Eksodusi
8 Ngemva kwalokho uJehova wathi kuMosi: “Tjhinga kuFaro uthi kuye, ‘UJehova uthi: “Khambisa abantu bami ukwenzela bona bayongilotjha.+ 2 Nange usolo ubhala ukubakhambisa, ngizokwenza inarhakho ibe neenrhwarhwa.+ 3 UMlambo iNayili uzokuzala iinrhwarhwa, zizokungena ngendlinakho, ekamurwenakho, embhedenakho, ngeendlini zeensebenzi zakho, ebantwini bakho, ngema-ondweni nangeenkotlelweni okubhicelwa kizo ihlama yoburotho.+ 4 Iinrhwarhwa zizokusahlela wena, abantu bakho nazo zoke iinsebenzi zakho.”’”
5 Kamva uJehova wathi kuMosi: “Tjela u-Aroni uthi kuye, ‘Yelulela isandla sakho phezu kwemilambo uphethe intonga, phezu kwemilanjana yeNayili nemidzwela, wenze iinrhwarhwa ziphumele enarheni yeGibhide.’” 6 Nje-ke u-Aroni walulela isandla sakhe phezu kwamanzi weGibhide, iinrhwarhwa zavela zazala yoke inarha yeGibhide. 7 Abaphristi abenza imilingo benza okufanako ngemilingwabo efihlakeleko, nabo benza iinrhwarhwa zazala inarha yeGibhide.+ 8 UFaro wathi kuMosi no-Aroni: “Ncengani uJehova bona asuse iinrhwarhwa kimi nebantwini+ bami ngombana ngifuna ukukhambisa abantu bayokwenzela uJehova umhlatjelo.” 9 UMosi wathi kuFaro: “Kuzokuya ngawe ukuthi ufuna ngikuncengele nini bona iinrhwarhwa zisuswe kuwe, eensebenzini zakho, ebantwini bakho neendlini zakho. Zizokusala kwaphela eMlanjeni iNayili.” 10 UFaro wathi: “Kusasa.” UMosi wathi: “Kuzokwenzeka njengokutjho kwakho ukwenzela bona wazi ukuthi akekho onjengoJehova uZimethu.+ 11 Iinrhwarhwa zizokusuka kuwe, eendlini zakho, eensebenzini zakho nebantwini bakho. Zizokusala kwaphela eNayili.”+
12 UMosi no-Aroni basuka kuFaro, uMosi wancenga uJehova bona asuse iinrhwarhwa abethe ngazo uFaro.+ 13 UJehova wenza njengombana uMosi ambawile, iinrhwarhwa zathoma ukufela ngendlini, ngeenrhodlweni nemasimini. 14 Bazibuthelela zaba maqubi amanengi khulu, inarha yathoma ukunuka. 15 UFaro nakabona ukuthi iinrhwarhwa azisekho waba nekani+ bewabhala ukubalalela njengombana uJehova akhulumile.
16 UJehova wathi kuMosi: “Tjela u-Aroni uthi, ‘Lula intongakho ubethe ihlabathi, izokuphenduka abonompopoloza* enarheni yoke yeGibhide.’” 17 Benza njalo. U-Aroni walula isandla sakhe aphethe intonga, wabetha ihlabathi, ngemva kwalokho abonompopoloza basahlela abantu neenlwana. Yoke ihlabathi yaphenduka abonompopoloza kiyo yoke inarha yeGibhide.+ 18 Abaphristi abenza imilingo balinga ukuveza abonompopoloza ngemilingwabo efihlakeleko+ kodwana akhenge bakghone. Abonompopoloza basahlela abantu neenlwana. 19 Nje-ke abaphristi abenza imilingo bathi kuFaro: “Kungebanga lamandla kaZimu!”*+ Kodwana uFaro waba nekani akhenge abalalele njengombana uJehova akhulumile.
20 UJehova wathi kuMosi: “Vuka ekuseni ukhambe uyokujama phambi kwakaFaro. Uzokuya emanzini! Kufuze uthi kuye, ‘UJehova uthi: “Khambisa abantu bami bona bayongilotjha. 21 Kodwana nawungabakhambisiko, ngizokuthumela iimbawu* kuwe, eensebenzini zakho, ebantwini bakho, eendlini zakho nezindlu zeGibhide zizokuzala zona, ngitjho nenarha yoke yeGibhide izokuzala zona. 22 Mhlokho ngizokuvikela iGotjheni lapho abantu bami bahlala khona. Angekhe kube neembawu enarheni leyo+ begodu ngalokhu nizokwazi bona mina Jehova ngisenarheni le.+ 23 Ngizokwenza umahluko phakathi kwabantu bami nabantu bakho. Isimangaliswesi sizokwenzeka kusasa.”’”
24 UJehova wenza njalo, kwavela iwomakazi leembawu zangenela indlu kaFaro nezindlu zeensebenzi zakhe nayo yoke inarha yeGibhide.+ Iimbawezo zabanga umonakalo omkhulu enarheni.+ 25 Emaswapheleni uFaro wabiza uMosi no-Aroni wathi kibo: “Khambani niyokwenzela uZimenu umhlatjelo.” 26 UMosi wathi: “Angekhe kukghoneke ukwenza njalo ngombana izinto esizozisebenzisa bona senzele uJehova uZimethu umhlatjelo zizokunyenyisa amaGibhide.+ Yeke nasingenza umhlatjelo onyenyisa amaGibhide phambi kwawo, angeze asikghadlha ngamatje na? 27 Sizokuthatha ikhambo lamalanga amathathu siye emmangweni, sizokwenzela uJehova uZimethu umhlatjelo lapho njengombana asiyalile.”+
28 UFaro wathi: “Ngizonivumela bona nikhambe niyokwenzela uJehova uZimenu umhlatjelo emmangweni. Kodwana ningayi kude. Ngibawa ningincengele kuZimenu bona asuse iimbawezi.”+ 29 UMosi wathi: “Ngiyakhamba nje, ngizokubawela kuJehova bona asuse iimbawu kuwe, eensebenzini zakho nebantwini bakho kusasa. Kodwana uFaro kufuze alise ukudlala ngathi ngokwala ukukhambisa abantu bona bayokwenzela uJehova umhlatjelo.”+ 30 UMosi wasuka kuFaro, wayokuncenga uJehova.+ 31 UJehova wenza njengombana uMosi abawile, iimbawu zasuka kuFaro, eensebenzini zakhe nebantwini bakhe. Azange kusale nasinye. 32 Nanyana kunjalo, uFaro waba nekani godu akhenge abavumele abantu bona bakhambe.