20 Malungana nabo boke abantu ebebasele hlangana nama-Amori, amaRhiti, amaPerizi, amaRhivi namaJebusi,+ egade bangasiyingcenye yabantu bakwa-Israyeli,+ 21 iinzukulwana zabo ebezisele enarheni leyo, labo ama-Israyeli abhalelwa kubatjhabalalisa bakatelelwa nguSolomoni bona babe ziingqila bekube kunamhlanjesi.+ 22 Kodwana uSolomoni akhenge enze namunye umIsrayeli bona abe sigqila,+ ngombana bewamasotjakhe, iinsebenzi, amakhosana, iinkhulu neenduna zabatjhayeli beenkarana zakhe nabakhweli beenjomani. 23 Bekuneenduna zamasekela ezi-550 ebezinqophisa umsebenzi kaSolomoni, iinduna ezengamele abantu abenza umsebenzi.+