Yokuthoma YeenKronike
12 La madoda eza kuDavida eTsikhilagi+ ngesikhathi angakghoni ukukhambakhamba ngokutjhaphulukileko ngebanga lakaSawula+ indodana kaKhitjhi, bewahlangana neengorho ezamsekela epini.+ 2 Bewahlome ngomsebe begodu bewakghona ukusebenzisa isandla sokudla nesesincele+ bona aphose amatje ngesarwayi+ namkha adumuze imicibitjholo ngomsebe. Bewabafowabo bakaSawula, avela kwaBhenjamini.+ 3 Ihloko yawo bekungu-Arhiyezeri, akunye noJowatjhi, bobabili bebamadodana kaTjhema umGibeya;+ uJezuweli noPelethi amadodana ka-Azimavethi,+ uBheraka, uJehu umAnatothi, 4 uYitjhimaya umGibiyoni,+ ingorho ehlangana nabamatjhumi amathathu+ begodu bekamphathi wabamatjhumi amathathu godu bekunoJoromiya, uJarhaziyeli, uJorhanani, uJozabadi umGedera, 5 u-Eluzayi, uJerimothi, uBhehaliya, uTjhemariya, uTjhefathiya umRharifi, 6 u-Elikhana, uYitjhiya, u-Azareli, uJowezeri noYatjhobiyamu, okumaKhorarhi;+ 7 kuhlanganise uJuweli noZebadiya amadodana kaJerorhamu weGedori.
8 Abanye abantu bakwaGadi baya ngehlangothini lakaDavida esiphephelweni esisemmangweni;+ bebaziingorho, bamajoni abandulelwe ipi, bahlomile, baphethe iinhlangu ezikulu nemikhonto, ubuso babo bebunjengobuso bamabhubezi begodu bebamsinya njengamaqina eentabeni. 9 U-Etseri bekayihloko, u-Obadiya angowesibili, u-Eliyabu angowesithathu, 10 uMitjhimana angowesine, uJoromiya angowesihlanu, 11 u-Atayi angowesithandathu, u-Eliyeli angowekhomba, 12 uJorhanani angowobunane, u-Elizabadi angowethoba, 13 uJoromiya angowetjhumi, uMakibhanayi angowetjhumi nanye. 14 Laba bebavela ekorweni kaGadi,+ baziinduna zebutho. Omncani kunabo boke bekalingana nabali-100 begodu omkhulu kunabo boke bekalingana nabayi-1 000.+ 15 Amadoda la ngiwo ayama iJordani nayiphuphuma emadongenayo ngenyanga yokuthoma, aqotha boke ebebahlala eenarheni eziphasi, atjhinga epumalanga netjingalanga.
16 Amanye amadoda wakwaBhenjamini newakwaJuda nawo eza kuDavida esiphephelweni sakhe.+ 17 Yeke uDavida waphuma wathi kiwo: “Nangabe nize kimi ngokuthula bona nizongisiza, ihliziywami izokuba munye nani. Kodwana nangabe nizele ukungithengisa emanabenami ngitjho nanyana izandla zami zingakenzi litho elimbi, uZimu wabokhokho bethu akakubone lokho, ahlulele.”+ 18 Nje-ke ummoya wafika ku-Amasayi,+ ihloko yabamatjhumi amathathu wathi:
“Singebakho Davida, sinawe, ndodana kaJese.+
Ukuthula, kwanga ungaba nokuthula begodu kwanga loyo okusizako angaba nokuthula,
Ngombana uZimakho uyakusiza.”+
Yeke uDavida wabamukela bewababeka bona babe hlangana neenduna zamabutho.
19 Abanye abavela kwaManase nabo bahlubukela kuDavida nakeza namaFilista azokulwa noSawula kodwana azange awasize amaFilista ngombana ngemva kokubonisana, amakhosi wamaFilista+ amqotha, athi: “Uzokuhlubukela ekosinakhe uSawula, thina-ke sibhadele ngeenhloko zethu.”+ 20 Laba abavela kwaManase bahlubukela kuye nakaya eTsikhilagi:+ ngu-Adina, uJozabadi, uJediyeli, uMikhayeli, uJozabadi, u-Elihu noTsiletayi, iinhloko zeenkulungwana zakwaManase.+ 21 Basiza uDavida nakalwa nebutho labadlelezeli ngombana boke bebamadoda anamandla nesibindi+ begodu baba ziinduna zebutho. 22 Ilanga nelanga abantu bebasolo beza kuDavida+ bazomsiza bekwaba kulapho baba yikampa ekulu njengekampa kaZimu.+
23 Lesi sibalo seenduna zalabo abahlomele ipi, abeza kuDavida eRhebroni+ bona bazokudlulisela ubukhosi bakaSawula kuye ngokuvumelana nomyalo kaJehova.+ 24 Amadoda wakwaJuda ebewaphethe iinhlangu ezikulu nemikhonto bewazii-6 800, ahlomele ipi. 25 KewakwaSimiyoni, iingorho, amadoda anesibindi webutho bewazii-7 100.
26 WamaLevi, bewazii-4 600. 27 UJehoyada+ bekamrholi wamadodana ka-Aroni+ begodu bekakunye nabazii-3 700, 28 noTsadokhi,+ isokana elinamandla nesibindi, kuhlanganise neenduna ezima-22 ezivela ekorwenakhe.
29 KebakwaBhenjamini, abafowabo bakaSawula,+ bekunabazii-3 000 begodu inengi labo phambilini belisekela indlu kaSawula ngokuthembeka. 30 Kebakwa-Efrayimu, bekunamadoda anamandla nesibindi azii-20 800 begodu adumile hlangana neenkoro zaboyise.
31 Engcenyeni yekoro kaManase, bekunabazii-18 000 abagagulwa bona beze bazokubeka uDavida ukuthi abe yikosi. 32 Ekorweni ka-Isakari, bekunabama-200 ebebahlangana kweenduna zabo, ebebazwisisa iinkhathi begodu bazi ukuthi u-Israyeli kufuze enzeni begodu boke abafowabo bebangaphasi kwelawulo labo. 33 KebakwaZebuloni, bekunabazii-50 000 ebebangaba sebuthweni, bajame ngendlela ehlelekileko njengeenqhema zamasotja banazo zoke iinkhali zepi, boke bebazihlanganise noDavida ngokuthembeka okupheleleko.* 34 KebakwaNafitali, bekunamakhosana ayi-1 000 begodu kunye nabo bekunabazii-37 000 baneenhlangu ezikulu nemikhonto. 35 KebakwaDani, labo ebebajama ngendlela ehlelekileko njengeenqhema zamasotja bebazii-28 600. 36 Kebakwa-Atjheri, labo ebebangaba sebuthweni bajame ngendlela ehlelekileko njengeenqhema zamasotja bebazii-40 000.
37 Abavela ngaphetjheya kweJordani,+ kebakwaRubeni, bakwaGadi nengcenye yekoro kaManase, bekunamajoni azii-120 000 anayo yoke imihlobo yeenkhali zepi. 38 Boke laba bebamadoda wepi, bahlangana ndawonye ngerhemo lepi; beza ngehliziyo epheleleko eRhebroni bazokubeka uDavida bona abe yikosi phezu kwaka-Israyeli woke begodu woke u-Israyeli bekamunye* ekufuneni ukubeka uDavida bona abe yikosi.+ 39 Bahlala lapho noDavida amalanga amathathu, badla begodu basela ngombana abafowabo bebabenzele amalungiselelo. 40 Godu labo abaseduze nabo ngitjho nabakude njengabakwa-Isakari, bakwaZebuloni nakwaNafitali bebaletha ukudla ngabodumbana, ngamakamela, ngeemeyila nangeenkomo, izinto zeflowuru, amakuke wamafeyi agangadelweko namadiribe omisiweko, iwayini, amafutha, iinkomo nezimvu ezinengi khulu ngombana bekuthatjiwe kwa-Israyeli.