Hezekiyeli

20 Nje-ke ngomnyaka wekhomba, ngenyanga yesihlanu, ngelanga letjhumi lenyanga, abanye babadala bakwa-Israyeli beza bahlala phambi kwami bona babuze kuJehova. 2 Nje-ke ilizwi lakaJehova leza kimi, lathi: 3 “Ndodana yomuntu, khuluma nabadala bakwa-Israyeli, ubatjele ukuthi, ‘Nakhu iKosi ePhakemeko uJehova ekutjhoko: “Nize ukuzokubuza kimi? ‘Nangisaphilako, angekhe ngiwuphendule umbuzwenu,’+ kutjho iKosi ePhakemeko uJehova.”’

4 “Ukulungele na ukubahlulela? Ukulungele na ukubahlulela ndodana yomuntu? Bazise izinto ezinyenyisako ezenziwe bokhokho babo.+ 5 Batjele ukuthi, ‘Nakhu iKosi ePhakemeko uJehova ekutjhoko: “Ngelanga engakhetha ngalo u-Israyeli+ ngafunga esizukulwaneni sendlu kaJakopo, ngazenza ngaziwa enarheni yeGibhide.+ Iye ngafunga kibo ngathi, ‘NginguJehova uZimenu.’ 6 Ngelangelo ngafunga bona ngizobakhupha enarheni yeGibhide ngibase enarheni engibafunele yona, inarha egeleza ibisi neliju.+ Beyiyihle khulu ukudlula ezinye iinarha. 7 Yeke ngathi kibo, ‘Ngamunye wenu kufuze alahle izinto ezinyenyisako eziphambi kwamehlwenu; ningazisilaphazi ngeenthombe ezinyenyisako* zeGibhide.+ NginguJehova uZimenu.’+

8 “‘“Nje-ke bahlubuka kimi begodu bebangakazimiseli ukungilalela. Akhenge bazilahle izinto ezinyenyisako ebeziphambi kwabo, akhenge bazilahle iinthombe ezinyenyisako zeGibhide.+ Yeke ngathembisa ukukhuphela ilaka lami kibo nokukhuphela ukusilingeka kwami enarheni yeGibhide. 9 Engakwenzako ngakwenza ngebanga legama lami bona lingasilaphazwa phambi kweentjhaba ebebahlala hlangana nazo.+ Ngazenza ngaziwa kibo phambi kweentjhaba nangibakhupha enarheni yeGibhide.+ 10 Yeke ngabakhupha enarheni yeGibhide ngabanqophisela emmangweni.+

11 “‘“Ngabanikela imithethwami, ngabenza bazi iinqunto zami zokwahlulela,+ bona abantu abazilandelako bafumane ukuphila ngazo.+ 12 Ngabanikela amasabathami+ njengetshwayo phakathi kwami nabo,+ bona bazi ukuthi nginguJehova, ngimi obacwengisako.

13 “‘“Yeke indlu ka-Israyeli yahlubuka kimi emmangweni.+ Akhenge ikhambe ngemithethwami begodu yala iinqunto zami zokwahlulela, umuntu nakazilandelako uzokuphila ngazo. Basilaphaze amasabathami. Nje-ke ngithembise ukukhuphela ilaka lami kibo emmangweni bona libarhiribidele.+ 14 Engakwenzako ngakwenza ngebanga legama lami bona lingasilaphazwa phambi kweentjhaba, phambi kwabantu enganikhupha phambi kwabo.+ 15 Ngibuye ngafunga kibo emmangweni bona angekhe ngibanikele inarha engithe ngizobanikela yona,+ inarha egeleza ibisi neliju,+ ebeyiyihle khulu ukudlula ezinye iinarha, 16 ngebanga lokuthi bala iinqunto zami zokwahlulela, akhenge bakhambe ngemithethwami begodu basilaphaze amasabathami ngombana iinhliziyo zabo bezilandela iinthombe zabo ezinyenyisako.+

17 “‘“Kodwana ngabazwela ubuhlungu, akhenge ngibatjhabalalise; akhenge ngibarhayile emmangweni. 18 Ngathi emadodanenabo emmangweni+ ningakhambi ngemithetho yabokhokhwenu+ namkha nenze ngokwezahlulelo zabo namkha nizisilaphaze ngeenthombe zabo ezinyenyisako. 19 NginguJehova uZimenu. Khambani ngemithethwami, nenze ngokweenqunto zami zokwahlulela begodu nizibulunge.+ 20 Cwengisani amasabathami+ azokuba litshwayo phakathi kwenu nami bona nazi ukuthi nginguJehova uZimenu.’+

21 “‘“Kodwana amadodana athoma ukuhlubuka kimi.+ Akhenge akhambe ngemithethwami begodu akhenge abulunge namkha enze ngokweenqunto zami zokwahlulela, umuntu nakazilandelako uzokuphila ngazo. Basilaphaze amasabathami. Yeke ngathembisa ukukhuphela ilaka lami kibo nokukhuphela ukusilingeka kwami koke kibo emmangweni.+ 22 Kodwana akhenge ngikwenze+ lokho ngebanga legama lami+ bona lingasilaphazwa phambi kweentjhaba, engabakhupha* phambi kwazo. 23 Ngafunga kibo godu emmangweni bona ngizobarhatjhela hlangana neentjhaba bengibarhatjhele hlangana neenarha+ 24 ngebanga lokuthi akhenge balandele iinqunto zami zokwahlulela, bala imithethwami+ basilaphaza amasabathami begodu balandela iinthombe zabokhokhwabo ezinyenyisako.+ 25 Ngibavumele nokuthi balandele iinqophiso ezingasizihle neenqunto zokwahlulela engeze baphile ngazo.+ 26 Ngibalise bona basilaphazeke ngemihlatjelwabo, lokha nabenza imihlatjelo*+ ngabantwababo aba mazibulo bona batjhatjalaliswe khona bazokwazi ukuthi nginguJehova.”’

27 “Nje-ke khuluma nendlu ka-Israyeli, maye! Ndodana yomuntu begodu uyitjele lokhu, ‘Nakhu iKosi ePhakemeko uJehova ekutjhoko: “Ngendlela le abokhokho benu bangihlambalazile ngokungathembeki kimi. 28 Ngibalethe enarheni engafunga ukubanikela yona.+ Lokha nababona yoke imibundu ephakemeko namakari wemithi,+ bathoma ukwenza imihlatjelwabo begodu benza iminikelo. Baletha imihlatjelwabo eliphunga elimnandi, bathululela neminikelwabo esiselo engangithabisiko lapho. 29 Yeke, ngababuza ukuthi, ‘Itjho ukuthini indawo ephakemeko eniya kiyo? (Isabizwa bona yiNdawo ePhakemeko bekube kunamhlanjesi.)’”’+

30 “Nje-ke ithi endlini yakwa-Israyeli, ‘Nakhu iKosi ePhakemeko uJehova ekutjhoko: “Inga-kghani nizisilaphaza ngendlela abokhokhwenu abazisilaphaza ngayo ngokuthi balandele iinthombe zabo ezinyenyisako begodu bangwadle neenthombe zabo?*+ 31 Inga-kghani nisazisilaphaza bekube kunamhlanjesi na ngokunikela yoke imihlatjelo eenthombeni zenu ezinyenyisako, ngokwenza umhlatjelo*+ ngamadodanenu? Maye! Ndlu ka-Israyeli.+ Inga-kghani ngesikhathi esifaneleko kufuze ngiphendule umbuzwenu?”’

“‘Nangisaphilako,’ kutjho iKosi ePhakemeko uJehova, ‘Angekhe ngiwuphendule umbuzwenu.+ 32 Khuyini eniyicabangako nanithi, “Asibeni njengeentjhaba, njengemindeni yezinye iinarha, ezilotjha iingodo namatje,”+ angekhe kwenzeke.’”

33 “‘Nangisaphilako,’ kutjho iKosi ePhakemeko uJehova, ‘Ngizokubusa phezu kwenu njengekosi ngesandla esinamandla, ngomkhono onamandla bona nginijezise, nizokubona ilaka lami.+ 34 Ngizonikhupha eentjhabeni nginibuthelele eenarheni ebenirhatjhekele kizo ngesandla esinamandla, ngomkhono onamandla bona nginijezise, nizokubona ilaka lami.+ 35 Ngizonikhupha emmangweni wabantu beentjhaba nginahlulele ubuso nobuso.+

36 “‘Njengombana ngahlulela abokhokho benu emmangweni wenarheni yeGibhide nani ngizonahlulela,’ kutjho iKosi ePhakemeko uJehova. 37 ‘Ngizonenza nidlule ngaphasi kwentonga kamelusi+ nginingenise ngaphasi kwesibopho sesivumelwano. 38 Ngizokususa kini iinhlubuki nalabo abonako kimi.+ Ngizobakhupha enarheni engasi ngeyabo kodwana angekhe bangene enarheni yakwa-Israyeli;+ kuzokufuze bazi ukuthi nginguJehova.’

39 “Nakunguwe, ndlu ka-Israyeli, nakhu iKosi ePhakemeko uJehova ekutjhoko: ‘Ngamunye wenu akakhambe ayokulotjha iinthombe zakhe ezinyenyisako.+ Ngemva kwalokho naningangilaleliko angekhe nisakghona ukulisilaphaza igama lami elicwengileko ngemihlatjelwenu nangeenthombe zenu ezinyenyisako.’+

40 “‘Kodwana entabeni ecwengileko, entabeni ephakemeko yakwa-Israyeli,’+ kutjho iKosi ePhakemeko uJehova, ‘kulapho yoke indlu yakwa-Israyeli, boke bazongilotjha enarheni.+ Ngizokuthaba ngani lapho begodu ngizokufuna iminikelwenu, neenthelo zokuthoma zeminikelwenu kizo zoke izinto zenu ezicwengileko.+ 41 Ngebanga lephunga elimnandi, ngizokuthaba ngani lokha nanginikhupha eentjhabeni begodu nginibuthele ndawonye eenarheni ebenirhatjhekele kizo+ begodu ngizokucwengiswa hlangana nani phambi kweentjhaba.’+

42 “‘Kuzokufuze nazi bona nginguJehova+ nanginikhupha enarheni yakwa-Israyeli+ nginise enarheni engafunga ukuyinikela abokhokhwenu. 43 Lapho nizokukhumbula ukuziphatha kwenu, nazo zoke izenzo zenu enazisilaphaza ngazo+ begodu nizozinyenya ngebanga lazo zoke izinto ezimbi enizenzileko.+ 44 Yeke kuzokufuze nazi bona nginguJehova nangisebenzelana nani ngebanga legama lami,+ ingasi ngokuziphatha kwenu okukhohlakeleko namkha ngokweendlela zenu ezikhohlakeleko, maye! Ndlu ka-Israyeli,’ kutjho iKosi ePhakemeko uJehova.”

45 Ilizwi lakaJehova lafika kimi godu, lathi: 46 “Ndodana yomuntu, qalisa ubuso bakho ehlangothini lesewula, memezela esewula begodu uphorofide ehlathini elisesimini esesewula. 47 Ithi ehlathini lesewula, ‘Yizwa ilizwi lakaJehova. Nakhu iKosi ePhakemeko uJehova ekutjhoko: “Ngenza umlilo ngokujamelene nawe,+ uzokurhiribidela yoke imithi ehlaza nayo yoke imithi eyomileko kuwe. Ilangabi angekhe licime+ begodu boke ubuso buzokutjhiswa ngilo, kusukela esewula ukuya etlhagwini. 48 Boke abantu bazokubona ukuthi ngimi, Jehova, owenzileko bona ungacinywa.”’”+

49 Ngathi: “Maye! Kosi ePhakemeko Jehova, bathi ngami, akakhulumi ngeenrarejo na?’”