Hezekiyeli

21 Ilizwi lakaJehova lafika kimi godu, lathi: 2 “Ndodana yomuntu, qala eJerusalema, umemezele ngokujamelene neendawo ezicwengileko begodu uphorofide ngokujamelene nenarha yakwa-Israyeli. 3 Ithi enarheni yakwa-Israyeli, ‘Ngilokhu uJehova akutjhoko: “Ngijamelene nawe, begodu ngizokukhupha isabulami emgodlenayo+ ngirhayile abalungileko nabakhohlakeleko. 4 Ngombana ngizokurhayila kuwe olungileko nokhohlakeleko, isabulami izokuphuma emgodlenayo ngokujamelene nabo boke abantu, kusukela esewula ukuya etlhagwini. 5 Boke abantu kuzokufuze bazi ukuthi mina, Jehova, ngikhuphe isabulami emgodlenayo. Angekhe ibuyele emuva godu.”’+

6 “Wena, ndodana yomuntu, bubula njengombana uhlengezela, bubula kabuhlungu phambi kwabo.+ 7 Nabangathi kuwe, ‘Kubayini ububula?’ Uzokuthi, ‘Kungebanga lombiko ngombana nakanjani uzokufika begodu zoke iinhliziyo zizokuncibilika ngebanga lokusaba zoke izandla zizokuba buthakathaka yoke imimoya izokudana, woke amadolwabo azokwehla amanzi.+ ‘Qala! Uzokufika nakanjani, kuzokwenzeka,’ kutjho iKosi ePhakemeko uJehova.”

8 Ilizwi lakaJehova lafika kimi godu, lathi: 9 “Ndodana yomuntu, phorofida uthi, ‘Nakhu uJehova akutjhoko: “Ithi, ‘Isabula! Isabula+ iloliwe begodu yenziwa yaba bukhali. 10 Ilolelwe ukuhlahlela okukhulu; yenziwe yaba bukhali bona ikhanye njengombani.’”’”

“Kghani akukafuzi sithabe?”

“Kghani izokwala intonga yobukhosi yendodanami,+ njengombana yenza emithini yoke?

11 “‘Inikelwe bona ilolwe begodu isetjenziswe ngesandla. Isabula le yenziwe yaba bukhali begodu iloliwe, bona umrhayili+ ayiphathe ngesandla.

12 “‘Lila, rhahlawula+ ndodana yomuntu, ngombana iza ngokujamelene nabantu bami; ijamelene nawo woke amakhosana wakwa-Israyeli.+ Laba bazokuba bongazimbi besabula nabantu bami. Tjengisa ukuthi udane khulu.* 13 Ngombana kuhlolisisiwe,+ kuzokwenzekani nangabe isabula yale intonga yobukhosi? Angekhe isaba khona,’+ kutjho iKosi ePhakemeko uJehova.

14 “Wena, ndodana yomuntu, phorofida ubethe izandla begodu ubuyelele ‘Isabula!’ Iinkhathi ezintathu. Yisabula yokubulala abongazimbi, isabula yokuhlahlela okukhulu, okubabhodileko.+ 15 Iinhliziyo zabo zizokuncibilika ngebanga lokusaba+ begodu abanengi bazokuwela emasangweni wedorobho labo; ngizokuhlahlela ngesabula izokukhanya njengombani begodu ilolelwe ukuhlahlela! 16 Izokuhlahlela ngesidleni! Nangesinceleni! Itjhinga nanyana kukuphi lapho ipentayo iqale khona! 17 Ngizokubetha izandla nganelise ilaka lami.+ Mina Jehova ngikhulumile.”

18 Ilizwi lakaJehova lafika kimi godu, lathi: 19 “Nakunguwe, ndodana yomuntu, tshwaya iindlela ezimbili isabula yekosi yeBhabhiloni ezokungena ngazo. Zombili zizokusuka enarheni yinye, kufuze ubeke imihlahlandlela lapho iindlela zihlukana khona ziya emadorobheni amabili. 20 Kufuze wenze itshwayo lendlela isabula ezokungena ngayo ngokujamelene neRabha+ yama-Amoni, nenye indlela ngokujamelene nendawo evikelekileko yeJerusalema+ kwaJuda. 21 Ngombana ikosi yeBhabhiloni ilisa ukusebenzisa ukuthukula lapho kuhlukana khona indlela, lapho iindlela ezimbili zihlukana khona. Isikinya imicibitjholo. Ibuza eenthombeni* zayo; ihlolisisa isibindi sesilwana. 22 Ukuthukula okusesandleni sayo sokudla kuqale eJerusalema bona ijamise iingodo zokutjhabalalisa, kwenziwe itjhada lokuhlahlela, kuphume ilizwi lokuhlahlela, kuliliswe itjhada lepi, kujanyiswe iingodo zokusahlela ngokujamelene namasango, yenze indunduma yokuvimbezela bona yakhe iboda lokuvimbezela.+ 23 Kodwana kuzokubonakala ngasuthi ukuthukulokho kumamala emehlweni walabo abenze isifungo kibo.*+ Kodwana izokukhumbula umlandwabo begodu ibathumbe.+

24 “Nje-ke nakhu iKosi ePhakemeko uJehova ekutjhoko: ‘Ubangele umlandwakho bona ukhunjulwe ngokwambula umtjhaphwakho nangokubangela izono zakho zibonwe kizo zoke izenzo zakho. Nje ukhunjuliwe, uzokuthathwa ngekani.’

25 Kodwana ilanga lakho selifikile, maye! Wena olimele khulu, kosana ekhohlakeleko yakwa-Israyeli,+ isikhathi sesijeziso sakho samaswaphela. 26 Nakhu iKosi ePhakemeko uJehova ekutjhoko: ‘Susa itjhila elithwalwa ehloko, ususe nesihlohlo.+ Izinto angekhe zihlale zinje.+ Phakamisa ophasi,+ wehlise ophakemeko.+ 27 Umonakalo, umonakalo, umonakalo ngizowenza. Angeze sisaba* ngesomunye umuntu bekube kulapho kufika onelungelo elingokomthetho+ begodu ngizomnikela sona.’+

28 “Nakunguwe ndodana yomuntu, phorofida uthi, ‘Nakhu iKosi ePhakemeko uJehova ekutjhoko malungana nama-Amoni namalungana nehlambawo.’ Ithi, ‘Isabula, isabula ilulelwe ukuhlahlela; yenziwe bukhali bona itjhabalalise begodu ikhanye njengombani. 29 Naphezu kwemibono emamala nokuthukula okumamala ngawe, abantu bakho bazokupakelelwa phezu kwababuleweko, abantu abanengi abakhohlakeleko ilanga labo esele lifikile, isikhathi sabo samaswaphela sokujeziswa. 30 Ibuyisele emgodlenayo. Ngizokwahlulela endaweni ovela kiyo,* enarheni ovela kiyo. 31 Ngizokuthululela ilaka lami kuwe. Ngizokuvuthela ngomlilo welaka lami, ngizokunikela ebantwini abanelunya abanekghono lokutjhabalalisa.+ 32 Uzokuba sibaseli somlilo;+ iingazi zakho zizokuthululelwa enarheni begodu angekhe usakhunjulwa, mina Jehova, ngikhulumile.’”