Yokuthoma YamaKhosi

16 Nje-ke ilizwi lakaJehova lafika kuJehu+ indodana kaRhanani+ ngokujamelene noBhatjha, lathi: 2 “Ngakuvusa ethulini, ngakwenza umrholi wabantu bami u-Israyeli,+ kodwana bewusolo ukhamba endleleni kaJerobhowamu, wabangela nabantu bami u-Israyeli ukuthi bone ukwenzela bona bangisilinge ngezono zabo.+ 3 Nje-ke ngithanyela uBhatjha nendlwakhe begodu indlwakhe ngizoyenza ibe njengendlu kaJerobhowamu+ indodana kaNebathi. 4 Nanyana ngubani ongowakaBhatjha ofela edorobheni uzokudliwa zizinja begodu nanyana ngubani ongewakhe ofela emmangweni uzokudliwa ziinyoni zomkayi.”

5 Malungana nawo woke omunye umlando kaBhatjha, akwenzileko namandlakhe, akukatlolwa na encwadini yomlando weenkhathi zamakhosi wakwa-Israyeli? 6 Nje-ke uBhatjha walaliswa nabokhokho bakhe, wabulungwa eTiritsa;+ u-Ela indodanakhe waba yikosi esikhundleni sakhe. 7 Godu ngomphorofidi uJehu indodana kaRhanani, ilizwi lakaJehova lafika ngokujamelene noBhatjha nomndenakhe ngebanga labo boke ubumbi abenzileko emehlweni kaJehova ngokumsilinga ngomsebenzi wezandla zakhe, waba njengendlu kaJerobhowamu nangebanga lokusahlela+ uNadabi.

8 Ngomnyaka wama-26 wokubusa kweKosi yakwaJuda u-Asa, u-Ela indodana kaBhatjha waba yikosi kwa-Israyeli eTiritsa, wabusa iminyaka emibili. 9 Isisebenzi sakhe uZimri, isikhulu sengcenye yebutho lakhe leenkarana, waluka amano wokumsahlela nakaseTiritsa aduda etjwaleni endlini ka-Aritsa, obekamphathi wesigodlo eTiritsa. 10 UZimri wafika wamsahlela+ bewambulala ngomnyaka wama-27 wokubusa kweKosi yakwaJuda u-Asa bewaba yiKosi esikhundleni sakhe. 11 Uthe nakaba yikosi, msinyana ngemva kokuhlala esihlalweni sakhe sobukhosi, wasahlela yoke indlu kaBhatjha. Akhenge atjhiye namunye wabaduna, kungayi ngokuthi ziinhlobo zakhe* namkha bangani bakhe. 12 Nje-ke uZimri warhayila yoke indlu kaBhatjha, ngokuvumelana nelizwi uJehova alikhuluma ngomphorofidi uJehu+ ngokujamelene noBhatjha. 13 Lokhu kungebanga lazo zoke izono uBhatjha nendodanakhe u-Ela abazenzileko nezono ababangele u-Israyeli bona azenze ngokusilinga uJehova uZimu ka-Israyeli ngeenthombe zawo ezingasizi ngalitho.+ 14 Malungana nawo woke omunye umlando ka-Ela, koke akwenzileko, akukatlolwa na encwadini yomlando weenkhathi zamakhosi wakwa-Israyeli?

15 Ngomnyaka wama-27 wokubusa kweKosi yakwaJuda u-Asa, uZimri waba yikosi amalanga alikhomba eTiritsa lokha amasotja ahlome amatende ayokulwa neGibhethoni,+ ebekungeyamaFilista. 16 Ngokukhamba kwesikhathi, amasotja ebekakampile ezwa kuthiwa: “UZimri uluke amano begodu wasahlela ikosi wayibulala.” Yeke woke ama-Israyeli abeka u-Omri+ isikhulu sebutho bona abe yikosi kwa-Israyeli ngelangelo ekampeni. 17 U-Omri no-Israyeli woke bakhuphuka basuka eGibhethoni bayokuvimbezela iTiritsa. 18 UZimri nakabona ukuthi idorobho lithunjiwe, watjhinga embhotjhongweni ovikelekileko wendlu yekosi,* watjhisa indlu leyo naye watjhela ngaphakathi, wafa.+ 19 Lokhu kungebanga lezono azenza ngokwenza okumbi emehlweni kaJehova, ngokukhamba endleleni kaJerobhowamu nangebanga lesono abangela u-Israyeli ukuthi asenze.+ 20 Malungana nawo woke omunye umlando kaZimri namanwakhe, akukatlolwa na encwadini yomlando weenkhathi zamakhosi wakwa-Israyeli?

21 Kungesikhatheso-ke lapho abantu bakwa-Israyeli bahlukana phakathi baba ziingcenye ezimbili. Enye ingcenye yabantu yalandela uTibni indodana kaGinathi, ifuna ukumenza ikosi, enye ingcenye yalandela u-Omri. 22 Kodwana abantu ebebalandela u-Omri baba namandla ukudlula abantu ebebalandela uTibni indodana kaGinathi. Nje-ke uTibni wahlongakala begodu u-Omri waba yikosi.

23 Ngomnyaka wama-31 wokubusa kweKosi yakwaJuda u-Asa, u-Omri waba yikosi kwa-Israyeli, wabusa iminyaka eli-12. ETiritsa wabusa iminyaka esithandathu. 24 Wathenga intaba yeSamariya kuTjhemeri ngamatalende* wesiliva amabili, wakha idorobho entabeni leyo. Wathiya idorobho alakhilekwelo ngokuthi yiSamariya,*+ walithiyelela ngoTjhemeri umnikazi wentaba leyo. 25 U-Omri bekasolo enza okumbi emehlweni kaJehova bekamumbi khulu ukudlula boke ebebangaphambi kwakhe.+ 26 Wakhamba ngazo zoke iindlela zakaJerobhowamu indodana kaNebathi nesono abangele u-Israyeli bona asenze ngokusilinga uJehova uZimu ka-Israyeli ngeenthombe+ zawo ezingasizi ngalitho. 27 Malungana nawo woke omunye umlando ka-Omri, akwenzileko nezenzo zakhe zamandla, akukatlolwa na encwadini yomlando weenkhathi zamakhosi wakwa-Israyeli? 28 Ngemva kwalokho, u-Omri walaliswa nabokhokho bakhe wabulungwa eSamariya; indodanakhe u-Arhabi+ yaba yikosi esikhundleni sakhe.

29 U-Arhabi indodana ka-Omri waba yiKosi kwa-Israyeli ngomnyaka wama-38 wokubusa kwekosi yakwaJuda u-Asa begodu u-Arhabi indodana ka-Omri wabusa ama-Israyeli eSamariya+ iminyaka ema-22. 30 U-Arhabi indodana ka-Omri wenza okumbi khulu emehlweni kaJehova ukudlula boke abangaphambi kwakhe.+ 31 Njengokungathi yinto encani kuye ukukhamba ezonweni zakaJerobhowamu+ indodana kaNebathi, wangezelela ngokutjhada noJezebheli+ indodakazi ka-Ethi-Bhali, ikosi yamaTsidoni,+ wathoma ukulotjha uBhali+ begodu wamkhothamela. 32 Ukungezelela kilokho, wenzela uBhali+ i-aldara endlini* kaBhali ayakhe eSamariya. 33 Godu u-Arhabi wenza isigodo esicwengileko.*+ U-Arhabi wenza okunengi bona asilinge uJehova uZimu ka-Israyeli ukudlula woke amakhosi wakwa-Israyeli angaphambi kwakhe.

34 Emihlenakhe, uHiyeli weBhetheli wavuselela iJerikho. Ngokulahlekelwa ngu-Abiramu izibulo lakhe, wabeka isisekelo salo begodu ngokulahlekelwa nguSegubi ubuphetjhani bakhe wabeka iminyangwalo, ngokuvumelana nelizwi lakaJehova alikhuluma ngoJotjhuwa indodana kaNuni.+