Hezekiyeli

12 Ilizwi lakaJehova lafika kimi godu, lathi: 2 “Ndodana yomuntu uhlala endlini ehlubukako, banamehlo wokubona kodwana ababoni, baneendlebe zokuzwa kodwana abezwa+ ngombana bayindlu evukelako.+ 3 Nakunguwe, ndodana yomuntu, zilungiselele umthwalo wokuya ekudingisweni. Nje-ke kwenze lokhu emini baqalile, kufuze uye ekudingisweni. Tjhinga ekudingisweni usuka lapho uhlala khona uye kwenye indawo baqalile. Mhlamunye bazokubona ngitjho nanyana bayindlu ehlubukako. 4 Khupha umthwalwakho owupakileko wokuya ekudingisweni emini baqalile, bese kuthi entambama baqalile kufuze ukhambe njengomuntu oyiswa ekudingisweni.+

5 “Njengombana baqalile, thumbusa imbobo ebodeni, ukhuphe umthwalwakho ngayo.+ 6 Njengombana baqalile, beka umthwalwakho emahlombakho begodu uwuthwale uphumele nawo ebumnyameni. Gubuzesa ubuso bakho ukuthi ungaboni phasi, ngombana ngikwenza itshwayo endlini ka-Israyeli.”+

7 Ngenza njengombana ngiyaliwe. Emini ngakhupha umthwalwami njengomthwalo wokuya ekudingisweni, entambama ngathumbusa imbobo ebodeni ngesandla sami, nasele kumnyama, ngakhupha umthwalwami ngawuthwala emahlombe phambi kwamehlwabo.

8 Ekuseni ilizwi lakaJehova lafika kimi godu, lathi: 9 “Ndodana yomuntu, kghani indlu ka-Israyeli, indlu ehlubukako, akhenge ikubuze ithi, ‘Wenzani?’ 10 Batjele ukuthi, ‘Nakhu iKosi ePhakemeko uJehova ekutjhoko: “Isimemezelwesi simalungana nekosana+ eJerusalema nayo yoke indlu ka-Israyeli edorobheni.”

11 “Ithi, ‘Ngilitshwayo kini.+ Njengombana ngenzile, ngilokho okuzokwenziwa kibo. Bazokuya ekudingisweni, ekuthunjweni.+ 12 Ikosana ephakathi kwabo izokuthwala umthwalwayo emahlombenayo begodu ikhambe ebumnyameni. Izokuthumbusa imbobo ebodeni begodu izokukhupha umthwalwayo ngayo.+ Izokugubuzesa ubuso bayo ukuthi ingaboni phasi.’ 13 Ngizokuphosela inedami phezu kwayo begodu izokubanjwa yinedami yokuzuma.+ Ngemva kwalokho ngizoyiletha eBhabhiloni enarheni yamaKhaledi* kodwana angekhe iyibone begodu izokufela lapho.+ 14 Boke abambhodileko, abasizi bakhe, amasotjakhe ngizobarhatjhela kiyo yoke indawo+ begodu ngizokukhupha isabula ngibagijimise ngayo.+ 15 Kuzokufuze bazi ukuthi nginguJehova nangibarhatjhela hlangana neentjhaba begodu ngibarhatjhela hlangana neenarha. 16 Kodwana ngizokusindisa abambalwa esabuleni, endlaleni nesibethweni bona babatjele ngazo zoke izenzo zabo ezinyenyisako hlangana neentjhaba abazokuya kizo; kuzokufuze bazi ukuthi nginguJehova.”

17 Ilizwi lakaJehova lafika kimi godu, lathi: 18 “Ndodana yomuntu, kufuze udle uburotho bakho ngokuhlengezela begodu usele amanzakho ngokutshwenyeka okukhulu nangokugandeleleka.+ 19 Ithi ebantwini benarheni, ‘Nakhu iKosi ePhakemeko uJehova ekutjhoko ezakhamuzini zeJerusalema enarheni yakwa-Israyeli: “Bazokudla uburotho ngokugandeleleka begodu basele amanzabo ngokusaba, ngombana inarhabo izokutjhatjalaliswa ngokupheleleko+ ngebanga lenturhu yalabo abahlala kiyo.+ 20 Izakhamuzi zemadorobheni zizokutjhatjalaliswa begodu inarha izokutjhiywa inganamuntu;+ kuzokufuze nazi ukuthi nginguJehova.”’”+

21 Ilizwi lakaJehova lafika kimi godu, lathi: 22 “Ndodana yomuntu, ngisiphi isaga eninaso kwa-Israyeli esithi, ‘Amalanga ayadlula begodu yoke imibono iba lilize’?+ 23 Nje-ke ithi kibo, ‘Nakhu iKosi ePhakemeko uJehova ekutjhoko: “Ngizokubangela bona isitjhwesi siphele begodu angekhe basasisebenzisa njengesaga kwa-Israyeli.”’ Kodwana batjele ukuthi, ‘Amalanga atjhidele+ begodu yoke imibono izokwenzeka.’ 24 Ngombana angekhe kusaba khona imibono emamala namkha ukuthukula okuyikohliso endlini yakwa-Israyeli.+ 25 ‘“Ngombana, mina Jehova, ngizokukhuluma. Nanyana ngiliphi ilizwi engilikhulumako lizokwenzeka ngaphandle kokuriyada.+ Emalangenakho,+ maye! Ndlu evukelako, ngizokukhuluma ilizwi begodu ngilizalise,” kutjho iKosi ePhakemeko uJehova.’”

26 Ilizwi lakaJehova lafika kimi godu, lathi: 27 “Ndodana yomuntu, nakhu abantu* bakwa-Israyeli abakutjhoko, ‘Imibono oyibonako ingeyeminyaka eminengi ezako, begodu izinto ophorofida ngazo zingezesikhathi eside.’+ 28 Nje-ke ithi kibo, ‘Nakhu iKosi ePhakemeko uJehova ekutjhoko: “‘Alikho nalinye lamezwami elizokuriyada; nanyana yini engiyitjhoko izokwenzeka,’ kutjho iKosi ePhakemeko uJehova.”’”