 bamagagasi welwandle anamandla abhubhudlha amahlazo wawo; baziinkwekwezi ezinganakambiso ebekiweko, ezibekelwe ubumnyama obunzima tshu, bekube phakade.
14 Umuntu wekhomba ukusuka ku-Adamu, u-Inogo, naye waphorofida ngabo nakathi: “Qalani! UJehova weza namatjhumi weenkulungwana zeengilozi zakhe ezicwengileko 15 bona akhuphe isahlulelo kibo boke, begodu abathwese umlandu boke abangamsabiko malungana nazo zoke izenzo zabo zokungamsabi uZimu abazenze ngendlela yokungamsabi uZimu, namalungana nazo zoke izinto ezithusako izoni ezingamsabiko uZimu ezizikhulumileko ngaye.”
16 Abantwaba bayabubula, abaneliseki ngalokho abanakho, balandela iimfiso zabo, begodu imilomabo ikhuluma izinto zokuzigqaja okukhulu, kukulapho babuka abanye ukuze kuzuze bona.
17 Malungana nani, bathandekako, khumbulani amezwi abikezelwa bapostoli beKosethu uJesu Krestu, 18 bona bebavame kangangani ukuthi kini: “Emihleni yokuphela kuzokuba nabanyefuli, balandela iimfiso zabo zokungasabi uZimu.” 19 Laba ngibo ababanga ukuhlukana, babantu abanobulwana, abanganawo ummoya kaZimu. 20 Kodwana nina bathandekako, zakheni ekukholweni kwenu okucwengeke khulu, begodu nithandaze ngommoya ocwengileko, 21 ukuze niqiniseke bona nihlala nithandwa nguZimu, kukulapho nilinde isirhawu seKosethu uJesu Krestu ngombono wokuphila okungapheliko. 22 Godu ragelani phambili nibarhawukela labo abazazako; 23 nibasindise ngokubadzwebula emlilweni. Kodwana ragelani phambili nirhawukela abanye, nikwenze ngokusaba, kukulapho ninyenya ngitjho nesambatho esinindwe ngenyama.
24 Nje-ke kiloyo okghona ukunivikela ekuweni begodu anenze nihlale ninganabala phambi kwephazimulwakhe* ngethabo elikhulu, 25 kuZimu yena yedwa uMsindisethu ngoJesu Krestu iKosethu, akube yiphazimulo, ubukhulu obubabazekako, amandla, nokubusa bekube kilo loke iphakade elidlulileko nanje nakilo loke iphakade. Amen.