Hezekiyeli

42 Ngemva kwalokho, wangisa esirhodlweni esingaphandle hlanu kwetlhagwini.+ Wangiletha ekumbeni yokudlela ehlanu kwendawo evulekileko,+ etlhagwini lesakhiwo esiseqadi.+ 2 Ubude baso ebungenweni betlhagwini bebumakhubhithi* ali-100 begodu bumakhubhithi ama-50 ububanzi. 3 Beyihlangana nesirhodlo esingaphakathi esimakhubhithi ama-20 ububanzi,+ nomgangadelo wesirhodlo esingaphandle. Amaphasejayo bekaqalene begodu bekaziintezi ezintathu ukuphakama. 4 Ngaphambi kweenkumba zokudlela, bekunendlela yokukhamba ngaphakathi+ emakhubhithi alitjhumi ububanzi namakhubhithi ali-100 ubude,* begodu ubungeno bazo nca ngetlhagwini. 5 Iinkumba zokudlela zesakhiwo bezizincani kunalezo eziseentezini ezingaphasi nezingaphakathi ngombana amaphaseji bekathatha iinkhala zawo ezinengi. 6 Ngombana bekuneentezi ezintathu ukuphakama kodwana bekunganansika ezifana neensika zesirhodlweni. Kungebangelo isikhala esiphasi esinengi sathathwa kizo ukudlula iintezi eziphasi nezingaphakathi.

7 Iboda lelitje elingaphandle elihlanu kweenkumba zokudlela elihlanu kwesirhodlo esingaphandle eliqale ezinye iinkumba zokudlela belimakhubhithi ama-50 ubude. 8 Ubude beenkumba zokudlela ebeziseduze kwesirhodlo esingaphandle bebumakhubhithi ama-50 kodwana lezo eziqale indawo ecwengileko, bezimakhubhithi ali-100. 9 Iinkumba zokudlela bezinobungeno nca ngepumalanga obukusa kizo ukusukela esirhodlweni esingaphandle.

10 Bekubuye kube neenkumba zokudlela ngaphakathi kweboda lelitje lesirhodlo nca ngepumalanga, hlanu kwendawo evulekileko nomakhiwo.+ 11 Bekunendlela phambi kwazo enjengaleyo eseenkumbeni zokudlela ezingetlhagwini.+ Bezilingana ngobude nangobubanzi, iindawo zokuphuma nokwakheka kwazo bekufana. Ubungeno bazo 12 bebufana nobungeno beenkumba zokudlela obuhlanu kwesewula. Bekunobungeno ekuthomeni kwendlela yokukhamba, phambi kweboda lelitje elinca ngepumalanga, lapho umuntu angangena khona.+

13 Ngemva kwalokho, yathi kimi: “Iinkumba zokudlela ezisetlhagwini neenkumba zokudlela ezisesewula ezihlanu kwendawo evulekileko,+ ziinkumba zokudlela ezicwengileko lapho abaphristi abatjhidela kuJehova khona badle iminikelo ecwengeke khulu.+ Lapho babeka khona iminikelo ecwengeke khulu, umnikelo wekoroyi, umnikelo wesono nomnikelo womlandu ngombana indawo icwengile.+ 14 Abaphristi nabangenako akukafuzi baphume endaweni ecwengileko baye esirhodlweni esingaphandle, ngaphandle kokuthi bahlubule qangi izambatho ebebasebenza ngazo+ ngombana zicwengekile. Bazokumbatha ezinye izambatho bona baye endaweni abantu abavumeleke kizo.”

15 Nakaqeda ukulinganisa indawo engaphakathi yethempeli, wangikhupha ngendlela yesango eliqale epumalanga+ walinganisa yoke indawo.

16 Yalinganisa ihlangothi elingepumalanga ngomhlanga wokulinganisa.* Ngokuya ngomhlanga wokulinganisa, belibubude bemihlanga ema-500 ukusuka kwelinye ihlangothi ukuya kwelinye.

17 Yalinganisa ihlangothi letlhagwini ngomhlanga wokulinganisa ngokuya ngomhlanga wokulinganisa belibubude bemihlanga ema-500.

18 Yalinganisa ihlangothi lesewula ngokuya ngomhlanga wokulinganisa belibubude bemihlanga ema-500.

19 Yabhodela ngehlangothini letjingalanga. Yalinganisa ubude bemihlanga ema-500 ngomhlanga wokulinganisa.

20 Walilinganisa emahlangothini amane. Belineboda kiyo yoke indawo+ ebelimihlanga ema-500 ubude nemihlanga ema-500 ububanzi,+ bona kuhlukaniswe hlangana nokucwengileko nokujayelekileko.+