Zefaniya
2 Ngaphambi kobana umyalo wesahlulelo uzaliseke,
Ngaphambi kobana ilanga lidlule njengeenhluba,
Ngaphambi kobana ilaka lakaJehova elivuthako lehlele phezu kwenu,+
Ngaphambi kobana ilanga lelaka lakaJehova lehlele phezu kwenu,
3 Funani uJehova+ noke nina abathobekileko bephasini,
Abalalela imiyalwakhe elungileko.
Funani ukulunga, funani ukuthobeka.
Mhlamunye nizokuvikeleka ngelanga lelaka lakaJehova.+
4 Ngombana iGaza izokuba lidorobho elilahliweko
Begodu i-Atjhikheloni izokutjhatjalaliswa.+
I-Atjhidodi izokuqothwa emini lihlabile,
Begodu i-Ekroni izokuruthulwa.+
5 “Maye! Kini abahlala eduze nelwandle, sitjhaba samaKereti.+
Ilizwi lakaJehova lijamelene nani.
Maye! Kanana narha yamaFilista, ngizokutjhabalalisa,
Bona kungabi nesakhamuzi esiseleko.
6 Inarha eseduze nelwandle izokuba madlelo,
Izokuba nemithombo yabelusi neembaya zezimvu ezenziwe ngamatje.
7 Izokuba sifunda sabaseleko bendlu kaJuda;+
Bazokudla lapho.
Ebusuku bazokulala ezindlini ze-Atjhikheloni.
Ngombana uJehova uZimabo uzobatlhogomela,
Begodu uzokubuyisa abathunjiweko.”+
8 “Ngilizwile ihlazo elibangwa babantu bakwaMowabi+ nehlamba yama-Amoni,+
Abathuke abantu bami begodu babathusela ngokuthi bazokuthatha isifunda sabo.+
9 Yeke nangisaphilako,” kutjho uJehova wamabutho, uZimu ka-Israyeli,
“UMowabi uzokuba njengeSodoma,+
Begodu ama-Amoni njengeGomora,+
Indawo yameva, umgodi wetswayi nenarha enganalitho ngokungapheliko.+
Abaseleko ebantwini bami bazobathumba,
Nabasindileko besitjhaba sami bazobaqotha.
10 Ngilokhu abazokufumana esikhundleni sokuzikhakhazisa kwabo,+
Ngombana bathuke abantu bakaJehova wamabutho begodu baziphakamisa kibo.
11 UJehova uzokusabeka kibo;
Ngombana uzokuqeda boke abozimu bephasini,
Begodu zoke iinhlengele zeentjhaba zizomkhothamela,+
Esinye nesinye endawenaso.
12 Nani bantu beTopiya nizokubulawa ngesabulami.+
13 Uzokululela isandla sakhe ngetlhagwini atjhabalalise i-Asiriya,
Uzokwenza iNiniva ibe yinarha enganalitho,+ yome njengerhalawumba.
14 Imihlambi izokulala phakathi kwayo yoke imihlobo yeembandana.
Igubulu nogubudu bazokuhlala hlangana neensika zayo eziwileko ebusuku.
Ilizwi lizokubhina efesidereni.
Iindawo zokungena zizokutjhatjalaliswa;
Ngombana uzokwembula imiqebethu yomsedari.
15 Leli lidorobho elizikhakhazisako ebelihlala liphephile,
Lithi ehliziywenalo, ‘Ngimingimi begodu akekho omunye.’
Seliphenduke into esabekako,
Indawo lapho kulala khona iimbandana!
Woke umuntu odlula ngakilo ubetha umlozi bekalikhombe ngomuno.”+