Hezekiyeli
46 “Nakhu iKosi ePhakemeko uJehova ekutjhoko: ‘Isango lesirhodlo esingaphakathi eliqale epumalanga+ kufuze lihlale livaliwe+ amalanga wokusebenza asithandathu+ kodwana ngelanga leSabatha nangelanga lenyanga etja, kufuze livulwe. 2 Ikosana izokungena ngendlela evela ngaphandle yethurini lesango,+ izokujama hlanu kwegoseni lesango. Abaphristi bazokunikela umnikelwayo opheleleko otjhiswako nemihlatjelwayo yetjhebiswano, izokukhothama ebungenweni besango bese iyaphuma. Kodwana isango kufuze lingavalwa bekube sebusuku. 3 Abantu benarha nabo bazokukhothama phambi kwakaJehova ebungenweni besangwelo ngamaSabatha nangeenyanga ezitja.+
4 “‘Umnikelo opheleleko otjhiswako ikosana ezowuletha kuJehova ngelanga leSabatha kufuze, ube ziimvana eziduna eziphile kuhle ezisithandathu neramu eliphile kuhle.+ 5 Umnikelo wekoroyi uzokuba yi-efa* yeramu begodu nanyana yini akghona ukuyinikela yeemvana eziduna kuhlanganise ihini* yamafutha ne-efa ngayinye.+ 6 Ngelanga lenyanga etja, umnikelo uzokuba yikunzana ephile kuhle yemhlambini, iimvana eziduna ezisithandathu neramu; kufuze kube ngeziphile kuhle.+ 7 Kufuze inikele njengomnikelo wekoroyi i-efa yekunzana, i-efa yeramu nanyana yini akghona ukuyinikela yeemvana eziduna. Kufuze inikele ihini yamafutha ye-efa ngayinye.
8 “‘Ikosana nayingenako, kufuze ingene ngendlela ehlanu kwethuri lesango begodu kufuze iphume ngayo.+ 9 Lokha abantu benarha nabangenako phambi kwakaJehova ngesikhathi seminyanya,+ labo abangenako bona bazokulotjha ngesango letlhagwini+ kufuze baphume ngesango lesewula,+ nalabo abangena ngesango lesewula kufuze baphume ngesango letlhagwini. Akunamuntu okufuze aphume ngendlela yesango angene ngalo ngombana kufuze baphume ngesango eliphambi kwabo. 10 Ikosana ehlangana nabo kufuze ingene nabangenako begodu kufuze iphume nabaphumako. 11 Ngeenkhathi zeminyanya nangeenkhathi zangaphambi kokufika kweminyanya, umnikelo weenthoro kufuze ube yi-efa bona ibe ngeyekunzana, i-efa bona ibe ngeyeramu begodu nanyana yini akghona ukuyinikela yeenkunzana eziduna kuhlanganise nehini yamafutha ne-efa ngayinye.+
12 “‘Nangabe ikosana inikela ngomnikelo opheleleko otjhiswako+ namkha imihlatjelo yetjhebiswano njengomnikelo osuka ehliziyweni kuJehova, izokuvulelwa isango eliqale epumalanga, izokunikela ngomnikelwayo opheleleko otjhiswako nangemihlatjelwayo yetjhebiswano njengombana yenza ngelanga leSabatha.+ Ngemva kokuthi seyiphumile, isango kuzokufuze livalwe.+
13 “‘Qobe langa kuzokufuze unikele ngemvana eduna ephile kuhle, esemnyakeni wokuthoma njengomnikelo opheleleko otjhiswako kuJehova.+ Lokhu kufuze ukwenze qobe ekuseni. 14 Kunye nayo, qobe ekuseni kufuze unikele okusithandathu kwe-efa njengomnikelo weenthoro, kuhlanganise kwesithathu kwehini yamafutha bona kufafazwe eflowurwini yezinga eliphezulu njengomnikelo weenthoro waqobe kuJehova. Lo, mthetho ozokuhlala usebenza. 15 Kufuze banikele ngemvana eduna, umnikelo weenthoro namafutha qobe ekuseni njengomnikelo opheleleko waqobe otjhiswako.’
16 “Nakhu iKosi ePhakemeko uJehova ekutjhoko: ‘Nangabe ikosana ipha ngayinye yamadodanayo isipho njengelifa, sizokuba yipahla yamadodanayo. Sisabelo sabo ngelifa labo. 17 Kodwana nangabe inikela isipho selifa layo kwenye yeenceku zayo, kuzokuba ngesayo bekube mnyaka wetjhaphuluko;+ ngemva kwalokho sizokubuyela ekosaneni. Lilifa lamadodanayo kwaphela elizokuba ngelazo unomphela. 18 Ikosana akukafuzi ithathe nanyana ngiliphi ilifa labantu ngokubakatelela bona bakhambe endawenabo. Kufuze inikele amadodanayo ilifa elivela endawenayo bona kungabi namuntu hlangana nabantu bami obaqotha endawenayo.’”
19 Ngemva kwalokho, yangiletha ebungenweni+ obuhlanu kwesango eliya eenkumbeni zokudlela ezicwengileko zabaphristi, eziqale etlhagwini+ begodu lapho ngabona indawo engemuva nca ngetjingalanga. 20 Yathi kimi: “Le yindawo lapho abaphristi bazokubilisa khona umnikelo womlandu, umnikelo wesono nendawo lapho bazokubhagela khona umnikelo weenthoro,+ bona bangaphumi nalitho esirhodlweni esingaphandle begodu badlulisele ukucwengeka ebantwini.”+
21 Yangikhuphela esirhodlweni esingaphandle, yangidlulisa emakhoneni amane wesirhodlo, ekhoneni ngalinye lesirhodlo ngabona isirhodlo esingaphandle. 22 Emakhoneni amane wesirhodlo bekuneenrhodlo ezincani, amakhubhithi* ama-40 ubude namakhubhithi ama-30 ububanzi. Woke womane bekalingana. 23 Lapho bekunemiphetho koke magega namane wawo begodu ngaphasi bekunemiphetho eyakhiweko yeendawo zokubilisa iminikelo. 24 Nje-ke yathi kimi: “Lezi zizindlu lapho iinsebenzi zethempelini ezibilisela khona umhlatjelo wabantu.”+