Eksodusi
23 “Ungarhatjhi umbiko omamala.+ Ungasebenzisani nesikhohlakali ngokuba ngufakazi wamala.+ 2 Ungalandeli inengi ekwenzeni okumbi namkha unikele ubufakazi obuhlanakela ubulungiswa ukwenzela bona uvumelane nenengi. 3 Nawugweba umlandu womuntu otlhagako, ungabi ngehlangothini lakhe ngombana umzwela bona utlhagile.+
4 “Nangabe uhlangana nekunzi namkha udumbana wenaba lakho ahlahlatha, kufuze umbuyisele kilo.+ 5 Nangabe ubona udumbana womuntu okuhloyako alele phasi ngebanga lokudiselwa mthwalo, kufuze ungamtjhiyi. Msize nisuse umthwalo okudumbana.+
6 “Ungahlanakeli ubulungiswa lokha nawugweba umlandu womuntu otlhagako.+
7 “Ungabandakanyeki ekumangaleleni ngamala begodu ungabulali umuntu onganamlandu, olungileko ngombana angeze ngathi umuntu okhohlakeleko ulungile.+
8 “Ungavumeli ukufunjathiswa ngombana kungakhohlisa nomuntu owahlulela kuhle kungenza nomuntu olungileko angathembeki.+
9 “Ningagandeleli umuntu ovela kwenye inarha. Nazi kuhle ukuthi kunjani ukuhlala enarheni ekungasi ngeyenu ngombana nakhe nahlala enarheni ekungasi ngeyenu eGibhide.+
10 “Iminyaka esithandathu, kufuze nilime enarhenenu begodu nibuthelele enikuvunileko.+ 11 Emnyakeni wekhomba kufuze niyilise ningayilimi begodu abantu abatlhagako abaphakathi kwenu bazokudla kiyo, abazokutjhiya kuzokudliwa ziimbandana. Ngilokho-ke okufuze nikwenze ngamasimenu wamadiribe newama-oliva.
12 “Kufuze nisebenze amalanga asithandathu kodwana elangeni lekhomba kufuze ningasebenzi ukwenzela bona niphumuze iinkunzi zenu, abodumbana benu, iingqila zenu nabantu abavela kwenye inarha.+
13 “Kufuze niyelele bona nenza koke enginitjele khona,+ ningabizi amagama wabanye abozimu; akukafuzi aphume emlonyenenu.+
14 “Kufuze ningenzele umnyanya kathathu ngomnyaka.+ 15 “Nizokugidinga umNyanya woBurotho obunganaSibiliso.+ Nizokudla uburotho obunganasibiliso amalanga alikhomba njengombana nginiyalile, ngesikhathi esibekiweko ngenyanga ka-Abibi,*+ ngombana naphuma eGibhide ngesikhatheso. Akunamuntu okufuze avele phambi kwami angakaphathi litho.+ 16 Godu kufuze nigidinge umNyanya wesiVuno* seenthelo zokuthoma zomsebenzenu zalokho enikutjale esimini+ nomNyanya wokuButhelela* ekupheleni komnyaka, nasele nibuthelele koke enikufumene emasimini.+ 17 Kathathu ngomnyaka, woke amadoda kufuze avele phambi kweKosi yeqiniso, uJehova.+
18 “Naninikela iingazi zomhlatjelwami akukafuzi zikhambisane nananyana yini enesibiliso. Imihlatjelo yamafutha eyenziwa eminyanyenami akukafuzi ihlale ubusuku boke bekube sekuseni.
19 “Iinthelo zenu zokuthoma zehlabathi ezikhethekileko kufuze nizilethe endlini kaJehova, uZimakho.+
“Akukafuzi nibilise inyama yembuzana ngebisi lakanina.+
20 “Ngithumela ingilozi phambi kwenu+ bona ininqophise endleleni beyinise endaweni enginilungiselele yona.+ 21 Ilaleleni. Ningalwi nayo, ngombana angeze ilibalele imitjhaphwenu+ ngebanga lokuthi iza ngegama lami. 22 Nanilalela ilizwi layo benenze koke engikutjhoko, ngizokuba linaba lamanabenu bengiphikise labo abaniphikisako. 23 Ngombana ingilozami izokukhamba phambi kwenu iningenise kuma-Amori, kumaRhiti, kumaPerizi, kumaKanana, kumaRhivi nakumaJebusi begodu mina ngizowatjhabalalisa.+ 24 Ningabakhothameli abozimu babo namkha nibalotjhe begodu akukafuzi nilingise imikghwabo,+ kunalokho kufuze nitjhabalalise iinthombe zabo niphahlaze neensika zabo ezicwengileko.+ 25 Kufuze nilotjhe uJehova uZimenu,+ uzonibusisa ngoburotho nangamanzi.+ Ngizokwenza ukuthi ningasaguli.+ 26 Enarhenenu akunamfazi ozokubuya endleleni* namkha ozokuba yinyumba+ ngombana ngizonenza niphile isikhathi eside.
27 “Ngizokwenza bona bangisabe ngaphambi kobana nifike+ begodu ngizokutjharaganisa boke abantu enihlangana nabo, ngizokwenza woke amanabenu anibaleke.+ 28 Ngaphambi kobana nifike ngizokwenza amanabenu aphelelwe mamandla,+ ngizokuqotha amaRhivi, amaKanana namaRhiti phambi kwenu.+ 29 Angekhe ngibaqothe phambi kwenu ngomnyaka munye ukwenzela bona inarha ingahlali inganamuntu neembandana zingandi ukudlula nina.+ 30 Ngizobaqotha kancanikancani phambi kwenu bekube kulapho senibanengi khona nithathe inarha.+
31 “Ngizokubeka imikhawulwenu kusukela eLwandle eliBomvu kuya elwandle lamaFilista, kusukela emmangweni kuya eMlanjeni*+ ngombana ngizokunikela abantu abahlala khona esandleni senu, nizobaqotha phambi kwenu.+ 32 Ningenzi isivumelwano nabo namkha nabozimu babo.+ 33 Akukafuzi bahlale enarhenenu ngombana bazanenza none kimi. Naningalotjha abozimu babo, lokho kuzakuba sithiyo kimi.”+