Yokuthoma YamaKhosi
17 Nje-ke u-Eliya*+ umTitjhibe, isakhamuzi seGiliyadi,+ wathi ku-Arhabi: “Ikani uJehova uZimu ka-Israyeli engimlotjhako nakasaphilako, angekhe kube nombethe namkha izulu iminyaka ethileko ngaphandle kokuthi ngikhuphe ilizwi!”+
2 Ilizwi lakaJehova lafika kuye lathi: 3 “Suka la, uye epumalanga uyokubhaca emRhobeni weKerithe, epumalanga yeJordani. 4 Uzakusela amanzi emlanjaneni begodu ngizokuyala amagubulu akulethele lapho ukudla.”+ 5 Khonokho wenza ngokuvumelana nelizwi lakaJehova; wakhamba, wayokuhlala emRhobeni weKerithe, epumalanga yeJordani. 6 Amagubulu bewamlethela uburotho nenyama ekuseni, abuye amlethele uburotho nenyama ntambama begodu bekasela amanzi emlanjaneni.+ 7 Kodwana ngemva kwamalanga athileko, umlanjana loyo watjha,+ ngombana izulu belingani enarheni.
8 Yeke ilizwi lakaJehova lafika kuye lathi: 9 “Sikima uye eTsarifathi yeTsidoni uhlale khona. Ngizokuyala umhlolokazi lapho bona akunikele ukudla.”+ 10 Wasikima-ke waya eTsarifathi. Nakafika esangweni ledorobho, wafumana umhlolokazi atheza. Yeke wambiza wathi: “Ngibawa amanzana wokusela ngekapho.”+ 11 Nakasathi uyomkhela, wathi kuye: “Ngibawa ungiphathele nesiqetjhana soburotho.” 12 Umhlolokazi wamphendula wathi: “Ikani uJehova uZimakho nakasaphilako, anginabo uburotho, enginakho yiflowuru encani emjekeni omkhulu namafutha amancani+ emjekeni omncani. Kwanje ngitheza iinkuni ezimbalwa, ngizokukhamba ngiyozenzela okuthileko mina nendodanami. Lokho kuzabe kukukudla kwethu kokugcina bese siyahlongakala.”
13 U-Eliya wathi kuye: “Ungasabi. Khamba uyokwenza lokho okutjhoko. Kodwana thoma ngokwenzela mina uburotho obuyindulungu ngalokho okulapho bese ubuletha kimi. Ngemva kwalokho, sewungenzela wena nendodanakho okuthileko. 14 Ngombana uJehova uZimu ka-Israyeli uthi: ‘Iflowuru esemjekeni omkhulu angekhe iphele namafutha ebewasemjekeni omncani angekhe aphele bekube lilanga uJehova anisa ngalo izulu enarheni.’”+ 15 Umhlolokazi wakhamba wenza njengombana u-Eliya atjhwile, yeke yena nomndenakhe no-Eliya badla amalanga amanengi.+ 16 Iflowuru ebeyisemjekeni omkhulu akhenge iphele namafutha ebewasemjekeni omncani akhenge aphele, ngokuvumelana nelizwi lakaJehova alikhulume ngo-Eliya.
17 Ngemva kwezintwezi, indodana yomhlolokazi yagula, ukugula kwayo kwaba kumbi kangangobana yahlongakala.+ 18 Yeke umhlolokazi wathi ku-Eliya: “Ungibangisani engaka muntu kaZimu weqiniso? Kghani uzele ukuzongikhumbuza ngomlandwami nokubulala indodanami?”+ 19 Kodwana u-Eliya wathi kuye: “Nginikela indodanakho.” Wayithatha ezandleni zakhe, wayiguga wakhuphukela nayo elawini elisephahleni, lapho ebekahlala khona, wayilalisa embhedenakhe.+ 20 Wabiza uJehova wathi: “Maye! Jehova Zimami,+ kghani sewuhlunguphaza nomhlolokazi engihlala kwakhe ngokubulala indodanakhe?” 21 Ngemva kwalokho, wazilulela phezu komntwana amahlandla amathathu, wabiza uJehova wathi: “Maye! Jehova Zimami, ukuphila komntwana* lo akubuyele kuye.” 22 UJehova wasilalela isibawo saka-Eliya,+ ukuphila komntwana* kwabuyela kuye, waphila.+ 23 U-Eliya wathatha umntwana wehlela naye ngendlini asuka elawini elisephahleni, wamnikela unina; u-Eliya wathi: “Qala! Indodanakho iyaphila.”+ 24 Ngalokho umfazi lo wathi ku-Eliya: “Nje khona sengiyazi ukuthi kwamambala umumuntu kaZimu+ nokuthi ilizwi lakaJehova elisemlonyenakho liliqiniso.”