Joromiya
49 Nakhu uJehova akutjhoko malungana nama-Amoni+ uthi:
“Kghani u-Israyeli akanamadodana?
Kghani akasiyindlalifa?
Kubayini uMalikamu+ athathe uGadi?+
Begodu kubayini abantu bakhe bahlala emadorobheni wakwa-Israyeli?”
2 Nje-ke qala! amalanga ayeza kutjho uJehova,
‘Lapho ngizokubangela itjhada elilitshwayo lepi bona lizwakale ngokujamelene neRabha+ yama-Amoni.+
Izokuba yindunduma emarubhi,
Namadorobhayo ayibhodileko azokutjhiswa ngomlilo.’
‘Begodu u-Israyeli uzokuthatha inarha yalabo abamthathele inarhakhe,’+ kutjho uJehova.
3 ‘Rhahlawula, wena Rhetjhibhoni ngombana i-Ayi litjhatjalalisiwe!
Lilani, madorobho abhodileko weRabha.
Mbatha umgodla.
Rhahlawula begodu ukhambakhambe hlangana neembaya zamatje,*
Ngombana uMalikamu uzokuya ekudingisweni.
Kuhlanganise nabaphristi bakhe namakhosanakhe.+
4 Kubayini uzikhakhazisa ngemirhoba,
Ngomrhobakho ogelezako, maye! Ndodakazi engakathembeki,
Ethembela emnothwenayo
Begodu uthi: “Ngubani ozokuza ngokujamelene nami?””
5 “‘Qala! Ngiletha into ethusako kuwe,’ kutjho iKosi ePhakemeko, uJehova wamabutho,
Evela kibo boke abakuzombileko.
Uzokurhatjhekela kiyo yoke indawo,
Begodu akunamuntu ozokubuthelela ababalekako.’”
6 “‘Kodwana ngemva kwalokho ngizokubuthelela abathunjiweko bakwa-Amoni,’ kutjho uJehova.”
7 Malungana ne-Edomu, nakhu uJehova wamabutho akutjhoko:
“Kghani ukuhlakanipha akusekho eTemani?+
Kghani iseluleko esihle sitjhabalele kilabo abanokuzwisisa?
Kghani ukuhlakanipha kwabo sekulilize na?
8 Balekani, jikani!
Khambani, nihlale emirhobeni ezikileko, nina zakhamuzi zeDedani!+
Ngombana ngizokuletha ihlekelele ku-Esewu
Isikhathi nasifikako ngizomjezisa.
9 Nangabe ababutheleli bamadiribe beza kuwe,
Angekhe na batjhiye amanye bona aburujwe?
Nangabe amasela afika ebusuku,
Angabangela umonakalo ngendlela afuna ngayo.+
10 Kodwana u-Esewu ngizomtjhiya anganalitho
Ngizokwembula iindawo zakhe zokuzifihla,
Bona angazifihli.
11 Tjhiya abantwabakho abanganaboyise,
Ngizokusindisa ukuphila kwabo,
Abahlolokazi bakho bazokuthembela kimi.”
12 Ngombana nakhu uJehova akutjhoko: “Qala! Nangabe labo abangakabelwa bona basele ikapho kufuze bayisele, kghani kufuze nina niliswe ningajeziswa ngokupheleleko? Angekhe ningajeziswa, ngombana kufuze niyisele.”+
13 “Ngombana ngifunga ngami,” kutjho uJehova, “bona iBhozira izokuba yinto esatjwako, elihlazo,+ etjhatjalalisiweko nesiqalekiso; begodu amadorobhayo woke azokutjhabalala ngokupheleleko.”+
14 Ngizwe umbiko ovela kuJehova,
Kuthunyelwe isithunywa hlangana neentjhaba, sithi:
“Hlanganani ndawonye begodu nizokulwa naye;
Lungiselelani ipi.”+
15 “Qala! Ngikwenze wanyazeka hlangana neentjhaba,
Wanyenyeka hlangana nabantu.+
16 Ukuhlengezela okubangeleko kukukhohlisile,
Ukuzikhukhumeza kwehliziywakho,
Wena ohlala edwaleni elisithekileko,
Ohlala embundwini ophakeme khulu.
Ngitjho nanyana wakhe isidleke sakho esiphakeme khulu njengekhozi,
Ngizokwehlisa lapho,” kutjho uJehova.
17 “U-Edomu kufuze abe yinto yokusatjwa.+ Woke umuntu odlula ngakuye uzomqala ngokusaba, ambethele umlozi ngebanga lazo zoke iimbetho zakhe. 18 Njengombana atjhabalalisa iSodoma neGomora namadorobho ahlanu kwalo,”+ uJehova uthi, “Akunamuntu ozokuhlala lapho begodu akunamuntu ozokunzinza lapho.+
19 “Qala! Kunomuntu ozokuvela ngokujamelene namadlelo avikelekileko njengebhubezi+ elivela ehlathini elinzima hlangana neJordani, kodwana esikhathini esingaphelisi ihliziyo ngizomenza ambalekele. Ngizokubeka okhethiweko phezu kwakhe. Ngombana ngubani onjengami, ngubani ongajamelana nami? Ngimuphi umalusi ongajama phambi kwami?+ 20 Nje-ke yizwani nina bantu, isiqunto uJehova asenzileko ngokujamelene no-Edomu nangalokho azimisele ukukwenza ngokujamelene nezakhamuzi zeTemani:+
Ngokuqinisekileko abancani bomhlambi bazokurhudulelwa kude.
Uzokwenza indawabo yokuhlala ibe marubhi ngebanga labo.+
21 Nakuzwakala itjhada lokuwa kwabo, iphasi lizokusikinyeka.
Kunesililo!
Itjhada lizwakale belayokufika eLwandle eliBomvu.+
22 Qala! Njengekhozi uzokukhuphuka begodu ehlele phasi,+
Ngokunjalo uzokululela amaphikwakhe phezu kweBhozira.+
Ngelangelo, iinhliziyo zeengorho zakwa-Edomu
Zizokuba njengehliziyo yomfazi obelethako.”
23 Malungana neDamaseku:+
“IRhamathi+ ne-Ariphadi ziphathiswe iinhloni,
Ngombana zizwe umbiko omumbi.
Ziphelelwe mamandla
Kunokutshwenyeka elwandle okungekhe kwathuliswa.
24 IDamaseku iphelelwe sibindi.
Ijikile bona ibaleke, kodwana yabanjwa kuthukwa.
Ukugandeleleka nobuhlungu kuyibambile,
Njengomfazi obelethako.
25 Kuza njani bona idorobho elidunyiswako lingakatjhiywa,
Idorobho lethabo?
26 Ngombana amasokanalo azokuwa ematatawinalo,
Begodu woke amasotja azokutjhabalala ngelangelo,” kutjho uJehova wamabutho.
27 “Ngizokutjhisa iboda leDamaseku ngomlilo,
Begodu uzokurhiribidela imibhotjhongo evikelekileko yeBhen-Hadadi.”+
28 Ngombana iKedari+ nemibuso yeRhatsori, leyo iKosi uNebukadinetsari* yeBhabhiloni eyayisahlelako, nakhu uJehova akutjhoko:
“Sikima, ukhuphukele eKedari,
Utjhabalalise amadodana wePumalanga.
29 Amatendabo nemihlambabo zizokuthathwa,
Amatjhilabo wetende nazo zoke izinto zabo.
Amakamelabo azokuthathwa,
Bazobalilela bathi, ‘Sibhodwe kusaba!’”
30 “Balekani, tjhingani kude!
Khambani niyokuhlala emirhobeni ezikileko, nina zakhamuzi zeRhatsori,” kutjho uJehova.
“Ngombana iKosi uNebukadinetsari* yeBhabhiloni iluke amano wokulwa nani,
Begodu icabangisise ngamano ngokujamelene nani.”
31 “Sikima, khamba uyokujamelana nesitjhaba esinokuthula,
Esihlala ngokuvikeleka!” Kutjho uJehova.
“Asinaminyango namkha iinsimbi; begodu sihlala sisodwa.
32 Amakamelabo azokuphangwa,
Nefuywabo enengi izokuphangwa.
Ngizobarhatjhela mahlangothi woke,
Labo abarhuna amarhwanqabo,+
Begodu nanyana kukuphi lapho abaya khona ngizobalethela ihlekelele,” kutjho uJehova.
33 “IRhatsori izokuba yindawo yokuhlala yeempungutjha,
Itjhabalale ngokupheleleko.
Akunamuntu ozokuhlala lapho,
Begodu akunamuntu ozokunzinza lapho.”
34 Leli lilizwi lakaJehova elafika kuJoromiya umphorofidi malungana ne-Elamu+ ekuthomeni kokubusa kweKosi yakwaJuda uTsedekhiya,+ lithi: 35 Nakhu uJehova wamabutho akutjhoko, ‘Qala ngiphula umsubela we-Elamu,+ umthombo wamandlabo. 36 Ngizokuletha e-Elamu imimoya emine evela emikhawulweni emine yezulwini begodu ngizobarhatjhela kiyo yoke imimoya le. Bakwa-Elamu akunasitjhaba engekhe barhatjhekele kiso.’”
37 “Ngizokuphahlaza ama-Elamu phambi kwamanababo naphambi kwalabo abafuna ukuphila kwabo begodu ngizobalethela ihlekelele, ilaka lami elivuthako,” kutjho uJehova. “Ngizokuthumela isabula ngemva kwabo bekube kulapho ngibaqeda khona.”
38 “Ngizokubeka isihlalo sami sobukhosi e-Elamu+ begodu lapho ngizokutjhabalalisa ikosi namakhosana,” kutjho uJehova.
39 Kodwana emihleni yokuphela, ngizokubuthelela abathunjiweko be-Elamu,” kutjho uJehova.