Joromiya
27 Ekuthomeni kokubusa kwakaJehoyakhimu indodana kaJosiya ikosi yakwaJuda, kwafika ilizwi elivela kuJehova liya kuJoromiya lithi: 2 “Ngilokhu uJehova angitjele khona, ‘Zenzele iinrobho neensimbi zejogi leensimbi, uzibeke entanyenakho. 3 Bese uzithumela ekosini yakwa-Edomu,+ ekosini yakwaMowabi,+ ekosini yama-Amoni,+ ekosini yeTirosi+ nekosini yeTsidoni+ ngesandla seenthunywa ezize eJerusalema, ekosini uTsedekhiya yakwaJuda. 4 Zinikele umyalo lo oya emakhosinazo:
“‘“Ngilokhu uJehova wamabutho, uZimu ka-Israyeli akutjhoko; ngilokhu ekufuze nikutjele amakhosenu, 5 ‘Ngimi owenze iphasi, abantu neembandana ezisephasini, ngizenze ngamandlami amakhulu nangesandla sami esilulekileko begodu iphasi loke ngilinikele nanyana ngubani engimthandako.*+ 6 Nje-ke nginikele zoke iinarha esandleni sencekwami iKosi uNebukadinetsari+ yeBhabhiloni; ngitjho neembandana ngizinikele bona zimlotjhe. 7 Zoke iintjhaba zizokulotjha yena, indodanakhe nomzukulwakhe bekube sikhathi lapho inarhakhe iqedwa khona,+ lapho iintjhaba ezinengi namakhosi anamandla azomenza isigqila sazo.’+
8 “‘“‘Nanyana ngisiphi isitjhaba namkha umbuso ongafuni ukusebenzela iKosi yeBhabhiloni uNebukadinetsari namkha ongafuni ukubeka intamakhe ngaphasi kwejogi lekosi yeBhabhiloni, ngizosijezisa isitjhabeso ngesabula,+ ngendlala nangesibetho,’* kutjho uJehova, ‘bekube kulapho ngisiqeda ngesandla sakhe.’
9 “‘“‘Yeke ningalaleli abaphorofidi benu, ababhuli benu, ababhudangi benu, abosomlingo benu nabaloyi benu, abathi kini: “Angekhe nisebenzele ikosi yeBhabhiloni.” 10 Ngombana baphorofida amala kini, bona nisiwe kude nenarhenu, ngizonirhatjha begodu nizokutjhabalala.
11 “‘“‘Nanyana ngisiphi isitjhaba esibeka intamaso ngaphasi kwejogi lekosi yeBhabhiloni begodu siyisebenzele, ngizosivumela sihlale enarhenaso,’ kutjho uJehova, ‘siyilime begodu sihlale kiyo.’”’”
12 Ngikhulume okufanako neKosini yakwaJuda uTsedekhiya+ ngathi: “Bekani iintamo zenu ngaphasi kwejogi lekosi yeBhabhiloni usebenzele yona nabantu bayo, uzokuragela phambili uphila.+ 13 Kubayini wena nabantu bakho kufuze nife ngebanga lesabula,+ ngendlala+ nangesibetho+ njengombana uJehova atjhwile ngeentjhaba ezingekhe zisebenzele ikosi yeBhabhiloni? 14 Ningawalaleli amezwi wabaphorofidi abathi kini, ‘Angekhe niyisebenzele ikosi yeBhabhiloni’+ ngombana baphorofida amala kini.+
15 “‘Ngombana akhenge ngibathume,’ kutjho uJehova, ‘kodwana baphorofida amala egameni lami, ngalokho ngizonirhatjha begodu nizokutjhabalala nina nabaphorofidi abaphorofida kini.’”+
16 Ngitjele abaphristi nabo boke abantu ngathi: “Ngilokhu uJehova akutjhoko, ‘Ningawalaleli amezwi wabaphorofidi abaphorofida kini, abathi: “Qala! Izitja zendlu kaJehova zizokubuyiswa eBhabhiloni kungasikade!”+ ngombana baphorofida amala kini.+ 17 Ningabalaleli, sebenzelani ikosi yeBhabhiloni begodu nizokuragela phambili niphila.+ Kubayini idorobheli kufuze libe marubhi? 18 Kodwana nangabe baphorofidi begodu ilizwi lakaJehova likibo, babaweni bancenge uJehova wamabutho bona izitja eziseleko endlini kaJehova, endlini yekosi yakwaJuda neJerusalema azingathathwa zisiwe eBhabhiloni.’
19 “Ngilokhu uJehova wamabutho akutjhoko malungana neensika,+ iLwandle,*+ iinkarana+ nezitja eziseleko edorobheneli, 20 zizinto iKosi uNebukadinetsari yeBhabhiloni engakhenge izithathe nayithatha uJokoniya indodana kaJehoyakhimu, ikosi yakwaJuda, eJerusalema imusa ekudingisweni eBhabhiloni, yona nazo zoke iinkhulu zakwaJuda nezeJerusalema;+ 21 ngilokhu uJehova wamabutho, uZimu ka-Israyeli, akutjhoko malungana nezitja ezisele ngendlini kaJehova, ngendlini yekosi yakwaJuda, neJerusalema, uthi: 22 ‘“Bazokulethwa eBhabhiloni,+ bazokuhlala lapho bekube lilanga engibatjheja ngalo,” kutjho uJehova. “Yeke ngizobathatha ngibabuyisele endaweni le.”’”+