Hezekiyeli

14 Abanye abadala bakwa-Israyeli beza bahlala phambi kwami.+ 2 Nje-ke ilizwi lakaJehova lafika kimi, lathi: 3 “Ndodana yomuntu, amadoda la azimisele ukulandela iinthombe zawo ezinyenyisako,* abeke iinqabo bona abantu bone. Kghani kufuze ngibavumele babuze kimi?+ 4 Nje-ke khuluma nabo, ubatjele ukuthi, ‘Nakhu iKosi ePhakemeko uJehova ekutjhoko: “Nange umIsrayeli azimisele ukulandela iinthombe zakhe ezinyenyisako, abeke isiqabo esibangela ukuthi abantu bami bone begodu eze azokubuza umphorofidi, mina Jehova, ngizomphendula ngokufaneleko ngokweenthombe zakhe ezinengi ezinyenyisako. 5 Ngombana ngizokubangela ukusaba eenhliziyweni zendlu ka-Israyeli ngombana boke basukile kimi begodu balandela iinthombe zabo ezinyenyisako.”’+

6 “Nje-ke tjela indlu ka-Israyeli uthi, ‘Nakhu iKosi ePhakemeko uJehova ekutjhoko: “Buyani phendukani eenthombeni zenu ezinyenyisako fulathelisani ubuso benu kizo zoke izenzo zenu ezinyenyisako.+ 7 Ngombana nange umIsrayeli namkha isakhamuzi esivela kwenye inarha esihlala kwa-Israyeli sizihlukanisa nami begodu sizimisele ukulandela iinthombe zaso ezinyenyisako besibeke isiqabo esibangela ukuthi abantu bone bese sizokubuza umphorofidi,+ mina Jehova ngizosiphendula. 8 Ngizokujamelana nomuntu loyo ngimenze itshwayo lesiyeleliso nesaga, ngizomsusa hlangana nabantu bami+ begodu kuzokufuze nazi ukuthi nginguJehova.”’

9 Nangabe umphorofidi ukhohlisiwe begodu aphendule, mina Jehova, ngimi omkhohlisileko umphorofidi loyo.+ Ngizokulula isandla sami ngokujamelene naye ngimrhayile ebantwini bami u-Israyeli. 10 Kuzokufuze bathwale umlandwabo; umlandu wobuzako uzokufana nomlandu womphorofidi, 11 bona indlu ka-Israyeli ilise ukukhambela kude nami begodu ilise ukuzisilaphaza ngayo yoke imilandwayo. Izokuba babantu bami, ngizokuba nguZimabo,’+ kutjho iKosi ePhakemeko uJehova.”

12 Ilizwi lakaJehova lafika kimi godu, lathi: 13 “Ndodana yomuntu, nange inarha yona ngokujamelene nami ngokungathembeki, ngizokulula isandla sami ngokujamelene nayo ngitjhabalalise isabelo sayo sokudla+ begodu ngizokuthumela indlala kiyo+ ngizokususa umuntu nesilwana kiyo.”+ 14 “‘Ngitjho nanyana amadoda amathathu la, uNowa,+ uDanyela+ noJobho+ bebaphakathi kwayo, bebazozisindisa bona kwaphela ngebanga lokulunga kwabo,’+ kutjho iKosi ePhakemeko uJehova.”

15 “‘Namkha akhesithi ngenza iimbandana zommango eziyingozi zidlule phakathi kwenarha, zirhayile abantu bayo begodu ziyenze inarha enganalitho, okunganamuntu odlula kiyo ngebanga leembandana.+ 16 Nangisaphilako,’ kutjho iKosi ePhakemeko uJehova, ‘ngitjho nanyana amadoda amathathu la bekaphakathi kwayo bengeze asindise amadodanawo namadodakazawo, bekazozisindisa wona kwaphela begodu inarha beyizokusala inganamuntu.’”

17 “‘Namkha, akhesithi ngiletha isabula ngokujamelene nenarha+ bese ngithi: “Isabula ayidlule hlangana nenarha,” begodu isuse kiyo umuntu nesilwana,+ 18 ngitjho nanyana amadoda amathathu la bekakiyo, nangisaphilako,’ kutjho iKosi ePhakemeko uJehova, ‘bekangekhe asindise amadodanawo namadodakazawo; bekazozisindisa wona kwaphela.’”

19 “‘Namkha, akhesithi ngithumela isifo esibulalako enarheni leyo+ begodu ngithululela ilaka lami kiyo ngokuphalazwa kweengazi bona ngisuse umuntu nesilwana kiyo, 20 ngitjho nanyana uNowa,+ uDanyela+ noJobho+ bebakiyo, nangisaphilako,’ kutjho iKosi ePhakemeko uJehova, ‘bebangekhe basindisa amadodanabo namadodakazabo; bebazozisindisa bona kwaphela ngebanga lokulunga kwabo.’”+

21 “Ngombana nakhu iKosi ePhakemeko uJehova ekutjhoko: ‘Kuzokuba njalo nangithumela iinjeziso zami ezine,+ isabula, indlala, isibandana esilimazako nesifo esibulalako,+ ngokujamelene neJerusalema bona ngisuse umuntu nesibandana kiyo.+ 22 Nanyana kunjalo, abanye abasele kiyo bazokuphunyurha begodu bakhutjhwe kilo,+ amadodana namadodakazi. Bayeza kini begodu nanibona iindlela zabo nezenzo zabo, nakanjani nizokududuzeka ngehlekelele engiyilethe eJerusalema, naphezu kwakho koke engikwenze kiyo.’”

23 “‘Bazoniduduza nanibona iindlela zabo nezenzo zabo, nizokwazi ukuthi lokhu engikwenze kilo angikakwenzi ngaphandle kwesizathu ngenze ebekufanele ngikwenze kilo,’+ kutjho iKosi ePhakemeko uJehova.”