USamyela Wesibili
8 Ngemva kwesikhathi esithileko, uDavida wahlula amaFilista+ bewawabusa+ begodu uDavida wathatha iMethegi-Ama ezandleni zamaFilista.
2 Wahlula bakwaMowabi+ bese wabalalisa phasi, wabalinganisa ngomuda. Walinganisa imida emibili bona ibulawe begodu umuda munye ozeleko bona uragele phambili uphila.+ Yeke bakwaMowabi baba ziinsebenzi zakaDavida begodu baletha umthelo.+
3 UDavida wahlula indodana kaRerhobu uHadadi-Ezeri ikosi yeTsoba,+ nayisendleleni iyokubuyisa ubukhosi bayo eMlanjeni iYufrathe.+ 4 UDavida wayithathela abakhweli beenjomani abayi-1 700 namasotja akhamba ngeenyawo azii-20 000. Ngemva kwalokho, uDavida wasika imisipha yeenyawo zeenjomani ezidosa iinkarana+ kwasala ezili-100 kwaphela.
5 Kwathi amaSiriya weDamaseku+ nawazokusiza uHadadi-Ezeri ikosi yeTsoba, uDavida warhayila amaSiriya azii-22 000.+ 6 Yeke uDavida wahloma iinkampa zamasotja eSiriya yeDamaseku begodu amaSiriya aba ziinsebenzi zakaDavida aletha nomthelo. UJehova wenza uDavida waphumelela nanyana kukuphi lapho bekaya khona.+ 7 Ngaphezu kwalokho, uDavida wathatha iinhlangu zegolide ezirondo eensebenzini zakaHadadi-Ezeri, weza nazo eJerusalema.+ 8 IKosi uDavida yathatha ikhopha enengi eBhetharhi neBherothayi, okumadorobho kaHadadi-Ezeri.
9 Nje-ke uToyi ikosi yeRhamathi+ wezwa bona uDavida uhlule loke ibutho lakaHadadi-Ezeri.+ 10 Yeke uToyi wathumela indodanakhe uJoramu eKosini uDavida bona iyoyibuza amavuko beyiyithokozise ngombana beyilwe noHadadi-Ezeri beyamhlula (ngombana uHadadi-Ezeri bekajayele ukulwa noToyi), yayiphathela izinto zesiliva, zegolide nezekhopha. 11 IKosi uDavida yanikela* uJehova izintwezi, kuhlanganise nesiliva negolide eyalicwengisako, eyalithatha kizo zoke iintjhaba azihlulako:+ 12 eSiriya nakwaMowabi,+ ama-Amoni namaFilista,+ ama-Amalekhi+ nezinto azithethe kuHadadi-Ezeri,+ indodana kaRerhobu ikosi yeTsoba. 13 UDavida wazenzela negama nakabuya ukuyokurhayila ama-Edomu azii-18 000 emRhobeni weTswayi.+ 14 Wahloma iinkampa zamasotja kwa-Edomu. Wahloma iinkampa zamasotja kiyo yoke i-Edomu begodu woke ama-Edomu aba ziinsebenzi zakaDavida.+ UJehova wenza uDavida waphumelela nanyana kukuphi lapho bekaya khona.+
15 UDavida waraga nokubusa phezu kwaka-Israyeli woke+ begodu uDavida bekabusa ngobulungiswa nokulunga+ kibo boke abantu bakhe.+ 16 UJowabi+ indodana kaTseruya bekamphathi webutho begodu uJehotjhafathi+ indodana ka-Arhiludi bekamtloli wezenzakalo. 17 UTsadokhi+ indodana ka-Arhithubi no-Arhimeleki indodana ka-Abhiyathari bebabaphristi begodu uSeraya bekangunobhala. 18 UBhenaya+ indodana kaJehoyada bekamphathi wamaKereti namaPeleti.+ Amadodana kaDavida aba makhosana.*