21 Ngokukhamba kwesikhathi uDavida wafika eNobi+ ku-Arhimeleki umphristi. U-Arhimeleki wathuthumela nakahlangana noDavida bese wathi kuye: “Kubayini ukhamba wedwa?”+ 2 UDavida waphendula u-Arhimeleki umphristi wathi: “Ikosi ingithume bona ngiyokwenza okuthileko kodwana ithe, ‘Akungabi nomuntu owaziko ngejima engikuthumela kilo nangeenqophiso engikunikele zona.’ Ngibekiselene namasokanami bona siyokuhlangana endaweni ethileko. 3 Nje-ke nangabe unoburotho obuhlanu, unganginikela bona namkha ungangipha nanyana yini ekhona.” 4 Umphristi waphendula uDavida wathi: “Abukho uburotho obujayelekileko kodwana kunoburotho obucwengileko+ bangabudla, kwaphela nange amasokana angakhenge azihlanganise nabantu bengubo.”*+ 5 UDavida waphendula umphristi wathi: “Ngokuqinisekileko besingahlangani nabantu bengubo nangiya ejimeni ngeenkhathi ezidlulileko.+ Nange imizimba yamasokana kufuze icwengeke ngitjho nanyana kulijima elijayelekileko, izokucwengeka kangangani-ke namhlanjesi!” 6 Nje-ke umphristi wamnikela uburotho obucwengileko+ ngombana bebungekho obunye uburotho ngaphandle koburotho bombukiso, ebebususwe phambi kwakaJehova bajanyiselelwa ngoburotho obutjha ngelanga obukhutjhwe ngalo.