Hezekiyeli
22 Ilizwi lakaJehova lafika kimi godu, lathi: 2 “Nakunguwe, ndodana yomuntu, inga-kghani ukulungele ukumemezela ukwahlulelwa kwedorobho elinomlandu weengazi+ begodu ulazise ngazo zoke izinto zalo ezinyenyisako?+ 3 Kufuze uthi, ‘Nakhu iKosi ePhakemeko uJehova ekutjhoko: “Maye! Dorobho okuphalazelwa kilo iingazi,+ isikhathi sakho esizako,+ owenza iinthombe ezinyenyisako* bona uzisilaphaze,+ 4 ukuphalaza kwakho iingazi kukwenze waba mlandu,+ neenthombe zakho ezinyenyisako zikwenze wasilaphala.+ Urhabele ukuqeda amalangakho begodu iminyakakho yokuphela seyifikile. Kungebangelo ngizokwenza into elihlazo eentjhabeni nento yokuhlekwa kizo zoke iinarha.+ 5 Iinarha ezihlanu kwakho nalezi ezikude nawe zizokuhleka,+ wena igama lakho elingakahlwengeki nozele ngetjharagano. 6 Qala! Ikosana ngayinye yakwa-Israyeli isebenzisa ilawulo layo bona iphalaze iingazi.+ 7 Badlelezele umma nobaba.+ Badlelezela isakhamuzi sakwenye inarha, baphatha kumbi umntwana onganababa* nomhlolokazi.”’”+
8 “‘Iindawo zami ezicwengileko uzidelelile, namasabathami wawasilaphaza.+ 9 Phakathi kwakho kunabarhwayeli abazimisele ukuphalaza iingazi.+ Phakathi kwakho badla imihlatjelo eentabeni begodu baziphatha ngendlela enyenyisako phakathi kwakho.+ 10 Phakathi kwakho basilaphaza umbhede kabababo*+ begodu batjhinga emabhayini nomma osesikhathini.+ 11 Phakathi kwakho umuntu wenza izenzo ezinyenyisako nomfazi kamakhelwanakhe,+ omunye usilaphaza umalukazanakhe ngezenzo ezinyenyisako+ begodu omunye usilaphaza udadwabo, indodakazi kayise.+ 12 Phakathi kwakho bathathe isifumbathiso bona baphalaze iingazi.+ Ubolekisa imali ulindele inzalo+ namkha ufumane inzuzo, uthathela abomakhelwanakho+ imali ngekani. Ungilibele ngokupheleleko,’ kutjho iKosi ePhakemeko uJehova.
13 “‘Qala! Nginyenyisekile ngebanga lenzuzwenu engakathembeki, eniyenze ngezenzo zenu zeengazi phakathi kwenu. 14 Kghani isibindi sakho sizokukghodlhelela, nezandla zakho zizokuba namandla ngamalanga engithatha ngawo igadango ngokujamelene nawe?+ Mina Jehova ngikhulumile begodu ngizokwenza. 15 Ngizokurhatjhela hlangana neentjhaba, ngikurhatjhele hlangana neenarha+ begodu ngizokuqeda ukusilaphala kwakho.+ 16 Angekhe uhlonitjhwe hlangana neentjhaba, kuzokufuze wazi bona nginguJehova.’”+
17 Ilizwi lakaJehova lafika kimi godu, lathi: 18 “Ndodana yomuntu, indlu yakwa-Israyeli seyibe njengesiliva elingasizi ngalitho nelonakeleko kimi. Boke babe yikhopha, isinjana, isimbi nomthofu emlilweni. Babe njengesiliva elingasizi ngalitho.+
19 “Nje-ke nakhu iKosi ePhakemeko uJehova ekutjhoko: ‘Ngombana noke nibe njengento engasizi ngalitho neyonakeleko,+ ngizonibuthelela ndawonye phakathi kweJerusalema. 20 Njengombana isiliva nekhopha, isimbi, umthofu nesinjana zibuthelelwa phakathi komlilo bona zithelwe ngomlilo begodu zincibilike, Yeke ngizonibuthelela ndawonye elakeni lami nekusilingekeni kwami begodu ngizonivuthela bona nginenze nincibilike.+ 21 Ngizonibuthelela ndawonye begodu ngivuthele umlilo welaka lami kini,+ nizokuncibilikiswa phakathi kweJerusalema.+ 22 Njengombana isiliva lincibilikiswa emlilweni, nani nizokuncibilikiswa phakathi kweJerusalema; kuzokufuze nazi ukuthi mina Jehova, ngithululele ilaka lami kini.’”
23 Ilizwi lakaJehova lafika kimi godu, lathi: 24 “Ndodana yomuntu, ithi kilo, ‘Uyinarha engekhe ihlwengeke nengekhe inethwe lizulu ngelanga lokusilingeka kwami. 25 Abaphorofidi balo baluka amano phakathi kwalo,+ njengebhubezi elibhodlako elirathula inyamazana.+ Barhiribidela abantu. Bathatha amagugu nezinto ezikhethekileko. Benze abahlolokazi abanengi phakathi kwalo. 26 Abaphristi balo badelele umthethwami+ begodu bebasolo basilaphaza iindawo zami ezicwengileko.+ Abahlukanisi phakathi kwento ecwengileko nento ejayelekileko,+ abakghoni ukwenza kwaziwe bona khuyini okuhlwengileko+ nokungakahlwengeki, abafuni ukuphetha amasabathami, ngisilaphaziwe hlangana nabo. 27 Amakhosanalo aphakathi kwalo anjengeempisi ezirathula inyamazana; aphalaza iingazi begodu abulala abantu bona enze iinzuzo engakathembeki.+ 28 Kodwana abaphorofidi balo bafihla ukukhohlakala kwabo njengokupenda iboda ngepende emhlophe. Babona imibono emamala, bathukule amala,+ bathi: “Nakhu iKosi ePhakemeko uJehova ekutjhoko, kukulapho uJehova angakatjho litho. 29 Abantu benarha badlelezele, benza ubugebengu,+ baphathe abatlhogako nabatlhagako kumbi, badlelezele isakhamuzi sakwenye inarha basidima ubulungiswa.’
30 Bengifuna umuntu hlangana nabo ozokulungisa iboda lamatje namkha ajamele inarha phambi kwami esikhaleni bona ingatjhatjalaliswa+ kodwana akhenge ngifumane muntu. 31 Ngizokuthululela ilaka lami kibo begodu ngibarhayile ngomlilo welaka lami. Ngizokuletha imiphumela yeendlela zabo eenhlokweni zabo,’ kutjho iKosi ePhakemeko uJehova.”