Hezekiyeli
5 “Nakunguwe ndodana yomuntu, zithathele isabula ebukhali uyisebenzisele ukurhuna. Rhuna ihlokwakho neendevu zakho, ngemva kwalokho uthathe iinkali bona ulinganise bese uhlukanise iinhluthu ngeengcenyana. 2 Uzokutjhisa enye ingcenye emlilweni phakathi kwedorobho lokha amalanga wokuvimbezela aphelile.+ Ngemva kwalokho, uzokuthatha enye ingcenye uyisike ngesabula kilo loke idorobho,+ enye ingcenye uzoyirhatjha emoyeni begodu ngizokukhupha isabula bona ngibagijimise.+
3 “Kufuze uthathe iinhluthu ezincani uziphuthele emphethweni wesambatho sakho. 4 Uthathe ezinye zazo uziphosele emlilweni begodu uzitjhise zibe mlotha. Kilokhu umlilo uzokurhatjheka kiyo yoke indlu yakwa-Israyeli.+
5 Nakhu iKosi ePhakemeko uJehova ekutjhoko: ‘Leli liJerusalema. Ngilibeke phakathi kweentjhaba nazo zoke iintjhaba ezilibhodileko. 6 Ngombana lihlubukile emyalwenami nemthethwenami, lenze ngokukhohlakala ukudlula iintjhaba nazo zoke iinarha ezilibhodileko.+ Ngombana bale imithethwami begodu akhenge bakhambe ngemiyalwami.’
7 “Nje-ke nakhu iKosi ePhakemeko uJehova ekutjhoko: ‘Ngebanga lokuthi benitshwenya khulu ukudlula zoke iintjhaba ezinibhodileko begodu akhenge nikhambe ngomyalwami namkha nenze ngokomthethwami kodwana kunalokho nilandele imithetho yazo zoke iintjhaba ezinibhodileko,+ 8 nakhu iKosi ePhakemeko uJehova ekutjhoko: “Maye! Dorobho, qala ngijamelene nawe + begodu ngizokukhupha isahlulelo ngokujamelene nawe phambi kwamehlo weentjhaba.+ 9 Ngizokwenza kuwe ngendlela engingakhenge ngenze ngayo ngaphambilini, nangendlela engeze ngenza ngayo godu ngebanga lazo zoke izinto zakho ezinyenyisako.+
10 “‘“Nje-ke abobaba phakathi kwenu bazokudla amadodanabo+ namadodana azokudla aboyise begodu ngizokukhupha isahlulelo phakathi kwenu, benginirhatjhele kiwo woke amahlangothi.”’+
11 Nje-ke nangisaphilako kutjho iKosi ePhakemeko uJehova, ‘ngombana yindawami ecwengileko enayisilaphaza ngazo zoke iinthombe zenu ezinyenyisako nangazo zoke izinto ezinyenyisako+ enizenzileko, ngizokwala, amehlwami angekhe akuzwele ubuhlungu begodu angekhe ngikurhawukele.+ 12 Ingcenye izokuhlongakala ngesifo namkha itjhabalale phakathi kwenu ngendlala. Enye ingcenye izokuwela kini noke ngesabula+ begodu ngizokurhatjhela ingcenye yokugcina kiyo yoke indawo bengikhuphe isabula bona ngibagijimise.+ 13 Ngemva kwalokho, ukusilingeka kwami kuzokuphela nelaka lami ngokujamelene nabo lizokwehla bese ngizokwaneliseka.+ Kuzokufuze bazi ukuthi mina Jehova nginguZimu ofuna kulotjhwe yena kwaphela,+ nangiqeda ukukhupha ilaka lami ngokujamelene nabo.
14 Ngizokwenza ube yindawo enganalitho, into ehlazisako hlangana neentjhaba ezikubhodileko nemehlwenabo boke abadlulako.+ 15 Uzokuba yinto ehlazisako nekuhlekiswa ngayo,+ isibonelo esisiyeleliso nento ethusako hlangana neentjhaba ezikubhodileko, nangikukhuphela isahlulelo ngokusilingeka, ngetukuthelo nangokukujezisa kabuhlungu. Mina Jehova ngikhulumile.
16 Ngizokuthumela ngokujamelene nabo imicibitjholo ebulalako yendlala bona ibatjhabalalise. Imicibitjholo engizonithumela yona izonitjhabalalisa.+ Ngizokwenza indlala yande ngokuthi ngiqede isabelo senu sokudla.*+ 17 Ngizokuthumela kini indlala neembandana eziyingozi+ begodu zizokubulala abantwabenu. Isibetho nokuphalaka kweengazi kuzokwanda begodu ngizokuletha isabula ngokujamelene nani.+ Mina Jehova ngikhulumile.’”