IsAmbulo
14 Ngemva kwalokho, qala, ngabona iMvana ijame eNtabeni iZiyoni, kunye nayo bekunabazi-144 000 abatlolwe ibizo layo nebizo lakaYise eempandla zabo. 2 Ngezwa itjhada liphuma ezulwini njengetjhada lamanzi amanengi nanjengetjhada lokuduma kwezulu okukhulu; itjhada engalizwako belinjengelabavumi abavuma badlala iindonodono zabo. 3 Godu bavuma lokho okubonakala ngasuthi yingoma etja phambi kwesihlalo sobukhosi naphambi kweembunjwa ezine nabadala, begodu akekho omunye owakghona ukuyazi kuhle ingoma leyo ngaphandle kwabazi-144 000, abathengwe ephasini. 4 Laba ngilabo abangazange bazisilaphaze ngabafazi; eqinisweni, banjengeentombi ezimsulwa. Laba ngilaba abasolo balandela iMvana nanyana kukuphi lapho iya khona. Laba bathengwa ephasini hlangana nabantu njengeenthelo zokuthoma kuZimu neMvana, 5 begodu nokukhohlisa azange kufunyanwe emlonyenabo; bamsulwa.
6 Godu ngabona enye ingilozi iphapha emkayini, ineendaba ezimnandi zokuzimemezela kilabo abahlala ephasini, kizo zoke iintjhaba, iinkoro, amalimi nabantu. 7 Beyithi ngelizwi elikhulu: “Sabani uZimu, nimphazimulise, ngombana i-iri lokwahlulelwa nguye selifikile, nje-ke lotjhani loyo owenze izulu nephasi nelwandle nemithombo yamanzi.”
8 Enye godu, ingilozi yesibili, yalandela, ithi: “Liwile! IBhabhiloni eliKhulu liwile, lona ebelenza zoke iintjhaba zisele iwayini lekanuko* yalo yezenzo zomseme ezisisono!”*
9 Enye ingilozi, yesithathu, yazilandela, itjho ngelizwi elikhulu ithi: “Nangabe kukhona umuntu olotjha isibandana nomfanekiswaso begodu afumane itshwayo epandlakhe namkha esandleni sakhe, 10 uzokusela newayini letukuthelo kaZimu elithelwa ekapheni yelaka lakhe lingakaqarhwa nalitho, begodu uzokuhlunguphazwa ngomlilo nesibabuli phambi kweengilozi ezicwengileko naphambi kweMvana. 11 Intuthu yokuhlunguphazwa kwabo ikhuphuka phakade naphakade, abafumani ukuphumula imini nobusuku, labo abalotjha isibandana nomfanekiso waso nalabo abafumana itshwayo lebizo laso. 12 Lapha-ke kulapho kutlhogeka khona bona abacwengileko bakghodlhelele, labo abalela imiyalo kaZimu nababambelela ekukholweni kuJesu.”
13 Godu ngezwa ilizwi livela ezulwini lithi, “Tlola ukuthi: Bayathaba abafileko abafa bamunye neKosi kusukela nje kuya phambili. Kwamambala, kutjho ummoya, abaphumule emisebenzinabo obudisi, ngombana izinto abazenzileko zizokukhamba nabo.”
14 Ngemva kwalokho ngabona, ilifu elimhlophe, phezu kwelifelo bekunothileko onjengendodana yomuntu, onesihlohlo segolide ehlokwakhe nesegere ebukhali esandleni sakhe.
15 Kwavela enye ingilozi endaweni ecwengileko yethempeli, irhuwulela loyo ohlezi phezu kwelifu ithi: “Faka isegerakho uvune, ngombana i-iri lokuvuna selifikile, ngombana isivuno sephasi sesivuthwe ngokupheleleko.” 16 Loyo ohlezi phezu kwelifu wafaka isegerakhe ephasini, iphasi lavunwa.
17 Godu kwavela enye ingilozi endaweni ecwengileko yethempeli esezulwini, nayo beyiphethe isegere ebukhali.
18 Kwavela enye ingilozi godu e-aldareni, yona beyinamandla phezu komlilo. Yarhuwelela leya ephethe isegere ngelizwi elikhulu, yathi: “Faka isegerakho ubuthe amahlukuzo wesimu yamadiribe yephasi, ngombana amadiribe wayo avuthiwe.” 19 Ingilozi yafaka isegerayo ephasini yabutha amadiribe wephasi, yawaphosela ngebutlhodlhelweni bewayini obukhulu belaka lakaZimu. 20 Ubutlhodlhelo bewayini bagadangwa ngaphandle kwedorobho, kwaphuma iingazi ebutlhodlhelweni zaphakama bezafika ematomini weenjomani ibanga elimastadiyu ayi-1 600.*